Beibele e boletše e sa le pele gore nako yeo re phelago go yona e tla tlala ka dintwa, ditšhišinyego tša lefase, leuba la malwetši le “dilo [tše dingwe] tše di boifišago.” (Luka 21:10, 11) Mantšu ao a boporofeta a ile a tšwela pele a phethagala le ngwageng wa tirelo wa 2022. a Ka mohlala, ntwa ya Ukraine e ile ya kgatlampana e sa kgaotše gomme e ama maphelo a ba bantši. Dinaga tše dintši tša lefase tšeo di bego di hlasetšwe ke leuba la bolwetši bja COVID-19 di be di sa thoma go bona bokaone. Go oketša moo, batho ba bantši ba amilwe ke dikotsi tša tlhago, tše bjalo ka ditšhišinyego tša lefase kua Haiti le madimo a mašoro Bogareng bja Amerika, Philippines le ka borwabohlabela bja Afrika. Na Dihlatse tša Jehofa di ile tša thuša bjang bao ba amegilego?

 Ngwageng wa tirelo wa 2022 mokgatlo wa rena o ile wa hlakodiša batho bao ba amilwego ke dikotsi tša tlhago tšeo e ka bago tše 200! Tšhelete yeo re e šomišitšego ka moka bakeng sa tlhakodišo ke mo e ka bago ditolara tše dimilione tše 12. b Bona kamoo meneelo e ilego ya šomišwa ka gona go thuša batho bao ba amilwego ke dikotsi tše pedi tša mohuta woo.

 Ka di-14 tša August 2021 go bile le tšhišinyego ya lefase ya boima bja 7.2 ka borwa Haiti. Ka manyami Dihlatse tše tharo di ile tša hlokofala—dikgaetšedi tša rena tše pedi le ngwanabo rena. Bao ba ilego ba phologa ba ile ba šala le dintho mebeleng le maikwelong tše di bakilwego ke tšhišinyego yeo. Ngwanabo rena yo a bitšwago Stephane o re: “Go hlokofetše batho ba bantši kudu mo toropong moo go bego go bile go swarwa dipoloko tše mmalwa beke e nngwe le e nngwe lebaka la go feta dikgwedi tše pedi.” Ngwanabo rena yo mongwe yo a bitšwago Éliézer o re: “Dihlatse tše dintši di be di se na magae, di se na diaparo, di se na dieta, di se na le dilo tše dingwe tšeo ba di hlokago letšatši le letšatši. Batho ba bantši ba be ba phela ba tšhogile ka dikgwedikgwedi ka baka la ditšhišinyego tše dingwe tše dinyenyane tšeo di latelanago ka morago ga ya mathomo ye kgolo, tšeo di bego di sa kgaotše.”

 Mokgatlo wa rena o ile wa thuša ka lebelo. Lekala la Haiti le ile la neela ka ditone tše 53 tša dijo, gotee le ditente, diseila, materase le ditšhatšara tša go tšhatšiša ka letšatši tša difounu. Godimo ga moo, ngwageng wa tirelo wa 2022 go agilwe leswa goba gona go lokišwa magae a ka godimo ga a 100. Go šomišitšwe tšhelete ya ka godimo ga ditolara tše milione modirong wa tlhakodišo.

 Bana babo rena le dikgaetšedi ba leboga kudu. Lorette o re: “Tšhišinyego yeo e sentše ngwako wa rena le kgwebo mo e lego gore ga se gwa šala le selo. Re be re se na le tša go ja. Eupša mokgatlo wa Jehofa o ile wa re thekga, o re fa sohle seo se bego se nyakega.” Micheline o re: “Tšhišinyego ye e sentše ntlwana ya rena moo nna le barwa baka ba babedi re bego re dula gona. Ke be ke se na le se nka se dirago ka ntle le go no rapelela thušo, gomme Jehofa o ile a nkaraba a diriša mokgatlo wa gagwe. Bjale re dula ka ngwakong wo o emego gabotse. Ke ikemišeditše go dira sohle seo nka se kgonago go bontšha gore ke leboga Jehofa.”

 Maiteko a rena a go hlakodiša batho a be a bonwa le ke balaodi ba mmušo ba lefelo. Molaodi wa holo ya toropong ya L’Asile o itše: “Le šomile gabotse ka go re phalalela. Ke le ratela gore le hlompha balaodi kudu. Le nkgahlela le gore ga le rate tšhelete. Go e na le moo, le nyaka go thuša batho. Le tutuetšwa ke lerato.”

 Ka di-24 tša January 2022, Ledimo le Legolo leo le bitšwago Ana le ile la hlagela Mozambique ke moka la fetela ka bodikela la tsena Malawi. Ledimo leo le ile la tliša dipula tše dikgolo le diphefo tše matla tša go tšutla go fihla go dikhilomithara tše 100 ka iri. Le ile la wiša dipala tša mohlagase, la phušula maporogo gomme la baka le mafula a magolo.

 Ledimo le amile Dihlatse tša ka godimo ga tše 30 000 kua Malawi le Mozambique. Charles, e lego ngwanabo rena yo mongwe yo a bego a thuša modirong wa tlhakodišo o re: “Ge ke be ke bona mašuana a bana babo rena le bogolo bja tahlegelo yeo e ba wetšego, ke ile ka ikwa ke kgaoga pelo kudu le go nolega moko.” Maemo a ile mpefala le go feta ge dijo tša bona le merogwana yeo ba bego ba e lemile di be di gogolegile ka moka. Ba bantši ba lahlegetšwe ke magae a bona. Ka manyami, ngwanabo rena yo mongwe o ile a lahlegelwa ke mosadi wa gagwe le barwedi ba gagwe ba babedi ba banyenyane, bao ba ilego ba kgangwa ke meetse ge seketswana sa go hlakodiša batho seo ba bego ba se nametše se menoga.

 Ledimo leo le be le boifiša. Ka iri ya pele ka masa kua Nchalo, Malawi, lapa la ba ga Sengeredo ba ile ba kwa go modumo o mogolo o boifšago wa meetse ao a tlago ka lebelo. Dinoka tše pedi di be di tletše gomme di falala! Ngwanabo rena Sengeredo o ile a re ba tšwe ka ntlong. Yeo e be e le phetho e bohlale ka gore kapejana ka morago ga moo mafula ao a ile a wiša ntlo ya bona. Dilo tša bona di ile tša senyega goba tša gogolwa ke meetse. Lapa leo le la ya Holong ya Mmušo yeo ka tlwaelo ba tšeago metsotso e 30 go ya go yona ge ba sepela ka maoto. Lega go le bjalo, lebakeng le go ba tšere diiri tše pedi. Ba fihlile ba kolobile e bile ba lapile, eupša ba phologile.

 Makala a Malawi le Mozambique a ile a thoma ka modiro wa tlhakodišo ka lebelo. Ba ile ba laela balebeledi ba tikologo gore ba hlahlobe dinyakwa tša bana babo rena bao ba amegilego le go ba thuša ka dilo tša moya le go ba kgothatša. Dikomiti tša Tlhakodišo tše mmalwa di be di abetšwe go hlokomela modiro woo gomme dikomiti tšeo di ile tša thuša bana babo rena ka dijo le dinyakwa tše dingwe ka ntle le go dikadika. Tšhelete ya ka godimo ga ditolara tše 33 000 e šomišitšwe go thuša batho gomme ya ka godimo ga ditolara tše 300 000 ya dirišwa go lokiša le go aga leswa magae.

 Dikomiti tše tša Tlhakodišo di ile tša šomiša tšhelete ka bohlale, gomme seo se be se le bohlokwa kudu ka baka la koketšego ya ditheko. Ka mohlala, dikgweding tša mathomo tše šupa tša ge go dirwa modiro wo, theko ya bupi—sejo sa letšatši le letšatši sa batho ba Malawi—e ile a hlatloga mo e ka bago ka diperesente tše 70. Theko ya makhura le yona e ile ya hlatloga. Gore ba seketše tšhelete, bana babo rena ba ile ba reka dijo le dilo tša go aga kgauswi le ka bontši. Ka gona ba ile ba fokoletšwa ditheko gomme ba phema le go lefelela tšhelete e ntši kudu ya gore ba tlišetšwe dilo tšeo ba di rekilego.

 Modiro wa tlhakodišo o ile wa kgoma dipelo tša bana babo rena. Felisberto e lego ngwanabo rena wa Mozambique o re: “Ga se nke ka bona mokgatlo wo o ntšhitšego dilo tše dintši ka mokgwa wo: dilo tša go aga, dikoloi tša go rwala, batho ba go aga, dijo le tlhahlo e lerato. Modiro wo wa tlhakodišo e bile mohlala o mobotse kudu wa lerato la borwarre leo Jesu a le hlalositšego go Johane 13:34, 35.” Ester, mohlologadi yo a lego Malawi yoo ntlo ya gagwe e senyegilego o re: “Ke be ke nologile moko ka gore ke be ke se na le selo sa go aga ntlo e nngwe gape. Ka gona ge bana bešo ba etla gomme ba nkagela e nngwe, ke ile ka kwa eka ke šetše ke le Paradeiseng.”

 Ge re dutše re batamela lefase le le holofeditšwego le leswa, re letetše go bona dikotsi tša tlhago di oketšega le go feta. (Mateo 24:7, 8) Go sa šetšwe seo, re kgodišegile gore batho ba Jehofa ba tla hwetša kimologo yeo ba e hlokago, ka baka la meneelo ya lena e newago ka seatla se se bulegilego. Mekgwa ya go neela e hlaloswa go donate.ps8318.com. Re leboga seatla sa lena se se bulegilego.