Go Laola Nako ya Gago

“Tšohle di na le mohla wa tšôna.”—Mmoledi 3:1.

GORE o be le nako ya dilo tše bohlokwa-hlokwa, o swanetše go tseba gore dilo tšeo ke dife. Se se tla ba bonolo ge o kwešiša gabotse ditekanyetšo tša gago, dipakane tša gago, le mediro yeo e thekgago dilo tše ka go lebanya.

Sa pele, hlaola ditekanyetšo tša gago. O ka leka go ngwala fase dilo tše bohlokwa tšeo o di gopolago, tše bjalo ka lapa, segwera, mošomo o thata, thuto, katlego, ponagalo e botse, tšhelete, lethabo, lenyalo, botho, go phela gabotse mmeleng gotee le go phela gabotse moyeng. Ke moka, ipotšiše gore, ‘Ke selo sefe go tše, seo ke se bonago se le bohlokwa kudu?’

Ka morago ga moo, hlahloba dipakane tšeo o ratago go di fihlelela bophelong. Phapano ke efe gare ga dilo tšeo o bonago di le bohlokwa le dipakane? Mabapi le taba ye, re ka re dilo tšeo di lego bohlokwa ke tšeo di tšwelago pele, mola dipakane ka dinako tše dingwe di ka fihlelelwa gomme tša swaiwa gore di phethilwe.

O ka ipeela dipakane dife? Na o nyaka go fetša nako e oketšegilego le lapa la gago? Na o nyaka go hwetša mošomo o go swanetšego? Na o nyaka go kaonefatša bokgoni bja gago setloša-bodutung seo o se ratago kudu? Na o nyaka go thoma setloša-bodutu se sefsa? Na o nyaka go hlagolela seka se itšego sa semelo? Na o nyaka go ya maikhutšong? Go bala puku? Go ngwala puku?

Se se latelago, dira phetho ya gore ke dife tša dipakane tše tšeo di lego bohlokwa go wena. Kgonthišetša gore di sepedišana le dilo tšeo o di bonago di le bohlokwa. Ka mohlala, ge e ba o ipeela pakane ya go huma kudu, o ka ba o ipea kotsing ya go šarakanya bophelo bja gago.

Ga bjale, hlahloba gore ke mediro efe yeo e  ka go thušago go fihlelela dipakane tšeo o di kgethilego. Ka mohlala, ge e ba e nngwe ya dipakane tša gago e le go fokotša boima bja gago bja mmele, gona go itšhidulla ke modiro woo o ka go thušago go dira bjalo.

Go Ngwala Lelokelelo le go ka go Thuša Bjang?

Ge e ba dipakane tša gago di dumelelana le dilo tšeo o di bonago di le bohlokwa gomme o dira mediro yeo e ka go thušago go di fihlelela, bophelo bja gago bo tla leba felo gotee. O tla ikhwetša o fetša nako e ntši dilong tšeo di lego bohlokwa go wena. Go ba gona, seo ga se bolele gore o swanetše go tshediša dinyakwa le dikganyogo tša ba bangwe mahlo. (Bafilipi 2:4) Se bolela feela gore o tla kgona go lemoga le go gana dibaka tšeo e tlogago e le tša lefeela.

Ke therešo gore go tla ba le ditlhohlo. Mediro e mengwe e ka no ba e se bohlokwa, eupša e a nyakega. E ka nyaka letšatši la gago ka moka, ya go tlogelela nako e nyenyane goba ya se go tlogelele nako ya dilo tšeo di lego bohlokwa kudu go wena. Maemo a sa letelwago a ka tšwelela. Le gona, diphetogo maemong a gago a bophelo di ka dira gore o se kgone go fihlelela dilo tšeo o bego o rerile go di fihlelela. Eupša ka go gata megato e ka šomago ya go fetša nako dilong tše bohlokwa, o tla kgona go laola tsela yeo o dirišago nako ya gago le yeo o phelago ka yona.

 [Box/​Picture on page 28]

NA DIDIRIŠWA TŠA ELEKTRONIKI TŠA GO RULAGANYA NAKO DI BOLOKA NAKO?

Di boloka nako bakeng sa ba bangwe eupša di senya nako bakeng sa ba bangwe. Personal digital assistant, goba PDA, ka mohlala e ka ba le almanaka, lelokelelo la dinomoro tša mogala le diaterese, lelokelelo la dilo tšeo di swanetšego go dirwa, ya kgona go ngwala mantšu, ya ba le moo go ka ngwalwago ditaba, khamera, ya kgona go romela le go amogela melaetša ka e-mail le go tsena mokerong wa Inthanete. O ka diriša setlabakelo se go boloka nako ge e ba o dula o se tsenya tsebišo e mpsha gomme o sepela ka sona. Lega go le bjalo, go ka ba bonolo gore o senye nako e ntši o se fetleka ka ntle le morero, o se tsenya tsebišo e mpsha goba o bona gore ke sefe seo se šomago le seo se sa šomego goba ge e ba o reka dilo tšeo di sa nyakegego goba o se dumelela se go šitiša go dira segwera le batho goba go phetha boikarabelo bja gago.

Tšhišinyo: Dira nyakišišo pele o reka. Ge e ba sedirišwa sa elektroniki gantši se sa šome, go ka nyakega nako e ntši go se lokiša. Le gona, sedirišwa se sengwe le se sengwe sa elektroniki se swana le modiriši wa sona. Ge e ba o e-na le sona, se dirišetše go boloka nako e sego go senya nako.

[Seswantšho go letlakala 26, 27]

Na o ka rulaganya nako bakeng sa dilo tšeo di lego bohlokwa?