“Ngwalela Anton!”

● Hlatse ya Jehofa yeo e lego nywageng ya mahlalagadi ye e bitšwago Anton e be e dula motsaneng wo o lego lekatana wa Schelkan wa Stavropol’ Kray, kua Russia. Ge e be e sa le ngwana, o ile a hwetšwa a na le bolwetši bja go fokola mešifa bja Duchenne, e lego bolwetši bjo bo sa alafegego bjoo kapejana bo rathaganyago mešifa gomme gantši bo bolaya motho pele a ka swara nywaga e 20. Ge Anton a be a na le nywaga e senyane, o be a se sa kgona go sepela goba go emelela.

Ge Yevgeny le mosadi wa gagwe, Diana, ba be ba etetše phuthego ya Dihlatse ba ile ba kopana le Anton. Diana o hlalositše gore: “Anton o be a fokola kudu mmeleng eupša a tiile moyeng. Ka ge mogolwagwe a bolailwe ke bjona bolwetši bjoo ge a be a na le nywaga e 19, Anton o be a tseba gore le yena o kgauswi le go hwa. Lega go le bjalo, o be a thabile e bile a na le kholofelo.”

Diana le monna wa gagwe ba ile ba kgothaletša Anton gore a katološe bodiredi bja gagwe ka go ngwalela batho ba metsaneng yeo e lego lekatana mangwalo. Ka 2005, o ngwadile mangwalo a ka bago 500 gomme a a romela metsaneng ya kgauswi. Lega go le bjalo, seo se ilego sa mo nyamiša ke gore ga se a ka a hwetša le karabo e tee. Le ge seo se be se nyamiša Anton, o ile a tšwela pele a ngwala gomme a rapela go tšwa pelong gore a hwetše tlhahlo ya kamoo a ka bago modiredi yo a atlegago go sa šetšwe maemo ao a lego go ona.

Ka letšatši le lengwe ge a be a bala kuranta, Anton o ile a kopana le lengwalo leo le tšwago go mosadi yo a babjago yo a bego a nyaka khomotšo. Anton o ile a mo ngwalela lengwalo gomme karolo ya lona e ile ya gatišwa kuranteng yona yeo, o ngwadile gore: “Le ge bolwetši bja ka bo sa alafege, go bala Beibele go nthuša go lebelela bokamoso ke na le kholofelo. Ke rata go amogela mangwalo e bile ke dula ke a letetše.”

Mosadi yo yo a bego a kgomegile kudu maikwelong o ile a ngwalela kuranta yona yeo lengwalo. Le ile la gatišwa karolong yeo e bego e na le sehlogo se se rego: “Ngwalela Anton!” Mosadi yo o ile a leboga dikgopolo tše di sepedišanago le dilo tša moya tšeo di boletšwego lengwalong la Anton gomme a oketša ka gore: “A re thušeng Anton! Mo arabeng le be le mo ngwalele. Lesogana le le tloga le nyaka go kwa mantšu a botho!” Go ile gwa ngwalwa le aterese ya Anton.

Mangwalo ao a bego romelwa Anton a ile a thoma go fihla posong e nyenyane ya motsana woo—mo e ka bago a 30 ka letšatši! A be a etšwa tikologong ka moka ya Russia, gotee le Baltics, Jeremane gaešita le Fora. O amogetše mangwalo a makgolo go tšwa go babadi ba kuranta yeo. Diana ge a gopola o re: “Anton o ile a šala a ahlame! Ga bjale o be a na le batho ba makgolo bao a bego a ka ba ngwalela le go boledišana le bona ka ditumelo tše di theilwego Beibeleng.”

Anton o feditše nako ya ka godimo ga ngwaga a ngwalelana le bao ba bego ba mo ngwaletše gomme a ba botša ditherešo tša Beibele. Ganyenyane-ganyenyane, ge diatla tša gagwe di be di fokola le go feta, o ile a kgopela motho gore a tle a mo ngwalele seo a se bolelago. Ka September 2008, Anton o ile a hwa a na le nywaga e 20. Gaešita le ge a be a fokola kudu mmeleng, tumelo ya Anton le go rata bodiredi go ile gwa mmulela dibaka tša go kgoma maphelo a batho ba makgolo.