Jesaya 39:1-8
-
MBanna bao ba tšwago Babilona (1-8)
39 Ka nako yeo kgoši ya Babilona e lego Merodaka-baladani morwa wa Baladani, o ile a romela banna gore ba iše mangwalo le mpho go Hesekia, ka gobane o be a kwele gore o be a babja gomme a fodile.
2 Ka gona Hesekia a amogela banna bao ka lethabo, gomme a ba bontšha mahumo a ntlong ya gagwe ka moka, e lego silifera, gauta, makhura ao a bitšwago balesamo le makhura a mangwe a go nkga bose, lefelo leo go bolokelwago dibetša le dilo ka moka tšeo di bego di le mo go bewago dilo tša gagwe tše bohlokwa. Go be go se gwa šala selo seo Hesekia a bego a se a ba bontšha sona ntlong ya gagwe le mmušong wa gagwe ka moka.
3 Ka morago ga moo moporofeta Jesaya a tla go Kgoši Hesekia gomme a mmotšiša a re: “Banna bale ba tšwa kae, le gona ba rile’ng go wena?” Hesekia a re: “Ba tšwa nageng ya kgole, e lego Babilona.”
4 Ke moka Jesaya a botšiša a re: “O ba bontšhitše’ng ka ntlong ya gago?” Hesekia a re: “Ke ba bontšhitše dilo ka moka tšeo di lego ka ntlong ya ka. Ga go na selo seo ke sego ka ba bontšha sona mahumong a ka.”
5 Bjale Jesaya a re go Hesekia: “Ekwa gore Jehofa wa madira o reng. O re:
6 ‘Tseba gore go tla matšatši ao dilo ka moka tšeo di lego ka ntlong ya gago le tšeo borakgolokhukhu ba gago ba di bolokilego go fihla lehono di tlago go išwa Babilona, go ka se šale selo.’ Jehofa o boletše seo.
7 ‘E bile tše dingwe tša ditlogolwana tša gago tšeo di sa tlago go belegwa, di tla tšewa gomme ya ba dintona ka mošate wa kgoši ya Babilona.’”
8 Ke moka Hesekia a re go Jesaya: “Molaetša wo o mpoditšego wona wo o tšwago go Jehofa ke o mobotse.” A ba a re: “Ka gobane go tla dula go na le khutšo le boiketlo ge ke sa dutše ke phela.”
