Mehleng ya Beibele, monna goba ba lapa la gabo ba be ba ntšha tšhelete ya magadi ge ba dumelelane le ba lapa la mosadi wa gagwe. Magadi a be a ka akaretša diphoofolo, tšhelete goba dilo tše bohlokwa. Ka dinako tše dingwe, monna o be a swanetše go šomela ba bo mosadi gore a patele magadi, go swana le Jakobo, yo a ilego a dumela go šomela tatago Ragele ka mengwaga e šupa gore ba kgone go nyalana. (Gen. 29:17, 18, 20) Morero wa go ntšha magadi e be e le ofe?

Carol Meyers e lego seithuti sa Beibele o boletše gore: “Tšhelete ya magadi e be e patelwa babo mosadi ka ge a ka se sa ba šomela, e lego seo se bego se le bohlokwa ka malapeng.” Tšhelete ya magadi e be e dira le gore malapa a mabedi a kwane. Le gona se se be se dira gore malapa a a mabedi thušane ge a na le mathata. Go ntšha tšhelete ya magadi go be go bontšha gore mosadi ga a sa hlokomelwa ke tatagwe eupša o hlokomelwa ke monna wa gagwe.

Tšhelete ya magadi e be e sa bontšhe gore mosadi o a rekišwa goba o a rekwa. Puku ya Ancient Israel—Its Life and Institutions e re: “Kua Isiraeleng go ntšha tšhelete ya magadi go be go bonagala e ka ba bo mosadi ba rekiša morwedi wa bona. Eupša tšhelete ya magadi e be e se go reka mosadi e be e le go leboga ba lapa la gabo.”

Lehono dinageng tše dingwe batho ba sa tšwela pele ba latela molao wa go ntšha magadi. Ge batswadi ba Bakriste ba nyaka tšhelete ya magadi, ba swanetše go dira gore ‘go lekalekana ga bona go tsebje bathong bohle’ ka go se nyake tšhelete e ntši go feta kamoo motho yoo a ka kgonago ka gona. (Bafil. 4:5; 1 Bakor. 10:32, 33) Ge ba dira bjalo ba tla ba ba bontšha gore ga se “barati ba tšhelete,” le gore ga ba na megabaru. (2 Tim. 3:2) Le gona ge batswadi ba Bakriste ba sa nyake tšhelete e ntši ya magadi, monna a ka se gapeletšege gore a emiše lenyalo gore a ye a šome go fihlela a e ba le tšhelete e ntši yeo ba e nyakago. Goba monna ga se a swanela go nagana go tlogela go ba mmulamadibogo wa ka mehla gore a ye a šome gore a tle a kgone go patela tšhelete ya magadi.

Dinageng tše dingwe, ke molao go ntšha tšhelete ya magadi. Batswadi ba Bakriste bao ba dulago dinageng tšeo ba hlompha molao woo. Ka baka la’ng? Lentšu la Modimo le re Bakriste ba swanetše go ‘ikokobeletša balaodi ba bagolo’ le go hlompha melao yeo e sa ganetšanego le Lentšu la Modimo.—Baroma 13:1; Dit. 5:29