Genesi 50:1-26
50 Ke moka Josefa a itahlela godimo ga tatagwe gomme a lla gabohloko ge a dutše a mo gokaretše e bile a mo khisa.
2 Ka morago ga moo, Josefa a laela bahlanka ba gagwe bao e lego dingaka gore ba omiše setopo sa tatagwe. Ka gona dingaka tšeo tša omiša setopo sa Isiraele.
3 Di ile tša fetša matšatši a 40 di omiša setopo seo, ka gobane ka tlwaelo go be go tšea matšatši ao go omiša setopo. Ke moka Baegepeta ba fetša matšatši a 70 ba mo llela.
4 Ge matšatši a go llela Isiraele a fela, Josefa o ile a bolela le ba ka mošate wa Farao a re: “Ke kgopela gore le botšeng Farao molaetša wo:
5 ‘Ge tate a be a le kgauswi le go hwa o ile a mpotša gore ke mo enele, gomme a re: “Ge ke ehwa o mpoloke lebitleng leo ke itokišeleditšego lona kua nageng ya Kanana.” Bjale ke kgopela go yo boloka tate, gomme ka morago ga moo ke tla boa.’”
6 Ke moka Farao a re: “Phetha keno yeo, sepela o yo boloka tatago.”
7 Ka gona Josefa a sepela a yo boloka tatagwe. O ile a sepela le bahlanka ka moka ba Farao, le banna bao ba bego ba etelela pele ka mošate wa gagwe le banna ka moka bao ba bego ba etelela pele nageng ya Egepeta.
8 Le gona o ile a sepela le batho ka moka bao ba bego ba dula le yena, le bana babo le batho ka moka bao ba bego ba dula le tatagwe. Ba tlogela feela bana ba bona ba banyenyane le mehlape ya bona ya dipudi, dinku le ya dikgomo nageng ya Goshene.
9 A sepela le dikariki le banna bao ba nametšego dipere, gomme e be e le sehlopha se segolo kudu.
10 Ba fihla seboeng sa Atade, seo se lego tikologong ya Noka ya Jorodane, gomme ba lla gabohloko kudu. Ke moka Josefa yena a llela tatagwe matšatši a šupago.
11 Badudi ba naga yeo, e lego Bakanana, ba bona kamoo ba llelago mohu yoo ka gona moo seboeng sa Atade, gomme ba kgotsa ba re: “Ruri Baegepeta ba tla ba lla gabohloko!” Ke ka baka leo lefelo leo le ilego la bitšwa Abele-misiraima,* yeo e lego tikologong ya Noka ya Jorodane.
12 Barwa ba Jakobo ba ile ba dira ka wona mokgwa woo a bego a ba laetše ka gona.
13 Barwa ba gagwe ba ile ba mo iša nageng ya Kanana gomme ba mmolokela leweng la serapa sa Makapela, e lego serapa seo se lego kgauswi le Mamure, seo Aborahama a ilego a se reka go Efurone wa Mohethe gore go tle go bolokelwe batho ba gabo go sona.
14 Ka morago ga gore Josefa a boloke tatagwe, o ile a boela Egepeta le bana babo le batho ka moka bao ba bego ba tlile le yena go tlo boloka tatagwe.
15 Ka morago ga lehu la tatago bona, bana babo Josefa ba ile ba botšana ba re: “Mohlomongwe Josefa a ka ba a re swere ka pelo gomme a ka tla a itefeletša bobe ka moka bjo re mo dirilego bjona.”
16 Ka gona ba romela molaetša go Josefa gore a botšwe gore: “Tatago pele a ka hlokofala o laetše gore:
17 ‘Le botše Josefa le re: “Morwa wa ka, bana beno ba go dirile selo se sebe, eupša ke a go kgopela hle, ba swarele dilo ka moka tšeo ba go dirilego tšona.”’ Bjale hle re swarele, rena bahlanka ba Modimo yo tatago a bego a mo hlankela.” Ge Josefa a ekwa mantšu ao a lla.
18 Ka morago ga moo bana babo le bona ba tla ba khunama pele ga gagwe gomme ba re: “Re makgoba a gago, re dire kamoo o ratago ka gona!”
19 Josefa a re go bona: “Le se ke la tšhoga. Ga se nna Modimo, gomme nka se le ahlole.
20 Le ge le be le nyaka go nkgobatša, Modimo o ile a fetoša seo a se dira selo se sebotse gore a phološe maphelo a batho ba bantši, ka ge a dira bjalo lehono.
21 Bjale le se ke la tšhoga. Ke tla dula ke nea lena le bana ba lena dijo.” Ka gona a ba homotša le go ba kgothatša.
22 Josefa a tšwela pele a dula Egepeta, yena le batho ka moka ba lapeng la tatagwe. Josefa o phetše mengwaga e 110 (lekgolo le lesome).
23 Josefa a bona bana ba Efuraime go fihla ka moloko wa boraro, a bona gape le bana ba Makiri, e lego morwa wa Manase. Josefa o be a ba tšea bjalo ka bana ba gagwe.
24 Mafelelong Josefa a re go bana babo: “Ke kgauswi le go hwa, eupša ruri Modimo o tla le thuša, gomme o tlo le ntšha nageng ye a le iša nageng yeo a enetšego Aborahama, Isaka le Jakobo gore o tla ba nea yona.”
25 Ka gona Josefa a botša barwa ba Isiraele, a re: “Nkeneleng gore ge Modimo a le thuša le tla tšea marapo a ka la sepela le ona.”
26 Ka gona Josefa o ile a hlokofala a na le mengwaga e 110 (lekgolo le lesome), gomme ba omiša setopo sa gagwe ba se bea ka lepokising gona moo Egepeta.
Mengwalo ya tlase
^ Leina le le ra gore, “Sello sa Baegepeta sa go Llela Mohu.”
