Genesi 6:1-22
6 Bjale ya re ge batho ba thoma go oketšega mo lefaseng gomme ba eba le barwedi,
2 barongwa* ba lemoga gore barwedi ba batho e be e le ba babotse, ba thoma go itšeela basadi go bona.
3 Ke moka Jehofa a re: “Nka* se kgotlelele batho sa ruri ka ge ba na le sebe. Ka gona ba tla phela mengwaga e 120 (lekgolo-masomepedi).”
4 Ge Modimo a be a bolela taba yeo go be go na le ditšitširipa* mo lefaseng. Mehleng yeo barongwa ba ile ba robala le basadi gomme basadi bao ba ba belegela barwa. Barwa bao ba be ba na le matla kudu e bile ba tumile.
5 Ka gona Jehofa a bona gore batho ba be ba dira dilo tše mpe kudu mo lefaseng le gore ba be ba dula ba nagana le go kganyoga go dira dilo tše mpe ka dipelong tša bona.
6 Jehofa a itshola gore o dirile batho lefaseng gomme pelo ya gagwe ya kwa bohloko.
7 Ka gona Jehofa a re: “Ke tlo fediša batho bao ke ba bopilego lefaseng, ka gobane ke a itshola gore ke ba bopile. Ke tlo fediša batho, diruiwa, digagabi le dinonyana tše di fofago magodimong.”
8 Eupša Jehofa o be a amogela Noa.
9 Tše ke ditaba tša mabapi le Noa.
Noa e be e le monna wa go loka. O be a sa swane le batho ba mehleng ya gagwe ka gobane o be a sa solege. Noa o be a sepela le Modimo wa nnete.
10 Ge nako e dutše e eya, Noa o ile a ba le barwa ba bararo e lego Sheme, Hama le Jafete.
11 Eupša Modimo a bona gore lefase le senyegile e bile le tletše ka bošoro.
12 Ee, Modimo a lebelela lefase gomme a bona le senyegile. Batho ka moka mo lefaseng ba be ba itshwere gampe.
13 Ke moka Modimo a re go Noa: “Ke tlo fediša batho ka moka ka gobane lefase le tletše bošoro ka baka la bona, bjale ke tlo fediša batho le diphedi ka moka.
14 Itirele areka ka dikota tšeo di tiilego.* O dire dikamora ka arekeng, o e tlotše ka moti* ka gare le ka ntle.
15 O dire areka ka tsela ye: Botelele bja yona e be dimithara tše 134 (lekgolo-masometharo-nne), bophara bja yona e be dimithara tše 22 gomme botelele bja yona go ya godimo e be dimithara tše 13.
16 O direle areka lefasetere,* ka go tlogela sekgoba sa mo e ka bago seripa sa mithara magareng ga tlhaka le lefasetere. Mojako wa areka o be ka lehlakoreng la yona. E be le mabato a mararo, la ka tlase, la bobedi le la boraro.
17 “Ge e le nna ke tlo tliša meetsefula lefaseng gore ke fediše dilo ka moka tšeo di phelago* ka tlase ga magodimo. Selo se sengwe le se sengwe se se lego lefaseng se tlo fedišwa.
18 Ke dira kgwerano le wena, gomme o tsene ka arekeng, wena le barwa ba gago le mosadi wa gago gotee le basadi ba barwa ba gago.
19 Le gona ka arekeng o tliše diphoofolo tše pedi tše pedi tša mehuta ka moka gore di dule di phela. E be phoofolo e tona le e tshadi.
20 O tliše dinonyana go ya ka mehuta ya tšona, le diruiwa go ya ka mehuta ya tšona gotee le digagabi ka moka go ya ka mehuta ya tšona. Di tla tsena ka moo go wena e le tše pedi tše pedi gore o tle o di phološe.
21 Ge e le wena o ikgobokeletše dijo tša mehuta ka moka, gore e be dijo tša gago le tša diphoofolo.”
22 Noa a dira dilo ka moka tšeo Modimo a mo laetšego tšona. A dira feela bjalo.
Mengwalo ya tlase
^ Phetolelo ya lentšu ka lentšu e re, “barwa ba Modimo wa nnete.”
^ Phetolelo ya lentšu ka lentšu e re, “moya wa ka.”
^ Phetolelo ya lentšu ka lentšu e re, “Banefilimi.”
^ Go ka direga gore e be e le tša mohlare wa mohuta wa mophaene.
^ Ke gore “selo sa go swana le sekontiri.”
^ Goba “tlhaka.”
^ Phetolelo ya lentšu ka lentšu e re, “nama ka moka yeo e nago le moya wa bophelo.”
