Genesi 38:1-30
-
Juda le Thamara (1-30)
38 Mo e ka bago ka yona nako yeo Juda o ile a tloga go bana babo a yo hloma tente ya gagwe kgauswi le monna yo mongwe wa Moadulama, yoo leina la gagwe e bego e le Hira.
2 Ya re ge Juda a le moo a bona morwedi wa Shua yo e bego e le Mokanana. Ke moka a mo nyala gomme a robala le yena.
3 Ka gona o ile a ima. Ka morago a belega morwa gomme Juda a mo reela leina la Ere.
4 Mosadi yoo o ile a ima gape. Ke moka a belega morwa gomme a mo reela leina la Onane.
5 O ile a belega morwa yo mongwe gape a mo reela leina la Shela. Ba be ba le Akatsibe ge Shela a be a belegwa.
6 Ka morago Juda o ile a kgethela morwa wa gagwe wa mathomo e lego Ere mosadi, gomme leina la gagwe e be e le Thamara.
7 Eupša Ere o be a dira dilo tšeo di sa kgahlišego Jehofa, ka gona Jehofa o ile a mmolaya.
8 Ka baka leo Juda a re go Onane: “Nyala mosadi wa ngwaneno yo a hlokofetšego e le gore a tle a belege bana bao ba tlago go tšwetša pele moloko wa ngwaneno.”
9 Eupša Onane o ile a tseba gore bana bao e be e ka se be ba gagwe. Ka gona le ge a ile a robala le mosadi wa ngwanabo, ga se a ka a dira gore a ime ka gobane o be a tšhollela peu ya gagwe fase.
10 Seo a ilego a se dira se ile sa se kgahle Jehofa, ka gona le yena o ile a mmolaya.
11 Ke moka Juda a re go Thamara ngwetši ya gagwe: “Sepela o yo dula ntlong ya tatago, o se ke wa nyalwa gape go fihlela Shela morwa wa ka a gola.” Juda o ile a mmotša seo ka gobane o be a tšhaba gore morwa wa gagwe Shela o tla hlokofala go swana le barwa ba gagwe ba bangwe. Ka gona Thamara a sepela a yo dula ntlong ya tatagwe.
12 Ka morago ga nako e itšego, mosadi wa Juda e lego morwedi wa Shua o ile a hlokofala. Juda o ile a fetša nako a mo llela. Ka morago ga moo o ile a ya Thimina go batho ba go kota dinku tša gagwe a na le Hira mogwera wa gagwe wa Moadulama.
13 Ke moka Thamara a botšwa gore: “Ratswalago o ya Thimina go yo kota dinku tša gagwe.”
14 Ge a ekwa seo a apola diaparo tša gagwe tša go bontšha gore ke mohlologadi gomme a bea lešela magetleng a ba a ikhupetša ka lešira sefahlegong, ka gobane o be a bone gore Shela o godile, eupša ratswalagwe ga se a mo fa yena gore e be mosadi wa gagwe.
15 Ge Juda a mmona, kapejana a nagana gore ke mogweba-ka-mmele, ka gobane o be a ikhupeditše sefahlego.
16 Ka gona Juda a ya go yena ka thoko ga tsela gomme a re: “Ke kgopela o ntumelele gore ke robale le wena.” Ka gobane o be a sa tsebe gore ke ngwetši ya gagwe. Eupša Thamara a re: “O tla mpha eng gore o robale le nna?”
17 Juda a re: “Ke tla go romela putšanyana yeo e tšwago mohlapeng wa ka.” Eupša Thamara a re: “Na o tla mpha selo seo e tlago go ba bohlatse bja selo se o ntshepišitšego sona go fihlela o e romela?”
18 Juda a re: “O nyaka ke go fe eng?” Thamara a re: “Mphe palamonwana ya gago le thapo ya yona, le molamo woo o o swerego.” Juda a mo fa tšona gomme a robala le yena, ke moka Thamara a ima.
19 Ka morago ga moo a sepela a ya a tloša lešela leo a bego a itateditše ka lona gomme a apara diaparo tša go bontšha gore ke mohlologadi.
20 Juda a roma mogwera wa gagwe wa Moadulama gore a iše putšanyana yeo gomme a boe le dilo tšeo a bego a di tlogetše go mosadi yoo, eupša a se mo hwetše.
21 A ya a botšiša banna ba lefelong leo a re: “O kae mogweba-ka-mmele yola wa tempeleng wa kua Enaima kgauswi le tsela?” Eupša bona ba re: “Ga se gwa ka gwa ba le mogweba-ka-mmele wa tempeleng mo.”
22 Mafelelong a boela go Juda gomme a re: “Mosadi yoo ga se ka mo hwetša moo, le gona banna ba moo ba re: ‘Ga se gwa ka gwa ba le mogweba-ka-mmele wa tempeleng lefelong leo.’”
23 Ka gona Juda a re: “A a di tšee, go sego bjalo re tlo tlontlollwa ge re ka tšwela pele re mo nyaka. Nna yena ke rometše putšanyana ye, eupša wena wa se mo hwetše.”
24 Eupša ka morago ga dikgwedi tše e ka bago tše tharo, Juda a botšwa gore: “Thamara ngwetši ya gago o itirile mogweba-ka-mmele ka baka leo o imile.” Ge Juda a ekwa seo a re: “Mo ntšhetšeng ka ntle le mmolayeng ke moka le mo fiše.”
25 Ge a ntšhetšwa ka ntle a romela molaetša go ratswalagwe gore a botšwe gore: “Ke imišitšwe ke mong wa dilo tše. Anke o di lebelele, gomme o bone gore palamonwana ye le thapo ya yona le molamo wo ke tša mang.”
26 Juda a di lebelela gomme a re: “Thamara ga a na molato, molato ke wa ka ka gobane ga se ka mo fa Shela morwa wa ka.” Ka morago ga moo Juda a se hlwe a robala le yena.
27 Ge nako ya gore Thamara a belege e fihla, o ile a belega mafahla.
28 Bjale ya re ge a belega, yo mongwe wa bana bao a ntšha seatla gomme kapejana mmelegiši a tšea thaponyana e khwibidukhwibidu a e tlema seatleng sa ngwana yoo a re: “Yo o tšwele pele.”
29 Eupša ge a se no bušetša seatla seo sa gagwe morago, ngwanabo a belegwa gomme mmelegiši a re: “Wena o gobaditše* mmago.” Ka gona a reelwa leina la Peretse.*
30 Ka morago ga moo ngwanabo yoo seatla sa gagwe se bego se tlemilwe ka thaponyana e khwibidukhwibidu a belegwa gomme a reelwa leina la Tsera.
