Kgoketšo ya Dipalo

NAGANA ka lefase leo le se nago dipalo. Go be go ka se be le tšhelete. Kgwebo e be e tla dirwa feela ka go bapaletšana difahlego di lebane. Go thwe’ng ka dipapadi? Ka ntle le dipalo re be re ka se palelwe feela ke go boloka dintlha tša papadi eupša re be re ka se kgone go hlalosa le gore ke dibapadi tše kae tšeo di swanetšego go bopa sehlopha se sengwe le se sengwe!

Lega go le bjalo, ka ntle le go dirišwa ga tšona ka tsela e holago, dipalo di lebelelwa e le tša sephiri. Se ke ka gobane ke tše di naganwago. O ka se ke wa bona dipalo, wa di swara goba go di kwa. Ka mohlala: Apola e na le mmala wo o e hlaolago, mohuta, bogolo, sebopego, monko le tatso. O ka hlahloba se sengwe le se sengwe sa dika tše go bona ge e ba ka kgonthe selo se itšego e le apola, swiri, kgwele goba selo se sengwe se itšego. Lega go le bjalo, palo ga e bjalo. Kgoboketšo ya dilo tše itšego tše šupa e ka se swane ka selo le kgoboketšo ya dilo tše dingwe tše šupa—ge e se feela gore “ka moka ga tšona ke tše šupa.” Ka gona, go kwešiša tlhaloso ya dipalo—ka mohlala go lemoga phapano magareng ga tshela le šupa—ke go kwešiša selo seo se naganwago e le ka kgonthe. Gomme mo ke moo go ba ga dipalo selo sa sephiri go thomago gona.

Go Tloga go Pythagoras go ya go Seka-thutamahlale

Go hwetša tlhaloso e kgethegilego dipalong e be e le selo se se tlwaelegilego bathong ba bogologolo. Pythagoras yo e lego radifilosofi wa mo-Gerika le setsebi sa dipalo e bile e le yo a phetšego lekgolong la botshelela la ngwaga B.C.E., o rutile gore dilo ka moka di ka hlaloswa ka thulaganyo go ya ka mokgwa wa dipalo. Yena gotee le balatedi ba gagwe ba be ba nagana gore legohle ka moka ke mohlala wa thulaganyo le go nyalelana ga dilo. Ka gona, na e be e ka se be gore go tswalana ka moka ga dipalo go hwetšwa dilong ka moka tša kgonthe?

Ga e sa le go tloga mehleng ya Pythagoras, go hlathollwa ga dipalo go be go dutše go dirišwa bakeng sa go bolelela dilo pele le go hlatholla ditoro gotee le go šoma e le dithušo tša go ikgopotša. Di be di dutše di dirišwa ke ba-Gerika, Mamoseleme  le ditho tša Bojakane. Ka go diriša tshepedišo ya thuto ya bodupe bja dipalo yeo e bitšwago gematria, ditho tša bodumedi bja Cabala bja Sejuda di ile tša nea e nngwe le e nngwe ya ditlhaka tše 22 tša Sehebere palo yeo e e emelago gomme ka go rialo di bolela gore di hweditše ditlhaloso tše utilwego Mangwalong a Sehebere.

Thuto ya mehleng yeno ya bodupe bja dipalo ke yeo e swanago. Gantši go thongwa ka leina la gago le letšatši-kgwedi la matswalo. Tlhaka e nngwe le e nngwe leineng la gago e newa palo yeo e emelago. Ka go hlakanya dipalo tše—gotee le dipalo tša kgwedi ya gago ya matswalo le letšatši-kgwedi—setsebi sa bodupe bja dipalo se hwetša dipalo tša gago tša motheo. Ke moka ka morago, se nea dipalo tše ditlhaloso tše kgethegilego, tšeo se naganago gore di nea tlhaloso e feletšego ka wena—go akaretša semelo sa gago, dikganyogo tšeo o sa lemogego gore o na le tšona gotee le pheletšo ya gago.

Mohlomongwe kgoketšo ya kgonthe ya thuto ya bodupe bja dipalo e letše go seo se bonagalago e le tsheka-tsheko ya tšona e nepagetšego. Edward Albertson o ngwala ka pukung ya gagwe ya Prophecy for the Millions gore: “Batho ba bantši ba thomile go dumela thutong ya bodupe bja dipalo ka go utolla kamoo dipalo di dumelelanago kudu ka gona le bao di dirišwago go bona.” Eupša thuto ya bodupe bja dipalo e bile e bitšwa seka-thutamahlale. Ka baka la’ng? Na go na le mabaka a gore o belaele boipolelo bja yona?

[Lepokisi/Diswantšho go letlakala 21]

Na Go Na Le Melaetša E Utilwego Ka Beibeleng?

Ka pukung ya gagwe ya The Bible Code, mongwadi wa ditaba Michael Drosnin o bolela gore o utollotše melaetša e utilwego ka go diriša tsheka-tsheko ya computer ya Mangwalo a Sehebere. Go ya ka dipolelo tša Drosnin, “maswao” a be a e-na le mantšu a “mmolai wa go khukhunetša yo a tlago go bolaya” gotee le leina Yitzhak Rabin—gomme a hweditšwe ngwaga pele ga ge Tona-kgolo ya Isiraele Rabin a ka bolawa.

Bjalo ka ge go be go lebeletšwe, The Bible Code e ile ya tšweletša lehlakore la yona la kganetšo. Dave Thomas yo e lego setsebi sa dipalo le rathutamahlale ya tša tlhago, o ile a bontšha gore tsheka-tsheko ya computer ya taba le ge e le efe e tla tšweletša seo se ka bonagalago eka ke melaetša ya sephiri. Ge a seka-seka taba ya Drosnin, Thomas o ile a hwetša mantšu a, “maswao,” “bošilo,” le “bofora.” Thomas o re, “melaetša e utilwego e ka hwetšwa kae le kae, ge feela o ikemišeditše go diriša nako le boiteko bakeng sa go tsoma dikgonagalo tše dintši.”

Ka bokgoni bja yona bja go bala dipalo tše dintši kudu, mohlomongwe computer e ka hwetša go kopana mo go itšego ga ditlhaka tšeo di ka dirišwago e le mohuta o mongwe wa go bolelela dilo pele. Eupša se e fo ba feela selo sa sewelo gomme ga se hlatsele gore Beibele e na le melaetša e utilwego. *

[Mongwalo wa ka tlase]

[Seswantšho go letlakala 20]

Pythagoras o rutile gore dilo ka moka di ka hlaloswa ka mokgwa wa dipalo

[Mothopo]

Courtesy National Library of Medicine