Jesaya 66:1-24
66 Jehofa o re: “Magodimo ke setulo sa ka sa bogoši,
Gomme lefase ke moo dinao tša ka di gatago gona.
Ka gona e kae ntlo yeo le ka nkagelago yona,Le gona le kae lefelo leo nka khutšago go lona?”
2 “Seatla sa ka ke sona se dirilego dilo tše ka moka,Gomme ka moka di bile gona ka wona mokgwa woo,” o realo Jehofa.
“Ka gona, motho yo ke tlago go mo lebelela ke yo a ikokobeditšego le yo a kwelego bohloko,Le yo a hlomphago lentšu la ka ka mo go tseneletšego.
3 Motho yo a hlabago poo, o swana le yo a bolayago motho.
Yo a dirago sehlabelo ka nku, o swana le yo a robago mpša molala.
Yo a tlišago mpho, o swana le yo a tlišago madi a kolobe.
Yo a fišago seorelo, o swana le yo a šegofatšago a diriša mantšu a boradia.
Ba ke batho bao ba kgethilego ditsela tša bona,E bile ba kgahlwa ke dilo tše di šišimišago.
4 Ka gona, ke tla kgetha gore ke ba otla bjang,Le gona tšona dilo tšeo di ba tšhošago, ke tla ba tlišetša tšona.
Ka gobane ge ke be ke bitša, ga go na yo a ilego a araba.Ge ke be ke bolela, ga go na yo a ilego a theetša.
Ba ile ba no tšwela pele ba dira dilo tše mpe mahlong a ka,Gomme ba kgetha go dira dilo tšeo di sa nthabišego.”
5 Ekwang lentšu la Jehofa, lena bao le hlomphago ka mo go tseneletšego lentšu la gagwe, ge a re:
“Banababo lena bao ba le hloilego le go le kgetholla ka baka la leina la ka, ba ile ba le gegea ba re: ‘Anke Jehofa a tumišwe!’
Fela o tla tšwelela go lena gomme a dira gore le thabe,Eupša bona ba tla hlabja ke dihlong.”
6 Go na le modumo wa mpherefere o tšwago motseng, e lego modumo wo o tšwago tempeleng!
Ke modumo wa Jehofa ge a otla manaba a gagwe ka seo se a swanetšego.
7 Pele Jerusalema e šokwa, e ile ya belega.
Pele e ka tlelwa ke bohloko bja pelego, e ile ya ba e šetše e belege ngwana wa mošemane.
8 Ke mang yo a kilego a kwa ka selo sa mohuta wo?
Ke mang yo a bonego dilo tša go swana le tše?
Na naga e ka belegwa ka letšatši letee?
Goba na setšhaba se ka belegwa ka nako e tee?
Eupša e rile gateetee ge Tsione e thoma go šokwa, e ile ya belega bana ba yona ba bašemane.
9 Jehofa Modimo wa gago o re: “Na nka dira gore ngwana a re a le kgauswi le go belegwa a se ke a belegwa?”
Goba na nka re ke dirile gore motho a thome go belega, ka tswalela popelo ya gagwe?”
10 Thabang le Jerusalema le be le thakgale le yona, lena ka moka bao le e ratago.
Thabang kudu le yona, lena ka moka bao le e llelago.
11 Go no swana le ge mma a nyantšha ngwana wa gagwe go fihlela a kgotsofetše, le Jerusalema e tla le hlokomela.Le tla kgotsofala gomme la thaba kudu, ka gobane Jerusalema e tla be e tagafaditšwe.
12 Jehofa o re:
“Ke e nea khutšo yeo e tlago go swana le noka yeo e elelago,Gomme e tla tagafatšwa ke mahumo a ditšhaba, go no swana le moedi wo o elelago.
Le tla anya gomme la kukwa lethekeng,E bile le tla bapadišwa diropeng.
13 Go no swana le mma yo a homotšago morwa wa gagwe,Le nna ke tla dula ke le homotša.Le tla homotšwa ka baka la Jerusalema.
14 Le tla bona se e bile dipelo tša lena di tla thaba,Le tla phela gabotse go swana le bjang bjo botala.
Jehofa o tla dira gore bahlanka ba gagwe ba bone seatla sa gagwe,Eupša o tla otla manaba a gagwe.”
15 “Ka gobane Jehofa o tla tla bjalo ka mollo,E bile dikariki tša gagwe tša ntwa di swana le ledimo le matla,O tla tla e le gore a ba otle a tuka bogale,Gomme kgalemelo ya gagwe e tlo ba bjalo ka kgabo ya mollo.
16 Ruri Jehofa o tlo tliša kahlolo a diriša mollo,O tla ahlola batho ka moka a diriša lerumo la gagwe,Bao ba bolailwego ke Jehofa e tla ba ba bantšhi.
17 Jehofa o re: “Bao ba ikgethagatšago le bao ba itlhwekišago gore ba ye mašemong a makgethwa, bao ba jago dinama tša dikolobe, magotlo le dilo tše dingwe tšeo di šišimišago, ka moka ga bona ba tla fedišwa.
18 Ka ge ke tseba dilo tšeo ba di dirago le dilo tšeo ba di naganago, ke a tla e le gore ke kgoboketše batho ba ditšhaba ka moka le ba maleme ka moka, gomme bona ba tla tla ba bona letago la ka.”
19 “Ke tla dira selo se bohlokwa seo ba tlago go se bona. Ke tla romela ba bangwe ba bao ba phonyokgilego ditšhabeng, ka ba romela go bao ba nago le bokgoni bja go nganga bora, e lego batho bao ba lego Tarashishi, Pule le Ludi, ka ba ka ba romela le Tubala le Jafane, e lego dihlakahlaka tša kgole. Ke tla ba romela ditšhabeng tšeo di sa kago tša kwa ka nna goba tša bona letago la ka. Ruri ba tla bolela letago la ka ditšhabeng.
20 Ba tla tliša banababo lena ka moka bao ba tšwago ditšhabeng ka moka gore e be mpho go Jehofa. Ba tla tla ba nametše dipere, dikariki, dimeila le dikamela tšeo di nago le lebelo, ba rotogela thabeng ya ka e kgethwa, e lego Jerusalema, go no swana le ge Baisiraele ba tliša mpho ka sebjaneng seo se hlwekilego ntlong ya Jehofa,” o realo Jehofa.
21 Le gona Jehofa o re: “Ke tla tšea le ba bangwe go bona gore e be baperisita le gore e be Balefi.
22 Go no swana le ge magodimo a maswa le lefase le leswa tšeo ke di di dirago di tla dula di le gona, le bana ba lena le leina la lena di tla dula di le gona,” o realo Jehofa.
23 “Batho ka moka ba tla tla ba khunama pele ga ka,Ba tla dula ba dira bjalo kgwedi e nngwe le e nngwe le beke e nngwe le e nngwe,”* o realo Jehofa.
24 “Ba tla tšwa gomme ba yo bogela ditopo tša banna bao ba bego ba sa nyake go nkwa,Ka gobane diboko tšeo di lego go ditopo tšeo di ka se hweGomme le mollo wa tšona o ka se time,E bile di tla feroša batho ka moka dibete.”
Mengwalo ya tlase
^ Phetolelo ya lentšu ka lentšu e re, “ba dira bjalo go tloga ngweding o moswa go ya go o mongwe, le go tloga sabatheng e nngwe go ya go e nngwe.”
