“Baswa ba bantšhi ba na le malwetši a monagano e bile taba ye ga se ya swanela go tšeelwa fase. Le gona re lemogile gore selo se segolo seo se bakago malwetši ao ke social media.”—Dr. Vivek Murthy, yo mogolo mafapheng a tša kalafo U.S, kuranta ya New York Times, 17 June 2024.

 Batswadi ba ka šireletša bjang bana ba bona dikotsing tša social media? Beibele e ba nea dikeletšo tšeo di ka ba thušago.

 Ekwa gore Beibele e reng.

 “Yo bohlale o a nagana pele a dira dilo.”—Diema 14:15.

 Ka ge go diriša social media go na le dikotsi, o se ke wa ikwa o gapeletšega go dumelela ngwana wa gago gore a e šomiše. Pele o dumelela ngwana wa gago go šomiša social media, kgonthišetša gore o šetše a gotše ka mo go lekanego moo e lego gore ge nako yeo o mmeetšego yona ya go e diriša e fela, a ka kgona go e tlogela ntle le bothata, a kgona go kgetha bagwera ba ba botse le go phema dilo tšeo di sego tša hlweka.

•   Gore o ithute ka mo go oketšegilego, bala sehlogo seo se rego “Should My Child Use Social Media?” le seo se rego “Teaching Your Teenager Social Media Safety.”

 “Le diriše nako ya lena gabotse.”—Baefeso 5:16.

 Ge e ba o dumelela ngwana wa gago gore a šomiše social media, mmeele melao ya gore o swanetše go e šomiša bjang o be o mo hlalosetše gore melao yeo e tlo mo hola bjang. Lebelela gore social media e fetoša tsela yeo ngwana wa gago a itshwarago ka yona bjang ke moka o bone ge e ba go nyakega gore o fokotše nako yeo a e fetšago a e diriša.

•   Diriša bidio yeo e rego Diriša Social Network Gabotse go thuša ngwana wa gago go kwešiša gore ke ka baka la eng o mmeela melao ya go diriša social media.

 Beibele e re re phela “[dinakong] tše di hlobaetšago tšeo go lego thata go lebeletšana le tšona.” (2 Timotheo 3:1-5) E bile e re fa keletšo yeo e sa felelwego ke nako yeo e ka re thušago go lebeletšana le mathata a. Go na le dihlogo tše di fetago tše 20 tšeo di theilwego Beibeleng tšeo di ka thušago batswadi le bana tšeo di bolelago ka malwetši a monagano ao baswa ba bago le ona.