Lefitiko 5:1-19
5 “‘Ge e ba motho a bone motho yo mongwe a dira sebe, goba a tseba ka sebe seo, gomme a kwa gore go nyakega dihlatse tša sebe seo, ke moka yena a se ye go hlatsela taba yeo, gona o tlo ba le molato e bile o tlo ikarabela ka molato woo wa gagwe.
2 “‘Goba ge e ba motho a ka kgwatha selo le ge e le sefe seo se sa hlwekago, e ka ba e le phoofolo ya naga yeo e sa hlwekago yeo e hwilego, goba seruiwa seo se sa hlwekago seo se hwilego, goba diphedi tše dinyenyane* tšeo di sa hlwekago tše di hwilego, gona motho yoo o šilafetše e bile o na le molato le ge a sa tsebe seo.
3 Goba ge e ba motho a ka kgwatha ditšhila tše di tšwago mothong a sa lemoge seo, goba a kgwatha motho yo a sa hlwekago goba selo seo se sa hlwekago seo se ka mo dirago gore a šilafale, gomme a tseba ka taba yeo, gona o na le molato.
4 “‘Goba ge e ba motho a ka ena a sa nagana ka go bolela gore o tlo dira selo se sebotse goba se sebe mabapi le selo le ge e le sefe gomme a be a sa tsebe seo, eupša ka morago a tla a lemoga gore o enne a sa nagana, gona o na le molato.
5 “‘Ge e ba motho a ka ba molato ka se sengwe sa dilo tše, gona a bolele gore o dirile sebe seo bjang.
6 Le gona a tlišetše Jehofa sebego sa gagwe sa molato bakeng sa sebe seo a se dirilego. A tliše nku e tshadi goba putšanyana e tshadi gore e be sebego sa sebe. Ke moka moprisita o tla dira sehlabelo ka phoofolo yeo e le gore Modimo a mo lebalele sebe sa gagwe.
7 “‘Eupša ge e ba a sa kgone go tliša nku, gona sebego sa gagwe sa molato wa sebe se a se dirilego seo a tlago go se nea Jehofa e be maeba a mabedi a nageng goba maebana a mabedi. Le lengwe e be la sebego sa sebe, gomme le lengwe e be la sebego sa go fišwa.
8 A a tliše go moperisita ke moka yena o tla thoma pele ka go neela la sebego sa sebe, gomme a sege molala wa lona karolong ya lona ya ka pele, eupša a se ke a le kgaola hlogo.
9 A foketše a mangwe a madi a sebego sa sebe ka thoko ga aletare, eupša ao a šetšego a a tšhollele fase kgauswi le aletare. Ke sebego sa sebe.
10 Moperisita a tšee leebana le lengwe e be la sebego sa go fišwa gomme a dire seo go ya le kamoo dibego tša go fišwa di dirwago ka gona. Moperisita o tla neela leebana leo e le gore Modimo a mo lebalele sebe sa gagwe.
11 “‘Bjale ge e ba a sa kgone go tliša maeba a mabedi a nageng goba maebana a mabedi, gona a tliše folouru yeo e šitšwego gabotse ka sebjana sa dilithara tše pedi gore e be sebego sa sebe sa gagwe seo a se dirilego. A se ke a e tšhela makhura goba go bea seorelo godimo ga yona ka gobane ke sebego sa sebe.
12 A e tliše go moperisita gomme mo go yona a ntšhe ya go tlala seatla e le gore Modimo a dule a gopola sebego seo ka moka. Ke moka a e beše e thunye muši aletareng godimo ga dibego tša Jehofa tšeo di fišwago ka mollo. Ke sebego sa sebe.
13 Moperisita o tla e neela ka tsela yeo e le gore Modimo a lebalele motho yoo sebe sa gagwe, a mo direle sehlabelo ka baka la sebe le ge e le sefe sa tšeo go boletšwego ka tšona, gomme Modimo o tla mo lebalela. Sebego seo se šetšego e tla ba sa moperisita go swana le ge go dirwa ka sebego sa mabele.’”
14 Jehofa a tšwela pele a bolela le Moshe a re:
15 “Ge e ba motho a ka se botegele Modimo ka go dira sebe ka phošo mabapi le dilo tše kgethwa tša Jehofa, gona a tlišetše Jehofa nku e tona yeo e phetšego gabotse e le sebego sa gagwe sa molato. Moperisita o tla bolela gore nku yeo e tla ba bokae ge e rekwa ka tšhelete ya silifera. Tšhelete yeo e swanetše go kalwa go ya ka tsela ya go kala tšhelete ya lefelong le lekgethwa.
16 Ke moka o swanetše go patela tšhelete yeo e lekanago dilo tše kgethwa tšeo a dirilego sebe mabapi le tšona, e bile a oketše ka karolo ya bohlano ya tšhelete yeo. O tla e nea moperisita e le gore yena a mo direle sehlabelo ka nku yeo ya sebego sa sebe, ke moka Modimo o tla mo lebalela sebe sa gagwe.
17 “Ge e ba motho a ka dira sebe ka go dira se sengwe sa dilo tšeo Jehofa a laetšego gore re se ke ra di dira, le ge a be a sa tsebe, gona o na le molato gomme o tla otlwa ka baka la molato wa gagwe.
18 A tliše nku e tona e phetšego gabotse go moperisita gore e be sebego sa sebe, nku yeo e be ya tšhelete yeo e boletšwego ke moperisita. Ke moka moperisita a mo direle sehlabelo ka baka la sebe seo a se dirilego ka phošo a sa tsebe, gomme Modimo o tlo mo lebalela sebe seo sa gagwe.
19 Ke sebego sa molato. O na le molato wa go direla Jehofa sebe.”
Mengwalo ya tlase
^ Go bonala mo go bolelwa ka diphedi tše dinyenyane tšeo di phelago gotee ka dihlopha.
