Jesaya 23:1-18
-
Molaetša wa mabapi le go ahlola Tiro (1-18)
23 Molaetša wo o lego mabapi le go ahlola Tiro šo:
Lena banna bao ba lego ka dikepeng tša Tarashishi,
Llang gabohloko ka gobane boemakepe bo sentšwe, ga go na motho yo a ka kgonago go tsena go bjona.
Le kwele taba yeo e etšwa nageng ya Khithima.
2 Homolang, lena badudi ba nageng yeo e lego kgauswi le lewatle,
Barekiši bao ba tšwago Sidone, bao ba tshelago lewatle, ba dirile gore le hume.
3 Ba tshedišitše mabele a Shihoro ka dikepe meetseng a mantšhi,Le dilo tšeo ba di bunnego tikologong ya Nile, e lego lehumo la naga ya Tiro.Naga ye e dirile gore ditšhaba di dire tšhelete.
4 Hlabja ke dihlong wena Sidone, wena motse wo o šireleditšwego wo o lego kgauswi le lewatle,Ka gobane lewatle le itše: “Ga se ka ka ka ba le dihlabi tša go belega,
E bile ga se ka belega,Le gona ga se ka godiša masogana le ge e le dikgarebe.”
5 Go no swana le ge batho ba ile ba kwa bohloko ka dilo tšeo ba di kwelego mabapi le Egepeta,Ka mo go swanago, ba tla kwa bohloko kudu ge ba ekwa ka Tiro.
6 Tshelelang Tarashishi,
Llang gabohloko lena badudi ba naga yeo e lego kgauswi le lewatle.
7 Na wo ke motse wa lena wo go tloga kgale o bego o thabile, e lego go tloga ge o be o thoma go ba gona?
Badudi ba wona ba ile ba ya go yo dula dinageng tša kgole.
8 Ke mang yo a logetšego Tiro maano a,Yena yo a kgethago dikgoši,Yoo barekiši ba gagwe e bego e le dintona,Yoo borakgwebo ba gagwe ba bego ba hlomphega lefaseng ka moka?
9 Jehofa wa madira ke yena a logilego maano a,Gore a dire gore Tiro e se sa ikgantšha ka baka la botse bja yona,Le go tlontlolla batho ka moka bao ba bego ba hlomphega lefaseng ka moka.
10 Lena batho ba Tarashishi, phatlalalang nageng go swana le Noka ya Nile.
Ga go sa na boemakepe.
11 Jehofa o otlolletše letsogo la gagwe godimo ga lewatle,O šikintše mebušo.
O ntšhitše taelo mabapi le Fenikia gore metse ya yona yeo e šireleditšwego e fedišwe.
12 Le gona o re: “Lena batho ba Sidone bao ba gateletšwego,Le ka se sa thaba.
Emang le tsheleleng Khithima.
Le gona moo le ka se kgone go khutša.”
13 Bonang! Ye ke naga ya Bakaladea.
Batho ba setšhaba se ke bona ba dirilego gore Tiro go dule diphoofolo,Ga se Baasiria bao ba dirilego seo.
Ba agile maboto ao a šireletšago motse,Ba phušotše dintlo tša bona tšeo di šireleditšwego,Ba dira gore e šale e le marope.
14 Lena banna bao le lego ka dikepeng tša Tarashishi, llang gabohloko,Ka gobane motse wa lena wo o šireleditšwego o sentšwe.
15 Letšatšing leo, batho ba tla lebala Tiro ka mengwaga e 70, e lego mengwaga yeo e lekanago le yeo kgoši e tee e e fetšago e phela. Ge mengwaga e 70 e fela, Tiro e tla swana le mogweba-ka-mmele yo go opelwago ka yena ge go thwe:
16 “Wena mogweba-ka-mmele yo a lebetšwego ke batho ka moka,
Tšea harepa gomme o dikologe motse.Letša harepa ya gago ka bothakga,Opela dikoša tše dintšhi e le gore batho ba go gopole.”
17 Ge mengwaga e 70 e fela, Jehofa o tla gopola Tiro. Yona e tla boela ya dira tšhelete go swana le mathomong, gomme ya gweba ka mmele le mebušo ka moka ya lefase.
18 Eupša tšhelete le mahumo a yona di tla fetoga dilo tše kgethwa go Jehofa. E ka se di boloke goba ya di beela ka thoko. Ka gobane di tla newa bao ba dulago pele ga Jehofa, e le gore ba je ba be ba khore le go apara diaparo tša botšhepi.
