Mehlala ya Malapa ao a Atlegilego​—Karolo ya Pele

Ka ge tokollo ye e kgethegilego ya Phafoga! e šetše e bontšhitše, malapa ao a atlegago ka dinako tše dingwe a ba le mathata. Therešo yeo ga e makatše le gatee, ka ge re phela nakong yeo Beibele e e hlalosago e le “dinako tše di hlobaetšago tšeo go lego thata go lebeletšana le tšona.” (2 Timotheo 3:1) Mathata a mehuta-huta a tla tšwelela ka lapeng le lengwe le le lengwe.

Lega go le bjalo, gopola gore katlego yeo ga e ithekge feela ka go ba le seo go thwego ke maemo a lokilego. Ka mo go fapanego, Jesu o itše: “Go thaba bao ba lemogago go nyaka ga bona dilo tša moya.” (Mateo 5:3) Malapa ao a kgotsofatšago dinyakwa tša ona tša moya ka go latela melao ya motheo ya Beibele a hweditše sephiri sa katlego—go sa šetšwe maemo a sa kgahlišego. Ela hloko mehlala e mengwe.

Go hlokomela ngwana yo a golofetšego. Beibele e tšeela godimo boikarabelo bja go pele go hlokomela ditho tša malapa go feta dilo tšohle, go akaretša le tšeo di nago le dinyakwa tše kgethegilego. E bolela gore: “Ge e ba motho a sa babalele bao e lego ba gabo, kudu-kudu ditho tša ntlo ya gagwe, o latotše tumelo gomme ke yo mobe go feta motho yo a se nago tumelo.”—1 Timotheo 5:8.

Go letlakala 15, Victor, tate wa Afrika Borwa, o laodiša kamoo yena le mosadi wa gagwe ba ilego ba hlokomela ngwana yo a golofetšego ka nywaga-some e fetago e mene.

Go godišwa ke batswadi bao e sego ba gago ba madi. Melao ya motheo ya Beibele e ka thuša motho go ikwa a e-na le boikholofelo—gaešita le ge a ile a tlogelwa ke batswadi ba gagwe ba madi. Ee, Beibele e bolela gore Jehofa Modimo ke “Mo-lwêla-dišuana.”—Psalme 10:14.

Go letlakala 16, Kenyatta, kgarebe e nngwe ya kua United States, o hlalosa kamoo a ilego a lebeletšana le ditla-morago tšeo di bakwago ke go ba le maikwelo a go se kopane le batswadi ba gagwe ba madi.

Go lebeletšana le lehu la motswadi. Go lahlegelwa ke mma goba tate go ka dira gore motho a be le mabadi maikwelong ao go lego thata gore a ka fola. Beibele e ka thuša. Mongwadi wa yona, Jehofa, ke “Modimo wa khomotšo yohle.”—2 Bakorinthe 1:3.

Go letlakala 17, Angela, kgarebe e nngwe ya kua Australia, o hlalosa kamoo tswalano ya gagwe le Modimo e mo thušago go lebeletšana le tahlegelo e bohloko.

Malapa ka moka a na le ditlhohlo tšeo a lebeletšanago le tšona. Ka ge ditaba tše di lego matlakaleng a latelago di tla bontšha, bao ba dirišago melao ya motheo ya Beibele ba ile ba hwetša selo se bohlokwa seo se ba thušago go lebeletšana le ditlhohlo ka katlego.

 [Box/​Pictures on page 15]

Go Hlokomela Ngwana yo a Golofetšego

Ka ge go anega Victor Maynes, Afrika Borwa

“Ga e sa le go tloga a belegwa, Andrew o be a dutše a ithekga ka rena bakeng sa go mo apeša, go mo hlapiša gaešita le go mo thuša go ja ka dinako tše dingwe. Ga bjale o na le nywaga e 44.”

RE ILE ra gonona gore go na le selo se itšego se se fošagetšego ka Andrew ge a be a sa kgone go sepela ge a be a e-na le ngwaga o tee. Ke moka, nakong yeo o be a e-na le bolwetši bja go wa. Re ile ra mo kitimišetša sepetlele, moo re ilego ra hwetša gore o na le dithunthwane. Eupša ga se gwa felela moo. Diteko tše oketšegilego di ile tša tiiša gore Andrew o be a golofetše monaganong.

Ka morago ga go leka mekgwa e mentši ya thušo ya tša kalafo, re ile ra kgona go laola go wa ga Andrew. Lebakeng le itšego, o be a swanetše go nwa mehuta e mene e fapa-fapanego ya dihlare gararo ka letšatši. Ke therešo gore bofokodi bja gagwe bja monagano bo be bo ka se alafše ka go diriša dihlare. Gaešita le ga bjale, a e-na le nywaga e 44, Andrew o na le monagano o lekanago le wa ngwana wa nywaga e mehlano goba e tshela.

Dingaka di ile tša re eletša gore re iše Andrew lefelong leo a tla hlokomelwago bakeng sa dinyakwa tša gagwe, eupša re ile ra tšea phetho ya go se dire bjalo. Re be re le boemong bja go kgona go hlokomela dinyakwa tša Andrew, ka gona, re ile ra phetha ka gore re tla mo hlokomela ka gae, go sa šetšwe ditlhohlo tšeo re tlago go lebeletšana le tšona.

Ka gona, modiro wa go mo hlokomela re ile ra o dira taba ya lapa. Bana ba bangwe ba rena—re be re e-na le banenyana ba babedi le mošemane o tee bao ba bego ba dula ka lapeng—ba be ba re thekga kudu gomme ke ba leboga e le ruri! Gape, bjalo ka Dihlatse tša Jehofa, re hweditše thekgo e kgahlišago go tšwa go ditho tša phuthego ya gabo rena. Ka dinako tše dingwe, ba be ba re apeela goba gaešita le go hlokomela Andrew ge re e-ya bodireding goba ge re dira mediro e mengwe.

Re be re dula re gopola mantšu a Jesaya 33:24, ao a huperego kholofetšo ya Modimo ya gore ka letšatši le lengwe “mo xo ba ba axilexo fá xo ka se bê le e a rexo: Ke a babya!” Re dumela ka botlalo gore Modimo o tla phethagatša morero wa gagwe wa go tliša lefase le lefsa le go fediša malwetši ka moka. (2 Petro 3:13) Ka gona re lebeletše pele letšatšing la ge Andrew a fola. Go ba go fihla nakong yeo, re dumela mantšung a Jesu a gore ge e ba re etiša dikgahlego tša Mmušo wa Modimo pele maphelong a rena, re tla newa dilo tšeo di nyakegago. (Mateo 6:33) Re be re dula re bona therešo ya mantšu ao. Re be re sa hloke selo.

Ke therešo gore ga se bohle bao ba ka kgonago go hlokomela setho sa lapa seo se babjago ka gae. Go bao ba dirago bjalo, sa mathomo seo ke ba kgothaletšago sona ke thapelo e tseneletšego le ya ka mehla. (1 Petro 5:6, 7) Sa bobedi, bontšha ngwana wa gago tlhokomelo e lerato gomme o se ke wa tšeela fase bokgoni bja gagwe bja go ithuta go rata Jehofa Modimo. (Baefeso 6:4) Sa boraro, akaretša ba lapa la gago ka moka gomme o ba dumelele go nea thušo. Sa bone, gopola gore legae la gago ke moo ngwana wa gago a tlago go bontšhwa lerato kudu. Ke therešo gore maemo a a fapana. Ge e le rena, ga se ra ka ra itshola ka go hlokomela Andrew ka gae. Go nna, ke ngwana yo a rategago kudu—monna yo a rategago kudu—yoo ke mo tsebago.

 [Box/​Pictures on page 16]

Go Godišwa ke Batswadi Bao e Sego ba Gago ba Madi

Ka ge go anega Kenyatta Young, United States

“Ge e ba o le ngwana yo a godišwago ke batswadi bao yo mongwe wa bona e sego motswadi wa gago wa madi, go na le kgokagano ya madi magareng ga gago le yo mongwe wa bona. Eupša ka ge ke godišwa ke batswadi bao e sego ba-ka, ga ke na kgokagano yeo. Ga ke tsebe le gore ke swana le mang.”

GAKE tsebe gore tate ke mang e bile ga se ka ka ka kopana le mma yo a mpelegego. Mma o be a diriša dino-tagi le dihlare-tagi gampe ge a be a nkimile. Ke ile ka bewa ka tlase ga tlhokomelo ya kgodišo ya bana ge ke se na go belegwa gomme ka išwa mafelong a mmalwa a tlhokomelo ya kgodišo ya bana pele ga ge nka amogelwa ke batswadi ba bangwe ge ke e-na le nywaga ya ka tlase ga e mebedi.

Tate wa-ka wa mogodiši o re ge modirela-leago yo a bego a ntlhokometše a be a mmontšha seswantšho sa-ka, gatee-tee o ile a nyaka gore ke be ngwana wa gagwe. Gatee-tee, ke ile ka rata mma wa-ka yo mofsa. Ke ile ka mmotša gore ke mma le gore ke be ke nyaka go ya gae le yena.

Lega go le bjalo, ke gopola ke sa le ngwana ke e-na le poifo ya gore ke be ke tla dira selo se itšego se fošagetšego gomme ka romelwa gape lefelong la tlhokomelo ya kgodišo ya bana. Ke be ke nagana gore ke be ke se ka swanela go ba le maikwelo a feto-fetogago go sa letelwa goba gaešita le go babja ka tsela yeo bana ba bangwe ba bego ba babja ka yona. Ke ile ka ba ka leka go phema go swarwa ke mokgohlwane! Batswadi ba-ka ba be ba fela ba nkgonthišetša gore ba a nthata le gore ba ka se ke ba ntahla.

Gaešita le ge ke šetše ke gotše, ka dinako tše dingwe ke lwantšhana le maikwelo a gore ga ke tšeelwe godimo go swana le bao ba godišitšwego ke batswadi ba bona ba madi. Ge feela ke thoma go kwešiša seo ka moka, motho yo mongwe o tla re go nna, “O swanetše go leboga kudu gore o na le batswadi ba kgahlišago bao dipelo tša bona di ilego tša ba šušumeletša go go dira ngwana wa bona!” Ke tloga ke leboga, eupša mantšu a bjalo a ntira gore ke ikwe eka go na le selo se itšego se fošagetšego ka nna le gore ka tsela e itšego go ile gwa nyakega maiteko a magolo kudu gore motho yo mongwe a nthate.

Ke thatafalelwa ke go amogela taba ya gore mohlomongwe nka se tsoge ke tsebile tate wa-ka wa madi. Ka dinako tše dingwe ke kwešwa bohloko ke gore mma wa-ka wa madi ga se a ka a kgaotša go diriša dihlare-tagi le dino-tagi gampe e le gore a nkgodiše, moo o ka naganago gore ke be ke sa swanelwe ke maiteko a bjalo. Ka dinako tše dingwe, ke mo kwela bohloko. Ke fela ke nagana gore ge nka kopana le yena, ke tla mmotša gore ke ile ka atlega bophelong le gore a se ke a ikwa gampe ka go ntlogela.

Batswadi ba-ka bao ba ntirilego ngwana wa bona ke Dihlatse tša Jehofa gomme mpho e nngwe yeo ke e amogetšego go tšwa go bona ke tsebo ya Beibele. Ke dula ke hwetša mantšu a lego go Psalme 27:10 e le a homotšago: “Xobane tate le mmê bôná ba ntloxetše; ’me Wêna Morêna O a nkamoxêla.” Seo se phethagetše go nna. Le gona, go na le mafelelo a mabotse a go godišwa ke batswadi ba e sego ba gago ba madi. Ka mohlala, ke kgahlwa ke batho—setlogo sa bona le maphelo a bona—mohlomongwe ka gobane ke sa tsebe lapa lešo la madi. Ke rata batho gomme seo ruri se bohlokwa tirelong ya Bokriste. Go ba yo mongwe wa Dihlatse tša Jehofa le go boledišana le batho ba bangwe ka Beibele go nnea seriti le morero bophelong. Ge ke gateletšegile, ke a sepela gomme ka ya go thuša ba bangwe. Ka go ruta batho Beibele, ke hwetša gore nka kgokagana le bona. Motho yo mongwe le yo mongwe o na le taba yeo a ka bolelago ka yona ka bophelo bja gagwe.

 [Box/​Pictures on page 17]

Go Lebeletšana le Lehu la Motswadi

“Ge tate a be a e-hwa, ke ile ka ikwa ke se sa hlwa ke šireletšegile. Motho yoo a bego a tseba selo se sengwe le se sengwe le yoo a bego a ka lokiša selo se sengwe le sengwe bophelong bja-ka o be a se sa hlwa a le gona.”

Ka ge go anega Angela Rutgers, Australia

TATE o hwile nywageng e lesome e fetilego ge ke be ke sa le mahlalagading. Dikgwedi tše tshela pele ga moo, o ile a buiwa gomme ge a sa dutše a le ka phapošing ya bao ba sa tšwago go buiwa, ngaka e ile ya re botša gore ga go na selo seo se ka dirwago. Mma o be a nyaka tsebišo e oketšegilego, kgaetšedi’a-ka yo mogolo o ile a idibala gomme ke ile ka ikwa ke aparetšwe ke maikwelo a sa swanego. Dikgwedi tše tshela ka morago, tate o ile a hwa.

Ke ile ka lebeletšana le maikwelo a lwantšhanago. Ke be ke nyaka gore bagwera ba-ka ba kwešiše seo ke bego ke lebeletšana le sona, eupša ke be ke sa nyake go swarwa bjalo ka mohlaselwa. Ka gona ke ile ka dira maiteko a go se ba bontšhe kamoo ke bego ke ikwa ka gona. Ka lehlakoreng le lengwe, ke be ke nagana gore go itumelela go thabela bogwera bja bona go be go tla bolela gore bophelo bja-ka bo boetše sekeng ka tekanyo e itšego, eupša go se bjalo. Ga bjale, ke nagana kamoo bagwera ba-ka ba bego ba sa mphelele pelo ka gona!

Na ke tlaišwa ke maikwelo a go ba molato ka go hwa ga tate? Ee, go bjalo! Ke duma ge nkabe ke ile ka mmotša gore “Ke a go rata” gantši kudu. Ke duma ge nkabe ke ile ka mo gokarela gantši goba go fetša nako e ntši le yena. Go sa šetšwe gore ke ipotša gakaakang gore, ‘O be a ka se nyake gore o nagane ka tsela yeo,’ ke sa dutše ke tshwenyega.

Ka ge ke le yo mongwe wa Dihlatse tša Jehofa, ke hwetša khomotšo e kgolo kholofelong ya tsogo ya bahu yeo e theilwego Beibeleng. (Johane 5:28, 29) Ke leka go nagana gore tate o tšere leeto la go ya moše wa mawatle le gore ka letšatši le lengwe o tla tla gae, eupša letšatši leo a tlago go tla ka lona ga le tsebje. Se se makatšago ke gore ge batho ba be ba re go nna: “Tatago o tla tsošwa tsogong ya bahu,” mathomong seo se be se sa nkgothatše. Ke be ke ikwa ‘Ke nyaka tate gona bjale!’ Eupša papišo ya leeto la moše wa mawatle e nthušitše. E be e bontšha gore go tla ba le tsogo ya bahu, mola e be e nthuša go lebeletšana le maikwelo a go lahlegelwa ke motswadi.

Bakriste-gotee ba ile ba nnea thekgo e kgolo. Ke gopola yo mongwe ka mo go kgethegilego a mpotša gore o be a sa lokologe go bolela ka lehu la tate, eupša o itše o be a nagana ka nna le ka lapa lešo ka mehla. Ke ile ka dula ke gopola seo a ilego a se bolela. Se ile sa nthuša dinakong tša ge go be go se motho yo a mpotšago selo, ka gobane se dirile gore ke lemoge gore gaešita le ge ba sa bolele selo, ba be ba nagana ka nna le lapa lešo. Seo se be se le bohlokwa kudu go nna!

Dikgwedi tše nne ka morago ga lehu la tate, mma o ile a tšea karolo kudu bodireding gomme ke ile ka lemoga gore o be a hwetša lethabo la gagwe le legolo moo. Ka gona, ke ile ka mo tlatša. Go a makatša gore go thuša ba bangwe go go thuša go kgotlelela. Go ile gwa matlafatša tumelo ya-ka Lentšung la Modimo le dikholofetšong tša gagwe gomme go a nthuša gaešita le gona bjale gore ke lebiše tlhokomelo dilong tše dingwe, e sego manyaming a-ka feela.