Ke’ng Seo Bokamoso bo se Swaretšego Bokriste?

NA LEFASE le tla fetošetšwa Bokristeng goba na Bokriste bo tla hwelela sa ruri? Na Bokriste bo ile bja dula bo hlwekile bjalo ka seetša lefaseng leo le fsifetšego goba na bo ile bja šilafatšwa? Tše ke dipotšišo tšeo di re kgomago go fihla le lehono.

A šomiša seswantšho se bonolo, Jesu o bontšhitše gore gatee-tee ka morago ga gore a bjale peu ya Bokriste, lenaba e lego Sathane le be le tla ba tšhitišo. (Mateo 13:24, 25) Ka gona, e be e se feela tšwelopele setšhabeng yeo e bakilego gore Bokriste bo fetošwe nywaga-kgolong ya pele e mmalwa ka morago ga bodiredi bja Jesu. E be e le modiro o dirwago ka maikemišetšo a kgopo a lenaba, modiro wa Sathane. Lehono dikereke tša Bojakane di tšwetša pele diphošo tšeo di dirilwego nakong e fetilego gomme di buna mafelelo a seo.—2 Bakorinthe 11:14, 15; Jakobo 4:4.

Tlhaselo Yeo e sa Bonagalego Bokristeng

Jesu o boletše e sa le pele gore dithuto tša gagwe di be di tla kgopamišwa. O boletše gore: “Mmušo wa magodimo o swantšhitšwe le motho yo a bjetšego peu e botse tšhemong ya gagwe. Eitše ge batho ba robetše, lenaba la gagwe la tla la bjalelela mefoka gare ga korong, la tloga.” Ka mo go makatšago, ge bahlanka ba botša monna yoo ka tiro yeo e kgopo le go kgopela tumelelo ya go kgoboketša mefoka, o itše: “Aowa; gore e se re ka kotsi, ge le kgoboketša mefoka, la tomola korong gotee le yona. Di leseng di gole gotee go fihla punong; lebakeng la puno ke tla botša babuni ka re, Pele kgobelang mefoka le e tleme dingata gore le e fiše, ke moka le ye le kgobele korong ka ngwakong wa-ka wa polokelo.”—Mateo 13:24-30.

Bjalo ka ge Jesu ka boyena a hlalositše, seswantšhong sa gagwe monna yo a bjetšego korong tšhemong o swantšhetša Jesu gomme peu yeo a e bjetšego e swantšhetša Bakriste ba therešo. Lenaba leo le bjetšego mefoka gare ga korong le swantšhetša “Diabolo.” Mefoka e swantšhetša batho ba hlokago molao, bahlanogi bao ka maaka ba ipolelago gore ke bahlanka ba Modimo. (Mateo 13:36-42) Moapostola Paulo o boletše ditaba tše oketšegilego tša seo se tlago go direga. O itše: “Ke a tseba gore ka morago ga ge ke tlogile, diphiri tše di gatelelago  di tla tsena gare ga lena gomme di ka se sware mohlape ka bonolo, le gona gare ga lena ka noši go tla tsoga banna gomme ba bolela dilo tše di kgopamego gore ba goge barutiwa gore ba ba šale morago.”—Ditiro 20:29, 30.

Bokriste bo a Kgopamišwa

Na seo Jesu a se bontšhitšego le seo Paulo a se boletšego e sa le pele se ile sa phethagala? Se ile sa phethagala e le ka kgonthe. Banna bao ba fišegelago thoko ba ile ba thoma go laola phuthego yeo Jesu a e hlomilego gomme ba e dirišetša merero ya bona ka noši. Jesu o boditše balatedi ba gagwe gore: ‘Ga le karolo ya lefase.’ (Johane 15:19) Go sa šetšwe seo, banna bao ba fišegelago go buša ba dirile segwera le babuši gomme ba bopa dikereke tšeo di thekgwago ke Mmušo tšeo di ilego tša kgoboketša mahumo gaešita le go ba le matla a magolo. Dikereke tše di rutile “dilo tše di kgopamego.” Ka mohlala, di rutile batho go rapela Mmušo le go gafa maphelo a bona bakeng sa wona dintweng. Ka go rialo, bao ba ipitšago Bakriste ba tšere karolo dintweng tša bodumedi gomme ba bolaya batho bao ba bego ba ba lebelela e se badumedi. Ba bile ba ya le ntweng gomme ba bolaya “bana babo bona” bao e lego ba bodumedi bjo bo swanago. Ka kgonthe ga se ba diriša boema-gare bja Bokriste le lerato la boagišani.—Mateo 22:37-39; Johane 15:19; 2 Bakorinthe 10:3-5; 1 Johane 4:8, 11.

Ka mo go kwagalago, dikereke tšeo ka nywaga-kgolo e mentši di bego di dutše di ipitša gore ke tša Bokriste di ipontšhitše e le feela Bokriste bja bofora. Bjalo ka ge re bone dihlogong tše di fetilego, se se hlalosa lebaka leo ka lona go nago le tshekamelo ya dikereke tšeo di tšwelago pele di ikaroganya ka dihlotswana, dikereke tšeo di itsenya-tsenyago dipolitiking le dikereke tšeo di hlokomologago melao ya Modimo. Dienywa tše bjalo tše mpe ga se mafelelo a Bokriste bja therešo eupša ke a Bokriste bja bofora, bjoo bo bjetšego ke Diabolo. Bodumedi bjo bja maaka bo lebile kae? Bjalo ka ge Jesu a bontšhitše seswantšhong sa gagwe, bo ka se hwelele feela ka baka la go hloka thekgo. Bo tla ahlolwa gomme bja senywa.

Bakriste ba Therešo ba Taga Lefsifsing

Lega go le bjalo, pele ga ge “mefoka” ya Bokriste bja maaka e ka kgoboketšwa le go senywa, seswantšho sa Jesu se bontšha selo se sengwe seo se swanetšego go direga. Ka nywaga-kgolo go gola ga “mefoka” ya Bokriste bja maaka e be e le mo gogolo moo e lego gore “korong” ya Bokriste bja therešo e be e bipilwe. Eupša Jesu o hlalositše gore korong e hlaolwa go mefoka lebakeng la “puno” leo a boletšego gore le swantšhetša “bofelo bja tshepedišo ya dilo.” O boletše gape gore: “Ka nako yeo baloki ba tla taga bjalo ka letšatši.” (Mateo 13:39-43) Bohlatse bo bontšha gore re be re dutše re phela bofelong bja tshepedišo ye ya dilo ga e sa le go tloga ka Ntwa ya I ya lefase, yeo e bilego gona nywageng ya ka godimo ga e 90 e  fetilego. (Mateo 24:3, 7-12) Na karolo ye ya seswantšho sa Jesu sa boporofeta le yona e phethagetše?

Bakriste ba therešo ba hlaotšwe go “mefoka” ya Bojakane. Dihlatse tša Jehofa di ‘taga bjalo ka letšatši,’ di thuša ba bangwe go tseba Modimo wa therešo, Jehofa. Dihlatse ga di goboše melao ya gagwe. Go e na le moo, batho bao e bago Dihlatse gantši ba dira diphetogo tše dikgolo tseleng ya bona ya bophelo e le gore ba ikokobeletše melao ya motheo ya Bokriste yeo e hwetšwago ka Beibeleng.

Dihlatse tša Jehofa ga di nee batho boithabišo dibokeng tša tšona eupša di ba nea thuto e sa lefelelwego ya Beibele. Gape di bontšhana lerato le borutho gotee le segwera, e lego dika tšeo di ithutago tšona thutong ya tšona ya Mangwalo. Di dumela gore Modimo o tla fetoša lefase go ba paradeise gomme a dira gore le dulwe ke batho ba boleta ba lefase bjalo ka ge a be a rerile go tloga mathomong. Eupša, sa pele lefase le swanetše go hlwekišwa ditutuetšong tše gobatšago tša bodumedi bja maaka, bjoo bo tsebjago ka Beibeleng e le Babilona yo Mogolo. Go ya ka boporofeta bja Beibele, kgaufsinyane Jehofa o tla tliša phetogo e bjalo e kgolo.—Mateo 5:5; Kutollo 18: 9-10, 21.

Ka morago ga ge batho ba kwago ba lokolotšwe mekgweng ya bofora ya bodumedi bja maaka, borapedi bja Bokriste bja therešo bo tla kopanya bohle bao ba phelago lefaseng. A bokamoso bjo bo kgahlišago gakaakang bakeng sa Bokriste bja therešo bjoo Jesu a bo bjetšego! Paradeise ya Edene e tla tsošološetšwa lefaseng la khutšo, leo go lona go ka se kego gwa ba le madumedi ao a aroganego ao a tlago go baka ntwa gape!

[Seswantšho go letlakala 23]

“Lenaba la gagwe le tlile gomme la bjala mefoka.”—Mateo 13:25

[Diswantšho go letlakala 24, 25]

O laletšwa ka borutho Holong le ge e le efe ya Mmušo ya Dihlatse tša Jehofa, moo thuto e sa lefelelwego ya Beibele e newago

[Seswantšho go letlakala 25]

“Ke moka le ye le kgobele korong ka ngwakong wa-ka wa polokelo.”—Mateo 13:30