Jesaya 41:1-29
41 “Lena dihlakahlaka, theetšang mantšu a ka le homotše,Lena ditšhaba, ebang le matla gape.
Mpatameleng gomme le bolele le nna.
A re kopaneng gore ke tle ke le ahlole.
2 “Ke mang yo a biditšego motho go tšwa ka bohlabela?Ke mang yo a mmileditšego go yena gore a tle a dire toka?Ke mang yo a mo fago ditšhabaLe go mo dira gore a fenye dikgoši?
Ke mang yo a di phatlaladitšego bjalo ka lerole pele ga sabola ya gagwe,Le yo a dirago gore di be bjalo ka mooko wo o tšewago ke moya pele ga bora bja gagwe?
3 O a di rakediša, e bile ga go na selo seo se mo thibelagoDitseleng tšeo a sa kago a sepela go tšona.
4 Ke mang yo a dirilego se,Yo a bitšago meloko go tloga mathomong?
“Ke nna Jehofa, ke Modimo wa pele,E bile nka se fetoge le go fihlela go moloko wa mafelelo.”
5 Dihlakahlaka di bone seo se diregago gomme tša boifa.
Bao ba dulago moo lefase le felelago gona ba ile ba thoma go thothomela.
Batho ba ile ba kgobokana.
6 Batho ba a thušana,Gomme ba botšana gore: “Tiang matla.”
7 Ke moka setsebi sa mošomo wa diatla se matlafatša motho yo a šomago ka tšhipi,Yo a batalatšago tšhipi ka hamola,O matlafatša yo a kobollago ditšhipi selong sa go kobolla ditšhipi,
Gomme o bolela ka tšhipi yeo e tšhumeletšwego o re: “E botse.”
Ke moka o e kokotela ka dipikiri gore e se ke ya wa.
8 Eupša wena Isiraele,Wena Jakobo, o mohlanka wa ka yo ke mo kgethilego,O setlogolo sa Aborahama mogwera wa ka.
9 Wena yo ke go tšerego mo lefase le felelago gona,E bile ke go biditše go tšwa dikarolong tša kgole tša lefase.
Ke rile go wena: ‘O mohlanka wa ka,Ke go kgethile gomme ga se ka go gana.
10 O se ke wa tšhoga, ka gobane ke na le wena.
O se ke wa tshwenyega, ka gobane ke Modimo wa gago.
Ke tla go matlafatša. Ruri ke tla go thuša!Ke tla go swara ka go tiiša ka seatla sa ka sa le letona seo se dirago dilo tšeo di lokilego.’
11 “Tseba gore batho ka moka bao ba go galefelago ba tlo hlabišwa dihlong gomme ba kokobetšwa.
Bao ba lwago le wena ba tla fetošwa lefeela gomme ba fedišwa.
12 O tla nyaka batho bao ba lwago le wena, eupša o ka se ba hwetše.Batho bao ba lwago le wena ba tlo hwelela ba ba bjalo ka ge eka ga se ba ka ba ba gona.
13 Ka gobane nna Jehofa Modimo wa gago ke go swara ka seatla sa gago sa le letona,Ke nna ke rego go wena: ‘O se ke wa tšhoga. Ke tla go thuša.’
14 “O se ke wa tšhoga, wena Jakobo yo a sa kgonego go itwela,*Lena batho ba Isiraele ke tla le thuša.” Ke nna Jehofa ke bolelago seo, nna yo a tlago go le rekolla, Mokgethwa wa Isiraele.
15 “Tseba gore ke go dirile selei sa go fola mabele,Selei se seswa sa go fola seo se nago le meno ka mahlakoreng ka bobedi.
O tla gatakela dithaba wa di pšhatlaganya,Gomme meboto o tla e fetoša ya swana le mooko.
16 O tla di ološa go swana le mabeleGomme tša tšewa ke phefo,Ledimo lona le tla di iša kua le kua.
Ge e le wena o tla thabela Jehofa.O tla ikgantšha ka Mokgethwa wa Isiraele.”
17 “Bahlaki le badiidi ba nyaka meetse, eupša ga a gona.
Maleme a bona a omišitšwe ke lenyora.
Nna Jehofa ke tla ba araba.
Nna Modimo wa Isiraele nka se ba tlogele.
18 Ke tla dira gore dinoka di elele mebotong yeo e sa melego selo,Gomme ka dira gore go be le didiba melaleng.
Ke tla dira gore lešokeng go be le letamo la meetse leo le nago le mahlaka,Ka dira gore naga yeo e se nago meetse e be le didiba.
19 Lešokeng ke tla bjala mohlare wa motsedara,Wa mošwana, wa momirite* le wa mophaene.
Leganateng ke tla bjala mohlare wa mojunipere,Wa mopalatane gotee le wa mosiprese,
20 E le gore batho ka moka ba bone, e bile ba tsebe,Le gore ba kwe e bile ba kwešišeGore seatla sa Jehofa ke sona se dirilego dilo tše,Le gore Mokgethwa wa Isiraele ke yena a di bopilego.”
21 Jehofa o re: “Hlalosang taba ya lena.”
Kgoši ya Jakobo e re: “Ntšhang mabaka a lena.”
22 “Tlišang bohlatse gomme le re botšeng dilo tšeo di tlago go direga.
Re botšeng dilo tšeo di diregilego nakong e fetilego,Gore re naganišiše ka tšona gomme re tsebe seo se tlogo direga mabapi le tšona.
Goba re botšeng le dilo tšeo di sa tlago.
23 Re botšeng gore bokamoso bo re swaretše eng,E le gore re tsebe gore ke lena medimo.
Dirang se sengwe, e ka ba sebotse goba se sebe,E le gore re tlabege ge re se bona.
24 Bonang! Ga le na moholaE bile seo le se dirago ke lefeela,
Motho le ge e le ofe yo a kgethago go le rapela o a šišimiša.
25 Ke biditše motho yo a tšwago ka leboa gomme o tla tla.O tla bitša leina la ka a etšwa ka bohlabela.
O tla gatakela dintona bjalo ka ge eka ke letsopa,Le go swana le ge motho yo a bopago ka letsopa a gatakela letsopa le le thapilego.
26 Ke mang yo a boletšego dilo go tloga mathomong, gore re tsebe,Goba ke mang yo a boletšego go tloga nakong e fetilego, mo re ka rego: ‘O bolela nnete’?
Ruri ga go na yo a boletšego seo,
Ga go na yo a se phatlaladitšego,
Ga go na yo a kwelego selo go tšwa go lena.”
27 Ke bile wa mathomo wa go botša Tsione gore: “Bonang dilo tšeo di tlago go direga!”
Ke tla romela motho yo a tlago go tliša ditaba tše dibotse Jerusalema.
28 Eupša ke ile ka tšwela pele ke lebeletše gomme go be go se na motho,Mo gare ga bona go be go se na motho yo a ka neago keletšo.
Ke ile ka fela ke ba botšiša e le gore ba mphetole.
29 Bonang! Ka moka ga bona ga se selo.
Dilo tšeo ba di dirago ke lefeela.
Medimo ya bona ya diswantšho ke moya feela e bile ga e na mohola.
Mengwalo ya tlase
^ Phetolelo ya lentšu ka lentšu e re, “yo e lego sebokwana.”
^ Wo ke mohlašana wo o nago le matlakala a phadimago le mapolomo a mašweu a go nkga bose.
