“Ge re be re na le mathata, mosadi wa ka o ile a botša batswadi ba gagwe. Ka morago tatagwe o ile a nkeletša ka bothata bjoo. Seo ga se sa ntshwara gabotse!”—James. *

“Mmatswale wa ka o rata gore, ‘Ke hlologetše morwa wa ka kudu!’ A bolele kamoo ba bego ba tlwaelane ka gona, e lego seo se dirago gore ke ikwe ke le molato ka go nyalana le morwa wa gagwe le go dira gore a dule a hlobaela ka morwa wa gagwe!”—Natasha.

Na go a kgonega go se dumelele mathata ao re nago le ona le mmatswale le ratswale gore a se fetoge mathata a lenyalo?

Lenyalo le bopa lapa le lefsa. Beibele e re monna yo a nyalago “o tla tlogela tatagwe le mmagwe, a kgomarela mosadi wa gagwe.” Go bjalo le ka mosadi tabeng ya batswadi ba gagwe le monna wa gagwe. Ge mosadi a nyalwa, Beibele e re, ba babedi e tla ba “nama e tee.” Ke lapa le lefsa.—Mateo 19:5.

Lenyalo la gago le tla pele ga batswadi ba gago. Moeletši wa tša manyalo John M. Gottman o ngwadile gore: “Selo sa bohlokwa kudu seo banyalani ba swanetšego go ithuta sona ke gore ka mehla ge yo mongwe a dira selo a naganele yo mongwe. Go hlagolela botee le molekane wa gago goba go bo tsošološa go ka akaretša go kgaogana le lapa leno.” *

Batswadi ba bangwe ba ka thatafalelwa ke go dira diphetogo. Monna yo mongwe yo a nyetšego yo e sa lego yo mofsa o re: “Pele re nyalana, mosadi wa ka o be a rata go etiša dikgahlego tša batswadi ba gagwe pele. Ka morago ga ge re nyalane, mmagwe o ile a lemoga gore morwedi wa gagwe o theetša nna go feta yena. Go be go se bonolo gore a amogele seo.”

Ba bangwe bao ba sa tšwago go nyalana ba ka ba le bothata bjo bo swanago. James yo go boletšwego ka yena pejana o re: “Go ba le mmatswale le ratswale ga go swane le go ba le bagwera bao o ikgethetšego bona. Go bjalo ka ge eka motho yo mongwe o go botša gore, ‘O na le bagwera ba babedi ba bafsa, o rata goba o sa rate.’ Gaešita le ge ba go tena ke ba geno!”

Ge e ba wena le molekane wa gago le sa dumelelane ka ditaba tšeo di akaretšago mmatswale le ratswale, lwela gore le rarolle ditaba ka moya wa tirišano. Latela keletšo ya Beibele ya go “tsoma khutšo gomme o e phegelele.”—Psalme 34:14.

Bakeng sa go go thuša go dira bjalo, ela hloko maemo a latelago. Boemo bo ka tšwelela bo šupa mosadi goba monna. Lega go le bjalo, ditlhohlo tše di šoma go motho wa bong le ge e le bofe gomme melao ya motheo yeo e ahlaahlwago e ka go thuša go rarolla mathata a mantši ao o bago le ona le mmatswale le ratswale.

Mosadi wa gago o re o duma ge nkabe o kwana le mmagwe. Eupša wena o hwetša go le thata go dirišana le mmagwe.

Leka se: Boledišana le molekane wa gago ka bothata bjoo, gomme o ikemišetše go dira diphetogo. Taba ga se gore o ikwa bjang ka mmatswale wa gago, eupša ke gore o ikwa bjang ka molekane wa gago—motho yo o ikannego go mo rata. Nakong ya poledišano, nyaka tsela e tee goba tše pedi tšeo o ka kaonefatšago tswalano ya gago le mmatswale gomme o di latele. Ge mosadi wa gago a bona maiteko ao o a dirago, ga go pelaelo gore o tla go hlompha le go feta.—Molao wa motheo wa Beibele: 1 Bakorinthe 10:24.

Monna wa gago o go botša gore wena o rata go kgahliša batswadi ba gago go feta yena.

Leka se: Boledišana le monna wa gago ka bothata bjo gomme o leke go bo bona ka tsela ya gagwe. Ge e le gabotse, monna wa gago ga se a swanela go belaela ge e ba o swara batswadi ba gago gabotse. (Diema 23:22) Lega go le bjalo, go ka nyakega gore o mo kgodiše—ka mantšu a gago le ditiro—gore o etiša yena pele ga batswadi ba gago. Ge e ba monna wa gago a kgodišegile ka seo, ga se gantši a ka ikwa a phadišana le batswadi ba gago ka gore ke mang a tlago pele.—Molao wa motheo wa Beibele: Baefeso 5:33.

Mosadi wa gago o ya go batswadi ba gagwe bakeng sa keletšo go e na le go tla go wena.

Leka se: Boledišana le mosadi wa gago gomme le kwane ka mellwane yeo le swanetšego go e bea. Lwela go ba le tekatekano. Na ka mehla go fošagetše go bolela le motswadi ka bothata bjo itšego? Ke ne’ng moo go ka amogelegago? Ge e ba bobedi bja lena le dumelelana ka mellwane yeo le e beilego, taba ye ga se ya swanela go ba bothata.—Molao wa motheo wa Beibele: Bafilipi 4:5.