Beibele e bolela gore: “Mathomong Modimo o hlodile magodimo le lefase.” (Genesi 1:1) Ga e bolele ka go lebanya mabapi le kamoo Modimo a hlodilego dilo ka moka. Ka gona, gaešita le ge e ba mothuthupo o mogolo o tšweleditše legohle, seo se be se ka se thulane le seo se boletšwego ka Beibeleng. Go e na le moo, Genesi 1:1 e be e tla araba potšišo ya gore, Ke mang yo a bakilego mothuthupo o mogolo?

Ke therešo gore borathutamahlale ba bantši ba dumela gore mothuthupo o mogolo o ile wa fo itiragalela, e lego tiragalo yeo e sa hlahlwego ke motho yeo e ilego ya tšweletša dinaledi le dipolanete ka tekanyo e itšego ya nako. Beibele ga e thekge pono yeo eupša e bolela gore legohle le bile gona ka taelo ya Modimo, go sa šetšwe gore a ka ba a dirišitše mothuthupo o mogolo goba mohuta o itšego wa tlholo.

“Mathomong Modimo o hlodile magodimo le lefase.”—Genesi 1:1.

Ee. Beibele e bolela gore Modimo o bopile dilo tše di phelago “go ya ka mehuta ya tšona.” (Genesi 1:11, 12, 21, 24, 25) Na di ka fapana di etšwa mohuteng o tee? Ee. Lega go le bjalo, na go itlwaelanya le maemo ga diphedi tšeo di tšwago mohuteng o tee go hlatsela gore mafelelong di ka tšweletša mohuta o mongwe o mofsa? Aowa.

Ela hloko mohlala: Ka bo-1970, banyakišiši ba ile ba ithuta ka dinonyana tšeo di bitšwago di-finche dihlakahlakeng tša Galápagos. Ba ile ba lemoga gore go fetoga ga boemo bja leratadima go dirile gore di-finche tša melomo e megolwanyana di kgone go phologa. Ba bangwe ba re se ke bohlatse bja tlhagelelo. Eupša na seo ke bohlatse bja tlhagelelo goba e fo ba go itlwaelanya le maemo? Nywaga ka morago, di-finche tša melomo e menyenyane di ile tša thoma go ata gape. Nyakišišo yeo e dirile gore moporofesara wa thuto ya setlogo sa motho e lego Jeffrey H. Schwartz, a phethe ka gore le ge go itlwaelanya le maemo go ka thuša diphedi gore di phologe nakong ya ge maemo a fetoga, “ga se gore go bopša selo se sengwe se sefsa.”

Beibele e re: “[Modimo] o bopile dilo ka moka.” (Kutollo 4:11) Ga se a “khutša” go fihlela a phetha modiro wa gagwe wa tlholo. (Genesi 2:2) Seo se bolelwago mo se a kwagala: Modimo ga se a bopa sephedi se bonolo ke moka a khutša, ge sephedi seo ka nywaga e dimilione se dutše se tšweletša mehutahuta ya dihlapi, ditšhwene le batho. * Kgopolo e bjalo yeo e bitšwago tlhagelelo ya diphetogo tše dikgolo e thulana le seo Beibele e se bolelago ka Mmopi ge e re o “bopile magodimo le lefase, lewatle le tšohle tše di lego go tšona.”—Ekisodo 20:11; Kutollo 10:6.

“Wena Jehofa Modimo wa rena o swanelwa ke go amogela letago, kgodišo le matla, gobane o bopile dilo ka moka gomme di bile gona le go bopša ka baka la thato ya gago.”—Kutollo 4:11.

Bakeng sa go ithuta ka mo go oketšegilego: Beibele e re “dika tša [Modimo] tše di sa bonagalego di bonwa gabotse go tloga tlholong ya lefase go ya pele, gobane di hlathwa ka dilo tšeo di dirilwego.” (Baroma 1:20) Go ithuta ka Modimo go ka dira gore bophelo bo be le morero, ka gobane o rerile go putsa bohle bao ba mo tsomago ka potego. (Mmoledi 12:13; Baheberu 11:6) Bakeng sa tsebišo e oketšegilego, eya go www.ps8318.com/nso goba o ikgokaganye le Dihlatse tša Jehofa. Lebelela ka tlase ga DITHUTO TŠA BEIBELE > DIPOTŠIŠO TŠA BEIBELE DI A ARABJA.