Ba Ile ba Bona Gore Phuthego e a ba Rata
YOMARA le bana babo e lego Marcelo le Hiver ba dula motsaneng wa Guatemala. Yomara o ile a thoma go ithuta Beibele le Dihlatse tša Jehofa, gomme bana babo le bona ba ile ba thoma go ithuta. Eupša go be go na le bothata. Ka moka ga bona ba be ba foufetše e bile ba sa kgone go bala mongwalo wa braille. Motho yo a bego a ba ruta Beibele o be a ba balela dirapa le mangwalo a thuto yeo ba bego ba ithuta yona.
Bothata bjo bongwe bjo ba bego ba na le bjona e be e le bja go ya dibokeng. Ba be ba sa kgone go sepela metsotso e 40 go ya Holong ya Mmušo ya kgauswi. Eupša bana babo rena ba ile ba ba thuša gore ba kgone go ya dibokeng ka moka ga tšona. Le gona ge ba be ba thoma go nea dikabelo tša bona dibokeng tša gare ga beke, bana babo rena ba be ba ba thuša gore ba di sware ka hlogo.
Ka May 2019, diboka tša phuthego di ile tša thoma go swarelwa motseng wa gabo bona. Ka nako yeo, banyalani ba bangwe ba babulamadibogo ba be ba hudugetše motseng woo. Le ge banyalani bao ba be ba sa kgone go bala mongwalo wa braille le go o ngwala, eupša ba be ba nyaka go thuša barutwana ba go o bala le go o ngwala. Ba ile ba ya laiprari gore ba ithute mongwalo wa braille le go hwetša tsela e kaone yeo ba ka o rutago batho ba bangwe.
Marcelo o a araba nakong ya diboka
Ka dikgwedi tše sego kae, Yomara le bana babo ba be ba šetše ba kgona go bala mongwalo wa braille, gomme seo se ile sa dira gore ba be le segwera sa kgauswi le Jehofa. a Gona bjale Yomara, Marcelo, le Hiver ke babulamadibogo ba ka mehla. E bile Marcelo ke mohlanka wa bodiredi. Ba swaregile ka go hlankela Jehofa beke ka moka. Ba hlankela Jehofa ka mafolofolo e le gore ba bangwe le bona ba mo hlankele ka mafolofolo.
Ba leboga kamoo phuthego e ilego ya ba bontšha lerato le go ba thekga. Yomara o re, “Ga e sa le go tloga re kopane le Dihlatse tša Jehofa, di be di dutše di re bontšha lerato la nnete la Bokriste.” Marcelo o oketša ka gore, “Phuthegong ya rena re na le bagwera bao ba re ratago e bile re karolo ya lapa leo le ratanago le go ba le botee lefaseng ka moka.” Yomara le bana babo ba fela pelo ya go bona Jehofa a fetoša lefase gore e be paradeise.—Ps. 37:10, 11; Jes. 35:5.
a Poroutšha ya Learn to Read Braille e diretšwe go thuša motho yo a foufetšego goba yo a sa kgonego go bona gabotse gore a ithute go bala le go ngwala mongwalo wa braille.
You May Also Like
KAMOO MENEELO YA LENA E DIRIŠWAGO KA GONA
Mongwalo wa Braille o Fetoša Maphelo
Ga re dire dikgatišo tša Braille fela eupša re ruta le batho go bala Braille.
