Ge o Ekwa Eka o ka fo Ikhwela

NGWAGA le ngwaga, batho ba dikete tše masome kua United States feela ba leka go ipolaya. Beibele e nea lebaka la motheo leo le dirago gore batho ba bantši ka tsela ye ba ikhwetše ba se na kholofelo. E hlalosa gore re phela “[dinakong] tše di hlobaetšago tšeo go lego thata go lebeletšana le tšona.” Batho ba imelwa kudu ke dikgateletšo tša bophelo. (2 Timotheo 3:1; Mmoledi 7:7) Ge motho a imelwa ke dipelaelo tša bophelo, a ka bona go ipolaya e le tsela ya go efoga bohloko bjo a bo kwago. O ka dira’ng ge e ba o kile wa tlelwa ke dikgopolo tše bjalo?

Ga se Wena Feela!

Le ge o le boemong bjo bo bonagalago bo se na kholofelo, gopola gore ga se wena feela o lebeletšanago le bjona le gore mo e nyakilego go ba motho yo mongwe le yo mongwe o na le bothata  bjo a lebeletšanago le bjona lehono. Beibele e re: “Tlholo yohle e tšwela pele e tsetsela gotee gomme e ekwa bohloko gotee.” (Baroma 8:22) Le ge gona bjale go ka bonagala eka bothata bja gago bo ka se rarollege, gantši dilo di a kaonefala ge nako e dutše e eya. O ka thušwa ke’ng mo nakong ye?

Ntšhetša sa mafahleng go mogwera yo a godilego moyeng le yo a ka botwago. Beibele e re: “Mogwera wa kgonthe o dula a na le lerato ka dinako tšohle, e bile ke ngwanabo motho yo o ka ithekgago ka yena mohlang wa tlalelo.” (Diema 17:17) Jobo wa go loka yo go bolelwago ka yena ka Beibeleng, o ile a ntšhetša ba bangwe sa mafahleng ge a be a le khuduegong. Ge a be a ikwa a na le seo a se hlalositšego e le go “ila bophelo bja ka,” o itše: “Ke tla ntšha matshwenyego a ka ka nna. Ke tla bolela ke šulafaletšwe moyeng!” (Jobo 10:1) Go ntšhetša ba bangwe sa mafahleng go ka fokotša bohloko bjo o bo kwago gomme gwa dira gore o fetoše tsela yeo o lebelelago bothata bjo o kopanago le bjona. *

Rapela o ntšhetše Modimo sa mafahleng. Ba bangwe ba nagana gore thapelo e fo ba selo seo se thušago go imolla kgopolo eupša Beibele ga e re’alo. Psalme 65:2 e re Jehofa Modimo ke “Mokwi wa thapelo” gomme 1 Petro 5:7 e re: “O a le hlokomela.” Beibele e dula e gatelela bohlokwa bja go ithekga ka Modimo. Ka mohlala, e re:

“Bota Jehofa ka pelo ya gago ka moka gomme o se ke wa ithekga ka tlhaologanyo ya gago. Mo ele hloko ditseleng tša gago ka moka gomme yena o tla letliša ditsela tša gago.”—DIEMA 3:5, 6.

“[Jehofa] o tla kgotsofatša kganyogo ya bao ba mmoifago, o tla ba kwa ge ba mo llela gore a ba thuše, gomme o tla ba phološa.”—PSALME 145:19.

“Ye ke kgodišego ye re nago le yona ya gore go sa šetšwe seo re se kgopelago go ya ka thato ya Modimo, Modimo o a re kwa.”—1 JOHANE 5:14.

“Jehofa o kgole le ba kgopo, eupša o kwa thapelo ya baloki.”—DIEMA 15:29.

 Ge e ba o botša Modimo mathata ao o lebeletšanago le ona, o tla go thuša. Beibele e na le lebaka le lebotse la go go kgothatša ka gore ‘mmote ka dinako tšohle. Tšholla pelo ya gago pele ga gagwe.’—Psalme 62:8.

Ge go Nyakega Gore o Eme ka Maoto

Dinyakišišo di utolla gore batho ba bantši bao ba ipolayago ba kile ba ba le bothata bja kgateletšego. * Se se gatelela taba ya gore go ka nyakega thušo ya tša kalafo. Ngaka e ka go nea pheko goba ya šišinya gore o je dijo tša mohuta o itšego. Maemong a mangwe, tharollo e ka ba e lekanego ka go fo itšhidulla. Tlhokomelo ya maemo a godimo ya tša kalafo e thušitše ba bantši. *

Beibele e hupere tsebišo e ntši yeo e ka go kgothatšago le go go nea kholofelo. Ka mohlala, Beibele go Kutollo 21:4 e bolela ka Jehofa Modimo gore: “O tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.” Se ke seo Modimo a se holofetšago e bile o ka imologa ge o naganišiša ka sona.

Dihlatse tša Jehofa di boledišana le batho ba dimilione lefaseng ka bophara ka kholofelo ye yeo e theilwego Beibeleng. Ka baka leo, ba bantši ba hwetša kholofelo ya kgonthe mehleng ye e gateletšago. Ge o nyaka go hwetša tsebišo e oketšegilego, ikgokaganye le Dihlatse tša Jehofa tikologong ya geno ka go ya Holong ya Mmušo goba o ngwalele atereseng e swanetšego yeo e lokeleditšwego go letlakala 5 la makasine wo. E bile o ka ya Wepesaeteng ya rena ya www.watchtower.org.

[Mengwalo ya tlase]

[Lepokisi go letlakala 16]

THUŠO E TŠWAGO BEIBELENG

● “Le se ke la belaela ka selo, eupša dilong tšohle tsebišang Modimo dikgopelo tša lena ka thapelo le ka topo gotee le ka go leboga; ke moka khutšo ya Modimo yeo e fetago kwešišo yohle ya batho e tla diša dipelo tša lena le matla a lena a monagano ka Kriste Jesu.”—Bafilipi 4:6, 7.

● “Ke ile ka botšiša Jehofa gomme a nkaraba, a ntlhakodiša dipoifong tša ka ka moka.”—Psalme 34:4.

● “Jehofa o kgauswi le ba dipelo tše di robegilego; o phološa ba meoya e nyamilego o šoro.”—Psalme 34:18.

● “O alafa ba dipelo tše di kwelego bohloko, o tlema dintho tša bona tše bohloko.”—Psalme 147:3.

[Lepokisi go matlakala 17, 18]

GE E BA O NAGANA GO IPOLAYA . . .

Botša mogwera wa gago yo o mmotago kamoo o ikwago ka gona

Rapela o ntšhetše Modimo sa mafahleng

Tsoma thušo ya tša kalafo

[Lepokisi/Seswantšho go letlakala 18]

BAKENG SA BAGWERA LE BA LELOKO

Gantši ditho tša lapa le bagwera ba paale ke bona ba mathomo bao ba lemogago gore motho yo a gateletšegilego o nagana go ipolaya. Go gata kgato e itšego go ka šireletša bophelo bja motho yoo! Theetša ka kwelobohloko. Dumela gore mathata ao a kopanago le ona ke a kgonthe. Beibele e re: “Bolelang ka mo go homotšago le bao ba nyamilego.” (1 Bathesalonika 5:14) Kgothaletšang motho yo a gateletšegilego gore a tsome thušo gomme ge go nyakega šalang taba yeo morago go fihlela le bona gore thušo e bjalo e a hwetšagala.