Sephiri 3: Tirišano

“Boló ké mola è le ba babedi . . . Xe ba ka wa ba tlo tsošana.”—Mmoledi 4:9, 10.

Se se ra gore’ng? Banyalani ba atlegago ba hlompha tokišetšo ya Modimo ya bohlogo yeo e ngwadilwego ka Beibeleng. (Baefeso 5:22-24) Lega go le bjalo, pono yeo banna le basadi ba nyalanego ba swanetšego go ba le yona ke ya gore dilo ke “tša rena” go e na le gore ke “tša-ka.” Ge go e-na le tirišano, monna le mosadi ga ba sa hlwa ba itebelela e le bao ba sa nyalanago. Ke “nama e tee”—e lego polelwana ya Beibele yeo e sa hlalosego feela go ba ga sa ruri ga tlemagano ya bona eupša gape e bontšhago le gore ke ya kgaufsi gakaakang.—Genesi 2:24.

Bohlokwa bja sona? Ge e ba wena le molekane wa gago le sa dirišane, ditiragalo tše dinyenyane di ka fetoga mathata a magolo ka go akgofa gomme la fošana ka noga e phela go e na le go rarolla bothata. Ka mo go fapanego, ge wena le molekane wa gago le e-na le tirišano, le ba bjalo ka mofofiši wa sefofane le mothuši wa gagwe bao ba nago le thulaganyo e swanago ya go fofiša sefofane go e na le go ba bafofiši ba babedi bao ba sepelago tseleng yeo go yona ba ka feleletšago ba thulane. Ge le sa dumelelane, nyakang ditharollo tšeo di šomago go e na le go senya nako le matla le solana le go latofatšana.

Leka boitlwaetšo bjo. Hlahloba moya wa lena wa tirišano ka go araba dipotšišo tše di latelago.

▪ Na ke lebelela tšhelete yeo ke e golago e re “nna-we,” ka ge e le nna ke e šometšego?

▪ Na ke ipeela kgole le meloko ya molekane wa-ka, gaešita le ge yena a batamelane kgaufsi le yona?

▪ E le gore ke iketle ka botlalo, na ke swanetše go ba kgole le molekane wa-ka?

Dira phetho. Nagana ka tsela e tee goba tše pedi tšeo o ka kaonefatšago tirišano le molekane wa gago.

O re’ng o sa botšiše molekane wa gago gore yena o šišinya’ng?

[Seswantšho go letlakala 5]

Tirišano e bolela gore yo mongwe ke mofofiši wa sefofane, yo mongwe ke mothuši wa gagwe gomme ka bobedi le na le thulaganyo e swanago ya go fofiša sefofane