RURI go bontšhwa botho go ka re kgothatša le go re homotša! Re a thaba ge re bona gore go na le motho yo a nago le taba le rena. Ka ge yo mongwe le yo mongwe wa rena a rata go swarwa ka botho, re ka dira’ng gore re be le seka se se sebotse?

Go ba botho go akaretša go ba le taba le batho ba bangwe, le go bontšha seo ka mantšu le ka ditiro. Ka ge botho bo bontšhwa ka ditiro, ga se gwa lekana go no bontšha mekgwa e mebotse feela gore re bonwe ke batho. E le gore re bontšhe botho e le ka kgonthe, re swanetše go ba le lerato le le tseneletšego le kwelobohloko. Le gona seka se ke se sengwe sa dika tšeo di enywago ke moya wa Modimo, gomme Bakriste ba botšwa gore ba bontšhe dika tšeo. (Bagal. 5:22, 23) Re swanetše go bontšha botho, ka gona a re ithuteng kamoo Jehofa le Morwa wa gagwe ba bontšhitšego seka se le kamoo re ka ekišago mohlala wa bona.

Jehofa o bontšha batho ka moka botho le go ba naganela, go akaretša le bao “ba sa lebogego le ba kgopo.” (Luka 6:35) Ka mohlala, Jehofa o “hlabišetša ba kgopo le baloki letšatši la gagwe gomme a nešetša ba ba lokilego le ba sa lokago pula.” (Mat. 5:45) Ka baka leo, le bao ba sa dumelego gore Jehofa ke Mmopi wa bona ba holwa ke dilo tšeo a re neago tšona gore re phele le go ipshina ka bophelo.

Tsela yeo Jehofa a ilego a dirišana le Adama le Efa ke mohlala o mogolo wa botho. Ka moragonyana ga gore Adama le Efa ba dire sebe, ba ile “ba rokaganya matlakala a mogo ba khupetša bofeela bja bona.” Lega go le bjalo, Jehofa o be a tseba gore ba tlo hloka diaparo tša maleba gore ba kgone go phela ka ntle ga serapa sa Edene, moo mmu o bego o rogakilwe ka go mela “meetlwa le dimela tše di hlabago.” Ka botho Jehofa o ile a ba direla “diaparo tše telele tša letlalo.”​—Gen. 3:7, 17, 18, 21.

Jehofa o bontšha batho “ba lokilego le ba sa lokago” botho, eupša o nyaka go bontšha botho kudukudu go bahlanka ba gagwe bao ba mmotegelago. Ka mohlala, mehleng ya moporofeta Sakaria, morongwa wa Jehofa o ile a nyama kudu ge a be a bona gore batho ga ba sa tšwela pele ka modiro wa go aga lefsa tempele ya kua Jerusalema. Jehofa o ile a theetša morongwa yoo gomme a mo araba ka “mantšu a mabotse le a homotšago.” (Sak. 1:12, 13) Jehofa o ile a dirišana le moporofeta Eliya ka tsela e swanago. Ka nako e nngwe moporofeta yo o ile a gateletšega kudu moo a ilego a kgopela Jehofa gore a mmolaye. Jehofa o ile a kwa sello sa Eliya ke moka a romela morongwa gore a mo matlafatše. Le gona Jehofa o ile a kgonthišetša moporofeta yoo gore ga se a mo lahla. Ka morago ga gore Eliya a kwe mantšu ao a mabotse le go hwetša thušo yeo a bego a e hloka, o ile a kgona go tšwela pele ka kabelo ya gagwe. (1 Dikg. 19:1-18) Ke mang gare ga bahlanka ba Modimo yo a re beetšego mohlala o mobotse kudu wa go bontšha botho go swana le Jehofa?

Ge Jesu a be a le mo lefaseng, o be a tsebja ka go ba botho le go naganela batho. O be a se bogale e bile a sa gatelele batho. O ile a bolela ka kwelobohloko a re: “Tlang go nna, lena bohle bao le lapišitšwego le go imelwa, ke tla le lapološa. . . . Gobane joko ya ka e botho.” (Mat. 11:28-30) Batho ba ile ba bona gore Jesu o na le botho gomme ba mo šala morago kae le kae moo a bego a eya gona. Ka ge Jesu a be a ba “šokela,” o ile a ba fepa, a fodiša balwetši le digole gotee le go ruta batho “dilo tše dintši” ka Tatagwe.​—Mar. 6:34; Mat. 14:14; 15:32-38.

Go bontšha gore Jesu o be a le botho, o be a kwešiša batho e bile a dirišana le bona gabotse. Ge e le gabotse, le ge batho ba be ba mo šitela, Jesu o be a ba amogela ka “botho” ge ba be ba nyaka thušo ya gagwe. (Luka 9:10, 11) Ka mohlala, mosadi yo a bego a se a hlweka go ya ka Molao wa Moshe o ile a kgwatha seaparo sa Jesu sa ka ntle a holofela gore o tla fola bolwetši bja ngope. Mosadi yoo o be a tšhogile kudu eupša Jesu ga se a ka a mo kgalemela. (Lef. 15:25-28) Ka ge Jesu a be a kwela bohloko mosadi yo yoo a bego a feditše mengwaga e 12 a tlaišega, o ile a re go yena: “Morwedi wa ka, tumelo ya gago e go fodišitše. Sepela ka khutšo gomme o fole bolwetšing bja gago bjo bohloko.” (Mar. 5:25-34) Ruri Jesu o ile a bontšha mosadi yo botho!

Mehlaleng ye re boletšego ka yona ka mo godimo, re kgona go bona gore botho bja kgonthe bo bontšhwa ka ditiro. Jesu o bontšhitše bohlokwa bja go bontšha botho ka ditiro ge a be a bolela ka papišo ya Mosamaria wa kgaugelo. Gaešita le ge Basamaria le Bajuda ba be ba sa kwane, monna wa Mosamaria wa papišong ye o ile a kwela bohloko monna yo a ilego a wela gare ga bahlakodi, ba mo itia gomme ba mo tlogela a le kgauswi le go hwa. Botho bo ile bja dira gore monna yoo wa Mosamaria a dire se sengwe. O ile a tlema dintho tša monna yoo ke moka a mo iša ntlong ya baeti. Ke moka Mosamaria yoo a lefa mohlokomedi wa ntlo ya baeti gore a hlokomele monna yo a gobetšego a ba a ithaopela gore o tla boa a lefa ge go ka ba le ditshenyagalelo tše dingwe.​—Luka 10:29-37.

Le ge gantši re bontšha botho ka ditiro, re ka bo bontšha le ka mantšu ao a bontšhago gore re naganela ba bangwe. Ke ka baka leo Beibele e rego: “Pelaelo e lego pelong ya motho e tla e imela, eupša lentšu le lebotse le tla e thabiša.” (Die. 12:25) Ge re bontšha ba bangwe botho e bile re dira dilo ka toko, re tla ba kgothatša gomme seo se tla ba thuša gore ba thabe. * Mantšu a rena a botho a tla bontšha gore re na le taba le bona. Ka ge re tla be re ba kgothaditše, ba tla kgona go kgotlelela diteko.​—Die. 16:24.

Ka ge re bopilwe ka ‘seswantšho sa Modimo’ ka moka ga rena re ka kgona go bontšha botho. (Gen. 1:27) Ka mohlala, Juliase e lego lešole la Moroma leo le bego le hlokometše moapostola Paulo ge a be a eya Roma, o ile a swara moapostola yo “ka botho, a mo dumelela go ya go bagwera ba gagwe gore ba mo hlokomele” kua motseng wa Sidone. (Dit. 27:3) Ka moragonyana, badudi ba Melite ba ile ba bontšha Paulo le ba bangwe “botho bjo bo fetago bjo bo tlwaelegilego” ge ba be ba robegetšwe ke sekepe. Batho ba moo sehlakahlakeng ba ile ba ba goletša mollo gore ba ruthele. (Dit. 28:1, 2) Ba be ba dirile selo se sebotse kudu, eupša motho yo a nago le botho e le ka kgonthe ga se a swanela go dira selo se sebotse gatee feela.

E le gore re kgahliše Modimo, re swanetše go bontšha botho ka mehla. Ke ka baka leo Jehofa a rego re ‘apare’ botho. (Bakol. 3:12) Lega go le bjalo, re a tseba gore ga go bonolo gore re bontšhe seka se. Ka baka la’ng? Re ka  dikadika go bontšha batho ba bangwe botho ka gobane re na le dihlong, re sa ikholofele, re tlaišwa goba ka dinako tše dingwe re sa na le boithatinyana. Eupša re ka fenya mathata ao ka go kgopela thušo ya moya o mokgethwa le ka go ekiša tsela yeo Jehofa a bontšhago botho ka yona.​—1 Bakor. 2:12.

Na go na le mo re ka kaonefatšago gona tabeng ya go bontšha botho? Re swanetše go ipotšiša gore: ‘Na ke theetša ka kwelobohloko ge batho ba bolela le nna? Na ke kgona go lemoga ge ba bangwe ba hloka thušo? Ke neng la mafelelo moo ke ilego ka bontšha botho go motho yo e sego wa gešo goba mogwera wa ka?’ Ka morago ga go araba dipotšišo tše, re ka ipeela dipakane tša go swana le go nyaka go tseba gakaone batho bao re phelago le bona, kudukudu bao re kopanelago le bona ka phuthegong. Ka go dira bjalo re tla kgona go tseba maemo a bona le dilo tšeo ba di hlokago. Ke moka re ka leka go bontšha ba bangwe botho ka ditsela tšeo re bego re ka rata go bontšhwa botho ka tšona ge nkabe re le maemong a bona. (Mat. 7:12) Jehofa o tla re thuša go bontšha botho ge e ba re mo kgopela gore a re thuše.​—Luka 11:13.

Ge moapostola Paulo a be a bolela dika tšeo di bontšhago gore ke mohlanka wa Modimo, o ile a bolela le ka seka sa “botho.” (2 Bakor. 6:3-6) Batho ba be ba rata Paulo ka gobane o be a bontšha gore o na le taba le bona, gomme o ile a bontšha seo ka ditiro tša gagwe tše botho le ka mantšu. (Dit. 28:30, 31) Ka mo go swanago, le rena re ka dira gore batho ba rate therešo ka go bontšha botho. Ge re bontšha batho ka moka botho, go akaretša le bao ba re ganetšago, seo se ka dira gore ba se sa ba bogale kudu gomme ba thoma go re bontšha botho. (Baroma 12:20) Ge nako e dutše e eya, ba ka ba ba nyaka go ithuta Beibele.

Lefaseng la Paradeise batho ba bantši kudu bao ba tla bego ba tsošitšwe bahung ba tla thabela go bontšhwa botho, mohlomongwe e tla ba e le la mathomo ba bontšhwa botho. E le go bontšha gore ba a leboga, le bona ba tla ikwa ba nyaka go bontšha ba bangwe botho. Motho le ge e le ofe yo a sa nyakego go bontšha ba bangwe botho goba go ba thuša a ka se phele Paradeiseng ka mo go sa felego. Ka lehlakoreng le lengwe, bao Modimo a bonago ba swanelwa ke go phela ka mo go sa felego ba tla swarana ka lerato le ka botho. (Ps. 37:9-11) Ruri re tla ba re phela lefaseng leo le šireletšegilego le leo le nago le khutšo ya kgonthe! Lega go le bjalo, pele nako yeo e fihla, gona bjale re ka holwa bjang ke go bontšha botho?

Beibele e re: “Motho yo botho o šetša moya wa gagwe.” (Die. 11:17) Batho ba rata motho yo a lego botho, e bile gantši ba bontšha motho yo bjalo botho. Jesu o itše: “Kelo yeo le elago ka yona, le lena ba tla le elela ka yona.” (Luka 6:38) Ka gona, motho yo a lego botho o kgona go hwetša bagwera gabonolo e bile segwera sa bona se a swarelela.

Moapostola Paulo o ile a kgothaletša bao e bego e le ditho tša phuthego ya Efeso gore ‘ba bontšhane botho, ba šokelane ka bonolo e bile ba lebalelane ka bolokologi.’ (Baef. 4:32) Ditho tša phuthego di holega kudu ge bohle ka phuthegong ba le botho e bile ba rata go thušana. Batho ba bjalo ga ba nke ba nagana ka go diriša mantšu a go hlaba, a go nyatša ba bangwe goba a go ba gegea. Go e na le go tšama ba seba batho ba bangwe, ba diriša maleme a bona go thuša ba bangwe. (Die. 12:18) Ka gona seo se dira gore phuthego e tie gomme e hlankele Jehofa e thabile.

Ruri botho ke seka seo re se bontšhago ka mantšu le ka ditiro. Ge re le botho, re ekiša semelo se sebotse sa Modimo wa rena e lego Jehofa. (Baef. 5:1) Ge re bontšha botho re tla matlafatša diphuthego tša gabo rena le go dira gore ba bangwe ba amogele borapedi bja therešo. Anke ka mehla re dule re tsebja ka go ba le botho!