Mmoledi 6:1-12
6 Go na le selo se sengwe seo se kwešago bohloko seo ke se bonego mo lefaseng, e bile batho ba se tlwaetše.
2 Ke gore Modimo wa nnete o nea motho mahumo le dilo tše bohlokwa le letago, e le gore a se hloke selo seo a se kganyogago. Lega go le bjalo, Modimo wa nnete ga a dire gore a di thabele, eupša o dumelela motho yo a sa tsebjego gore a di thabele. Se ke lefeela e bile se kweša bohloko kudu.
3 Ge motho a ka ba tatago bana ba lekgolo, gomme a phela nako e telele a ba a tšofala, eupša a sa ipshine ka dilo tša gagwe tše dibotse pele a hlokofala, ruri o phalwa ke lesea leo le belegwago le hlokofetše.
4 Ka gobane le belegetšwe lefeela. Go bjalo ka ge eka le hwetše leswiswing e bile ga le na leina.
5 Le ge lesea leo le se la ka la bona letšatši goba la tseba selo, eupša le sa phala motho yoo.
6 Go hola’ng gore motho a phele mengwaga e 2 000 (dikete tše pedi) eupša a se a thaba? Na ka moka ga bona ge ba ehwa ga ba ye felo gotee?
7 Motho o šoma ka thata gore a kgone go ja eupša ga a kgotsofale.
8 Ke’ng seo motho yo bohlale a phalago setlaela ka sona? Gona modiidi o hola ka’ng ge a kgona go iphediša?
9 Go kaone go thabela seo o se bonago go feta go kganyoga dilo tšeo o ka se di hwetšego. Se le sona ke lefeela le go kitimiša phefo.
10 Selo se sengwe le se sengwe seo se lego gona, Modimo o be a šetše a se file leina. E bile go a tsebega gore motho ke eng gomme a ka se kgone go ganetša yoo a mo fetago ka matla.
11 Go bolela mantšu* a mantšhi ke ga lefeela, e bile ga go hole motho ka selo.
12 Ke mang yo a tsebago gore motho o swanetše go dira’ng matšatšing a mmalwa a bophelo bja gagwe bja lefeela, ao a fetago bjalo ka moriti? Gona ke mang yo a ka botšago motho gore go tlo direga’ng mo lefaseng ka morago ga ge a hwile?
Mengwalo ya tlase
^ Goba mohlomongwe, “dilo.”
