Jesaya 2:1-22
2 Pono yeo Jesaya morwa Amotse a e bonego ya seo se tlago go diragalela Juda le Jerusalema ke ye:
2 Mehleng ya bofelo,Thaba yeo ntlo ya JehofaE lego go yona e tla tiišwa ka godimo ga dithaba tše dingweGomme e tla ba e telele go feta meboto,Batho ba ditšhaba ka moka ba tla kgobokana go yona.
3 Ditšhaba tše dintšhi di tla ya go yona tša re:
“Etlang re rotogeleng thabeng ya JehofaLe ntlong ya Modimo wa Jakobo.
O tla re ruta ditsela tša gagweGomme re tla sepela ka tsela yeo a e nyakago.”
Ka gobane molao o tlo tšwa Tsione,Gomme lentšu la Jehofa la tšwa Jerusalema.
4 O tla ahlola ditšhabaGomme a lokiša ditaba le ditšhaba tše dintšhi.
Batho ba tla fetoša disabola tša bona ba di dira megomaGomme marumo a bona ba a dira disekela.
Setšhaba se ka se lwe le setšhaba se sengwe,E bile batho ba ka se sa hlwa ba ithuta go lwa.
5 Lena ditlogolwana tša Jakobo,Etlang re sepeleng seetšeng sa Jehofa.
6 Ka gobane wena Modimo o lahlile batho ba gago, e lego ditlogolwana tša Jakobo.Ka ge ba ekiša mekgwa e mentšhi ya batho ba ka Bohlabela.Ba dira dilo tša boloi go swana le Bafilisita,Gomme mo go bona go tletše bana ba batho bao ba tšwago dinageng tše dingwe.
7 Naga ya bona e tletše ka silifera le gauta,Gomme mahumo a bona ke maphaaphaa.
Naga ya bona e tletše dipereE bile ba na le dikariki tše dintšhintšhi.
8 Naga ya bona e tletše medimo yeo e se nago mohola.
Ba khunamela dilo tšeo ba di dirilego ka diatla tša bona,E lego tšona dilo tšeo ba di dirilego ka menwana ya bona.
9 Batho ba a inyatšiša gomme ba a kokobetšwa,E bile o ka se ba swarele.
10 Tsenang ka maweng gomme le utameng,Ka baka la bogale bja Jehofa bjo bo tšhošagoLe bogolo bja gagwe bjo bo makatšago.
11 Batho bao ba ikgogomošago ba tla kokobetšwa,Batho bao ba ikgantšhago ba tla inama ba fentšwe.
Jehofa ke yena feela a tlago go godišwa letšatšing leo.
12 Ka gobane ke letšatši la Jehofa wa madira.
Le tlela batho ka moka bao ba ikgantšhago le bao ba ikgogomošago.Le tlela batho ka moka, go sa šetšwe gore ke ba maemo a godimo goba a tlasana.
13 Le tlela le mehlare ka moka e megolo le e metelele ya metsedara ya Libanoni,Le mehlare e megologolo ya Bashani.
14 Le tlela le dithaba ka moka tše ditelele,Le meboto ka moka e megolo.
15 Le tlela meago ka moka e meteleletelele le maboto ka moka a tiilego.
16 Le tlela le dikepe ka moka tša Tarashishi,Le diketswana ka moka tše dibotse.
17 Batho bao ba ikgogomošago ba tla kokobetšwaGomme bao ba ikgantšhago ba tla nyatšega.
Jehofa ke yena feela a tlago go godišwa letšatšing leo.
18 Medimo yeo e se nago mohola e tla hwelela sa ruri.
19 Batho ba tla tsena ka mawengLe ka mekoting,Ka baka la bogale bja Jehofa bjo bo tšhošago,Le bogolo bja gagwe ge a dira gore lefase le thothomeleLe ge a dira gore batho ba boife.
20 Letšatšing leo batho ba tla tšea medimo ya bona ya go hloka mohola ya silifera le ya gauta,Yeo ba e dirilego gore ba e rapele,Gomme ba e lahlela magotlo le bomankgagane.
21 E le gore ba tsene ka mawengLe mengeng ya matlapa,Ka baka la bogale bja Jehofa bjo bo tšhošagoLe bogolo bja gagwe bjo bo makatšago,Ge a dira gore lefase le thothomele le ge a dira gore batho ba boife.
22 Tlogelang go tshepa motho wa nama le madi,Yo go nyakegago gore a heme gore a phele.
Goreng a swanetše go tšeelwa godimo?
