POLEDIŠANO | FENG-LING YANG

Setsebi sa Diphedi tše Dinyenyane se Hlalosa Tumelo ya Sona

BAPALA

Feng-Ling Yang ke motlatša-monyakišiši yo mogolo sekolong se segolo sa tša nyakišišo kua Taipei, Taiwan. Go ngwadilwe ka mošomo wa gagwe dimakasineng tša tša thutamahlale. Mathomong o be a dumela thutong ya tlhagelelo. Eupša ka morago o ile a fetoša monagano. Phafoga! e mmotšišitše ka thutamahlale ya gagwe le tumelo ya gagwe.

Re botše ka setlogo sa gago.

Batswadi ba ka ba be ba diila kudu, le gona mma o be a se a ka a ithuta go bala le ka mohla. Re be re ruile dikolobe le go bjala merogo lefelong leo le bego le hlaselwa ke mafula kgauswi le motse wa Taipei. Batswadi ba ka ba ile ba nthuta bohlokwa bja go šoma ka thata, gomme ba ba ba nthuta le gore ke thuše batho ba bangwe.

Na lapa leno e be e le la bodumedi?

Lapa lešo e be e le la bodumedi bja Tao. Re be re direla yo go bego go thwe ke Modimo wa Legodimo dihlabelo, eupša re be re sa tsebe selo ka yena. Ke be ke fela ke ipotšiša gore: ‘Ke ka baka la’ng batho ba tlaišega? Ke ka baka la’ng batho e le baithati?’ Ke badile dipuku tšeo di bolelago ka Botao le Bobuddha le tšeo di bolelago ka histori ya ka Bohlabela le ya ka Bodikela. Ke ile ka ba ka ya dikerekeng tše mmalwa. Eupša ke be ke sa hwetše dikarabo tša dipotšišo tša ka.

Ke eng seo se dirilego gore o ithutele thutamahlale?

Ke be ke rata dipalo e bile ke kgahlwa ke tsela yeo melao ya tlhago le ya dikhemikhale e laolago kagego ya dilo ka gona. Dilo ka moka, go thoma ka legohle le legolo kudu go fihla ka dibopiwa tše dinyenyane kudu, di na le kagego yeo e laolwago ke melao. Le gona ke be ke nyaka go kwešiša melao yeo.

Ke ka baka la eng o be o dumela gore thuto ya tlhagelelo ke therešo?

Go be go se na selo se sengwe se se fapanego seo ke bego ke se rutwa. Go tloga sekolong se se phagamego go fihla yunibesithing, thuto ya tlhagelelo ke yona feela yeo e bego e rutwa. Le gona ka baka la ge ke be ke le monyakišiši wa tša thutamahlale ya dilo tše di phelago, go be go letetšwe gore ke dumele thuto ya tlhagelelo.

Ka baka la ge ke be ke le monyakišiši wa tša thutamahlale ya dilo tše di phelago, go be go letetšwe gore ke dumele thuto ya tlhagelelo

Ke eng seo se dirilego gore o thome go bala Beibele?

Ke ile ka yo dula Jeremane ka 1996 ge ke yo thoma dithuto tša ka tša ka morago ga ge ke alogile. Ngwageng o latelago ke ile ka kopana le mosadi yo a bitšwago Simone. E be e le yo mongwe wa Dihlatse tša Jehofa, gomme o ile a ithaopela go mpontšha dikarabo tša dipotšišo tša ka ka Beibeleng. Ke ile ka kgahlwa ke ge a be a mpotša gore Beibele e hlalosa morero wa bophelo. Ke ile ka thoma go tsoga ka seripagare go tšwa iring ya bone mesong e mengwe le e mengwe gore ke tšee iri ke bala Beibele. Ke moka ke be ke sepelasepela gore ke naganišiše. Ngwageng o latelago, ke ge ke badile Beibele ka moka. Ke be ke kgahlwa ke go nepagala ga diporofeto tša yona. Ganyenyane-ganyenyane, ke ile ka thoma go kgodišega gore Beibele e tšwa go Modimo.

O be o nagana gore bophelo bo thomile bjang?

Go ba gona, ge ke be ke thoma go naganišiša ka mo go tseneletšego ka taba ye bofelong bja nywaga ya bo-1990, borathutaphedi ba dimolekule ba be ba thoma go lemoga gore dikhemikhale tšeo di lego dilong tše di phelago di raragane kudu go feta kamoo motho le ge e le ofe a kilego a nagana ka gona. Ke therešo gore e be e le kgale borathutamahlale ba tseba gore diprotheine tšeo di lego diseleng tše di phelago ke tšona dimolekule tše di nago le dikhemikhale tše di raraganego kudu go feta tšohle tšeo di lego gona. Eupša bjale, ba be ba utolla kamoo dihlopha ka moka tša diprotheine di rulagantšwego ka gona gore di bope metšhene ya maemo a godimo yeo e nago le dikarolo tše di sepelago. Motšhene wa dimolekule o ka ba o bopša ke diprotheine tše ka godimo ga tše 50. Gaešita le sele e bonolo kudu go feta tšohle e nyaka sehlopha sa metšhene e sa swanego—ka mohlala, bakeng sa gore e tšweletše matla, e kopiše tsebišo le go laola go tsena ga dilo go phatša matlalwaneng.

O ile wa phetha ka gore’ng?

Go ba gona, ke ile ka ipotšiša gore, ‘Go tlile bjang gore metšhene yeo ya diprotheine e hlangwe gabotse gakaakaa?’ Ka nako yeo, go raragana mo go sa letelwago ga dikhemikhale tša disele go be go dira gore borathutamahlale ba bantši ba botšiše potšišo e swanago. Moprofesara wa tshepedišo ya dikhemikhale tša mmele kua United States o ile a gatiša puku yeo e bego e bontšha mabaka a gore metšhene ya dimolekule ya diseleng tše phelago e be e raragane kudu mo e lego gore e be e ka se be gona ka go fo itiragalela. Ke ile ka dumelelana le seo. Ke be ke nagana gore dilo tše di phelago di swanetše go ba di bopilwe.

Ke ile ka ipotšiša gore, ‘Go tlile bjang gore metšhene yeo ya diprotheine e hlangwe gabotse gakaakaa?’

Ke ka baka la eng o ile wa ba yo mongwe wa Dihlatse tša Jehofa?

Ke be ke kgahlwa ke gore le ge Simone a be a na le mathata a tša maphelo, o be a sepela leeto la dikhilomithara tše e ka bago tše 56 beke e nngwe le e nngwe gore a tlo nthuta Beibele. Ke ile ka ithuta gore mehleng ya Bonazi kua Jeremane, Dihlatse tše dingwe di be di golegilwe dikampeng tša tlaišo ka baka la boemagare bja tšona go tša dipolitiki. Ke ile ka kgahlwa kudu ke sebete sa tšona. Go rata ga Dihlatse Modimo go ntirile gore ke nyake go swana le tšona.

Na o hotšwe ke go dumela go Modimo?

Bašomigotee le nna ba mpotša gore ga bjale ke thabile kudu. Ke be ke inyatša ka baka la go gola re diila, ka gona le ka mohla ke be ke sa ka ka botša motho mabapi le moo ke goletšego gona gomme le ka mohla ke be ke sa ke ke bolela ka batswadi ba ka. Eupša ke ithutile go tšwa Beibeleng gore Modimo ga a na taba le maemo a motho setšhabeng. Ge e le gabotse, Jesu o goletše lapeng leo mohlomongwe le bego le diila go swana le la gešo. Ga bjale ke hlokomela batswadi ba ka e bile ke thabela go ba tsebiša bagwera ba ka.