Ba bangwe ba Balefi bao e bego e se baperisita ba be ba šoma mešomo e mengwe e bjalo ka go ba maphodisa. Balefi bao ba be ba etelelwa pele ke moetapele wa tempele. Mongwadi yo mongwe wa Mojuda e lego Philo ge a hlalosa e mengwe ya mešomo ya maphodisa ao o itše: “Ba bangwe ba [Balefi] ba ba be ba dula mejakong gomme ba leta dikgoro moo batho ba bego ba tsena gona. Ba bangwe ba be ba dula ka [tempeleng] ka pele ga sekgethwa. Ba be ba kgonthišetša gore ga go na motho yo a tsenago kamoo a sa swanelege, le gore ga go na motho yo a tsenago kamoo ka phošo. Ba bangwe ba be ba šiedišana ka go sepelasepela go dikologa tempele gore ba e hlokomele bošego le mosegare.”

Lekgotla la Sanhedrine le be le ka kgopela maphodisa a thušo. Maphodisa a e be e le sehlopha se nnoši sa Bajuda seo mmušo wa Roma o bego o se dumeletše go swara dibetša.

Seithuti sa Beibele e lego Joachim Jeremias, o hlalosa gore ge bahlankedi ba itšego ba be ba etla go swara Jesu, Jesu o ile a ba botšiša gore ke ka baka la eng ba se ba mo swara ge a be a ruta tempeleng. (Mat. 26:55) Jesu o be a ka se botšiše potšišo ye ge nkabe bahlankedi bao e be e se karolo ya maphodisa a tempeleng. Le gona, Joachim o nagana gore bahlankedi bao ba bego ba nyaka go golega Jesu pejana ga moo, le bona e be e le maphodisa a tempeleng. (Joh. 7:32, 45, 46) Ka morago, lekgotla la Sanhedrine le ile la laela moetapele wa tempele gotee le ba bangwe ba bahlankedi bao gore ba tliše baapostola go bona. Go bonagala e be e le maphodisa a tempeleng ao a ilego a gogela moapostola Paulo ka ntle ga tempele.—Dit. 4:1-3; 5:17-27; 21:27-30.