Mo-Samaria wa Kgaugelo wa Mehleng Yeno

KA MONGWADI WA PHAFOGA! KUA MEXICO

Ba bantši ba rena re ile ra kwa ka kanegelo ya ka Beibeleng mabapi le monna yo botho yo gantši a bitšwago mo-Samaria wa Kgaugelo. (Luka 10:29-37) Seswantšhong se Jesu Kriste o bontšhitše kamoo monna wa mo-Samaria a ilego a bontšha lerato ka gona go fihla bokgoleng bjo bo sa tlwaelegago go moagišani wa gagwe yo a bego a nyaka thušo. Na ba-Samaria ba bjalo ba kgaugelo ba gona lehono? Ela hloko pego e latelago e tšwago Mexico.

Ge ba boa leetong, Betuel le lapa la gagwe ba be ba le kgole le gae ka dikhilomithara tše mmalwa ge ba be ba bona kotsi e šoro ya koloi tseleng ya lephefo. Ba ile ba ema e le gore ba thuše. Yo mongwe wa baotledi yo a bego a akaretšwa kotsing yeo, e lego ngaka, o ile a ba kgopela gore ba tšee mosadi wa gagwe yo a bego a le mmeleng, gotee le barwedi ba babedi ba banyenyane go ba iša sepetleleng sa kgaufsi bakeng sa gore ba newe tlhokomelo ya tša kalafo. Ba ile ba dira bjalo, gomme ka morago Betuel o ile a boela lefelong la kotsi go yo bona gore ke thušo efe e oketšegilego yeo a ka e neago.

Betuel o a hlalosa: “Bahlapetši ba mmušo ba tseleng ya lephefo ba be ba fihlile, gomme ngaka e be e tla golegwa bakeng sa gore go dirwe dinyakišišo ka gobane motho yo mongwe o be a hwile kotsing yeo. Ge ngaka e be e mpotšiša gore ke ka lebaka lefe ke bego ke e thuša, ke ile ka hlalosa gore re Dihlatse tša Jehofa le gore re ithutile go tšwa Beibeleng gore re swanetše go rata baagišani ba rena. Ke ile ka botša ngaka gore e be e sa swanela go tshwenyega ka mosadi wa yona le bana, ka gobane re be re tla ba hlokomela. E tletše meokgo ya lethabo mahlong a yona, e ile ya nnea dilo tša yona tša bohlokwa e le gore ke di boloke.”

Betuel le lapa la gagwe ba ile ba tšea ba lapa la monna yo ba ya le bona legaeng la bona gomme ba ba hlokomela ka matšatši a mmalwa. Betuel o ile a diriša sebaka se gore a thome thuto ya Beibele le bona. Ge ngaka e lokolotšwe kgolegong, e ile ya bontšha tebogo ya yona le tlhompho go Dihlatse tša Jehofa. E ile ya holofetša gore e tla tšwetša pele thuto ya Beibele motseng wa gabo yona, gomme e ile ya bolela gore ge e ba mosadi wa yona a ka belega ngwana wa mošemane, e tla mo reela leina la Betuel. Betuel o tšwela pele ka gore: “Bjale, ka morago ga nywaga e mebedi re ile ra ba le sebaka sa go ba etela. Ke ile ka makatšwa ke gore ba be ba ithuta Beibele, gomme leina la ngwana wa bona wa mošemane e be e le Betuel!”

[Seswantšho go letlakala 15]

Betuel