Ka di-24 tša May 2022, go ile gwa direga selo se sengwe seo se kwešago bohloko kua toropong e nnyane ya Uvalde, Texas, U.S.A. Kuranta ya The New York Times e begile gore “monna yo mongwe o bolaile bana ba 19 le barutiši ba babedi ka go ba thuntšha kua sekolong sa Robb Elementary.”

 Ka manyami, ditiragalo tše bjalo tša go tšhoša di direga gantši le gantši lehono. USA Today e begile gore, “go ile gwa ba le go thuntšhwa ka makga a 249 dikolong ngwageng wa go feta. Ye e bile palo ya godimo kudu ya go begwa ka ngwaga o tee ga e sa le go tloga ka 1970.”

 Ke ka baka la’ng masetlapelo a a direga? Re ka lebeletšana bjang le ditiragalo tše tše mpe? Na bošoro bjo bo tla ka bja fela? Beibele e na le dikarabo.

•    Beibele e hlalosa mehla ya rena e le ‘mehla ya bofelo’ moo batho ba bantši “ba se nago lerato la tlhago” ba le “bogale,” e bile ba dira dilo tše sehlogo. Batho ba bjalo “ba tla fetelela ka bobe.” (2 Timotheo 3:1-5, 13) E le gore o ithute ka mo go oketšegilego ka taba ye, bala sehlogo seo se rego: “Did the Bible Predict the Way People Think and Act Today?”

 Batho ba bantši ba ipotšiša gore, ke ka baka la’ng Modimo a sa thibele masetlapelo a go swana le go thuntšhwa dikolong a direga? Gore o kwe gore Beibele e reng ka taba ye, bala sehlogo seo se rego: “Dilo tše Mpe di Diragalela Batho ba go Loka—Ka Baka La’ng?”

•    “Dilo tšohle tšeo di ilego tša ngwalwa e sa le pele di ile tša ngwalelwa go re ruta, gore ka . . . khomotšo e tšwago Mangwalong re be le kholofelo.”—Baroma 15:4.

 Melao ya motheo ya Beibele e ka go thuša go kgotlelela lefaseng le le lebe. Gore o kwe ka mo go oketšegilego, bona makasine wa Phafoga! wo o nago le sehlogo seo se rego: “Na Bošoro bo tla ka bja Fela?”

 Gore batswadi ba ka thuša bana ba bona bjang ge ba kwele goba ba bone ditaba tša go tšhoša, bala sehlogo seo se rego: “Disturbing News Reports and Your Children.”

•    “O tla lopolla moya wa bona kgatelelong le bošorong”—Psalme 72:14.

•    “Ba tla rula ditšhoša tša bona ba di dira megoma gomme marumo a bona ba a dira disekela. Setšhaba se ka se emišetše se sengwe tšhoša, e bile di ka se sa hlwa di ithuta ntwa.”—Mika 4:3.

 Modimo o tlo dira dilo tšeo batho ba palelwago ke go di dira. Mmušo wa gagwe wa legodimong o tlo fediša dibetša ka moka le bošoro ka moka. Go kwa ka mo go oketšegilego ka seo Mmušo wa Modimo o tlago go se dira, bala sehlogo seo se rego: “Ge go Buša Mmušo wa Modimo, ‘Khutšo e tla Ata.’”