Go Petšha—Selo Seo se Gogago Kgahlego ya Lefase ka Bophara

JOHN yo a goletšego Scotland, o be a phela a hutša gore o tla swara matengwa. O re: “Ke be ke reka thekethe ya matengwa beke e nngwe le e nngwe. E be e bitša tšhelete e nyenyane feela, eupša thekethe yeo e be e nnea kholofelo ya go hwetša dilo ka moka tšeo ke bego ke di nyaka.”

Kazushige yo a dulago Japane, o be a rata mokato wa dipere. O a gopola: “Go petšha lepatlelong la mekato ya dipere le bagwera ba-ka go be go ntlišetša lethabo le legolo kudu gomme ka dinako tše dingwe ke be ke thopa tšhelete e ntši kudu.”

Linda yo a dulago Australia o re: “Go bapala dikarata (bingo) e be e le papadi yeo ke e ratago kudu. Mokgwa wo o be o mpitša tšhelete yeo e lekanago R350 ka beke, eupša ke be ke kgahlwa kudu ke go ba mofenyi.”

John, Kazushige le Linda ba be ba lebelela go petšha e le sebopego seo se sa gobatšego sa boithabišo. Batho ba dimilione tše makgolo go dikologa lefase ba na le pono e swanago. Nyakišišo ya Gallup ya 1999 e bontšhitše gore pedi-tharong ya ma-Amerika e be e amogela go petšha. Ka 1998, batho ba Amerika bao ba bapalago dipapadi tša go petšha ba be ba diriša mo e ka bago ditolara tše dimilione tše dikete tše 50 go petšheng moo go dumeletšwego ke molao—e lego tšhelete e fetago yeo ba bego ba e diriša ditheketheng tša dipaesekopo, mminong o gatišitšwego, dipapading tšeo di gogelago babogedi ba bantši, diphakeng tša boithabišo le dipapading tša bidio di kopantšwe.

Go ya ka nyakišišo ya morago bjale, lebakeng la ngwaga o tee, baagi ba Australia ba fetago 80 lekgolong ba ile ba petšha bonyenyane ka lekga le tee gomme ba 40 lekgolong ba be ba petša beke le beke. Ka kakaretšo, batho ba bagolo nageng yeo ba be ba diriša tšhelete e fetago R4 600 ka ngwaga go petšheng, e lego yeo e lekanago ka makga a mabedi le tšhelete ye e dirišwago ke ma-Yuropa goba ma-Amerika, e lego seo se dirago ma-Australia gore a be gare ga bapetšhi ba fišegago kudu lefaseng.

Ma-Japane a mantši a lemaletše pachinko, e lego papadi yeo e swanago le ya pinball, gomme a diriša dibilione tše dintši ka ngwaga a petšha papading ye. Kua Brazil go dirišwa  bonyenyane tšhelete yeo e lekanago diranta tše dimilione tše dikete tše 46 ngwaga o mongwe le o mongwe go petšheng, bontši bja yona e dirišetšwa ditheketheng tša matengwa. Eupša ga se ma-Brazil feela ao a ratago dithekethe tša matengwa. Makasine wa Public Gaming International morago bjale o akanyeditše gore go na le “mehuta e 306 ya matengwa dinageng tše 102.” Ka kgonthe go petšha ke selo seo se gogago kgahlego ya lefase ka bophara—selo se se gogago kgahlego seo ba bangwe ba bolelago gore se tliša mehola e megolo.

Sharon Sharp yo e lego moemedi wa Public Gaming Research Institute, o bolela gore kua United States go tloga ka 1964 go ya go 1999, matengwa a tšwela pele a “tsenya mo e ka bago ditolara tše dimilione tše dikete tše 125 sekhwameng sa tšhelete ya mmušo, yeo karolo e kgolo ya ditseno tše e tsenego ga e sa le go tloga ka 1993.” Bontši bja tšhelete ye bo be bo beetšwe mananeo a thuto ya batho ka moka, mafelo a diphaka a mmušo le tšwetšopele ya didirišwa tša dipapadi tša batho bohle. Le gona, intaseteri ya tša go petšha ke mothwadi yo mogolo gomme kua Australia e nnoši, e thwala mo e ka bago batho ba 100 000 dikgwebong tšeo di fetago 7 000.

Ka gona, bathekgi ba tša go petšha ba bolela gore go tlaleletša tabeng ya go nea boithabišo, go petšha mo go lego molaong go hlola mešomo, go nea ditseno tša motšhelo gomme go kaonefatša mafelo ao boemo bja wona bja tša boiphedišo bo buramego.

Ka gona, batho ba bantši ba ka botšiša gore, ‘Ke’ng seo se fošagetšego ka go petšha?’ Karabo ya potšišo ye, yeo e ahla-ahlwago dihlogong tše di latelago, go bonala e tla fetola pono ya gago mabapi le go petšha.

[Seswantšho go letlakala 3]

John

[Seswantšho go letlakala 3]

Kazushige

[Seswantšho go letlakala 3]

Linda