NA O TSEBA ngwanabo rena goba kgaetšedi yo a hudugetšego nageng e šele moo go nyakegago bagoeledi ba oketšegilego ba Mmušo? Gantši Dihlatse tše bjalo re bolela gore di ile tlhokagalong. Na o kile wa ipotšiša gore: ‘Ke’ng seo se ba tutueletšago go hlankela dinageng dišele? Ba dira’ng gore ba kgone go tsenela mohuta wo wa tirelo? Na le nna nka kgona go tšea karolo go wona?’ Tsela e botse ya go hwetša dikarabo tša dipotšišo tšeo ke gore re boledišane le bana babo rena bao le dikgaetšedi. Bjale a re direng bjalo.

Ke’ng seo se dirilego gore o thome go nagana ka go hlankela nageng e šele moo go nyakegago bagoeledi ba oketšegilego? Amy, yo a lego nywageng ya bo-30, o tšwa United States. O re: “Ke feditše nywaga e mentši ke nagana ka go hlankela nageng e šele, eupša ke be ke bona nka se tsoge ke kgonne.” Ke’ng seo se fetotšego pono ya gagwe? O re: “Ka 2004, banyalani bao ba bego ba hlankela kua Belize ba ile ba re ke ba etele gomme ke bule madibogo le bona ka kgwedi e tee feela. Ke ile ka dira bjalo gomme ka thabela bobulamadibogo! Ka morago ga ngwaga, ke ile ka hudugela Ghana go yo hlankela ke le mmulamadibogo.”

Nywageng e fetilego, Stephanie, yo ga bjale a lego nywageng ya bo-20 yo le yena a tšwago United States, o ile a lebeledišiša maemo a gagwe gomme a ipotša gore: ‘Ke phetše gabotse mmeleng e bile ga ke na boikarabelo ka lapeng. Ge e le gabotse, nka dira mo go oketšegilego tirelong ya Jehofa go feta gona bjale.’ Go itlhahloba mo go bjalo go ile gwa mo tutueletša gore a hudugele Ghana e le gore a šomele Jehofa kudu. Filip le Ida, e lego banyalani ba babulamadibogo bao ba tšwago Denmark, ba be ba dutše ba nagana ka go hudugela tšhemong yeo go nyakegago bagoeledi ba oketšegilego. Ba ile ba nagana ka ditsela tšeo ba ka phethagatšago kganyogo yeo ya bona. Filip o re: “Ge sebaka se bulega, go ile gwa ba bjalo ka ge eka Jehofa o re go rena, ‘Eyang!’” Ka 2008 ba ile ba hudugela Ghana gomme ba hlankela moo ka nywaga ya ka godimo ga e meraro.

 Hans le Brook, e lego banyalani ba babulamadibogo bao ba lego nywageng ya bo-30 ba hlankela United States. Ka 2005 ba ile ba thuša modirong wa tlhakodišo ka morago ga gore ledimo la Katrina le hlasele naga yeo. Ka morago, ba ile ba tlatša difomo tša go kgopela go thuša medirong ya go aga dinageng dišele eupša ba se bitšwe. Hans o gopola ka gore: “Ge re be re le kopanong, re ile ra kwa polelo yeo e bego e bolela ka Kgoši Dafida gore o ile a dumela ge Jehofa a be a re a ka se mo dumelele go aga tempele, ka gona a fetoša pakane ya gagwe. Ntlha yeo e ile ya re thuša go bona gore ga se phošo go phegelela dipakane tše dingwe tirelong ya Jehofa.” (1 Dikor. 17:1-4, 11, 12; 22:5-11) Brook o oketša ka gore: “Jehofa o be a nyaka gore re kokote mojakong o mongwe.”

Ka morago ga go kwa diphihlelo tšeo di kgahlišago go tšwa go bagwera ba bona bao ba bego ba hlankela dinageng dišele, Hans le Brook ba ile ba tutueletšega go leka go bula madibogo nageng e šele. Ka 2012 ba ile ba ya Ghana gomme ba hlankela moo ka dikgwedi tše nne ba thuša phuthegong ya polelo ya diatla. Le ge ba ile ba swanelwa ke gore ba boele United States, monate wo ba o kwelego kua Ghana o ile wa dira gore ba dule ba etiša Mmušo pele. Go tloga ka nako yeo ba ile ba thuša ka go aga ofisi ya lekala kua Micronesia.

O ile wa dira’ng gore o kgone go hlankela moo go nyakegago bagoeledi ba oketšegilego? Stephanie o re:“Ke ile ka dira nyakišišo ka dihlogong tša Morokami tšeo di bolelago ka go hlankela moo go nyakegago bagoeledi ba oketšegilego. * Le gona ke ile ka boledišana le bagolo ba phuthegong ya gešo le molebeledi wa tikologo le mosadi wa gagwe ka kganyogo ya ka ya go hlankela nageng e šele. Go feta tše ka moka, ke be ke botša Jehofa pakane ya ka gantši.” Ka nako e swanago, Stephanie o ile a nolofatša bophelo bja gagwe, e lego seo se ilego sa mo thuša go boloka tšhelete ya gore a tle a kgone go itlhokomela ge a hlankela nageng e šele.

 Hans o re: “Re ile ra rapela Jehofa gore a re hlahle ka gore re be re nyaka go ya moo a bego a nyaka gore re ye gona. Le gona re ile ra botša Jehofa letšatši leo re nyakago go huduga ka lona.” Banyalani ba ba ile ba romela diofisi tše nne tša makala mangwalo a bona. Ka morago ga gore ofisi ya lekala ya Ghana e ba arabe, ba ile ba ya moo, ba ipoditše gore ba yo fetša dikgwedi tše pedi feela. Hans o re: “Re ile ra thabela go šoma le phuthego ya moo kudu, moo re ilego ra hlankela moo nako e teletšana.”

George le Adria, e lego banyalani ba Canada bao ba lego nywageng ya bo-30, ba be ba tseba gore Jehofa o šegofatša diphetho tše dibotse, e sego feela maikemišetšo a mabotse. Ka gona ba ile ba gata megato ya go fihlelela pakane ya bona. Ba ile ba ikgokaganya le kgaetšedi yo a bego a hlankela moo go nyakegago bagoeledi ba oketšegilego kua Ghana gomme ba mmotšiša dipotšišo tše dintši. Le gona ba ile ba ngwalela ofisi ya lekala ya kua Canada le ya kua Ghana mangwalo. Adria o re: “Ka morago ga moo, re ile ra nolofatša bophelo bja rena go feta kamoo re bego re dirile.” Diphetho tšeo di ile tša ba thuša go hudugela Ghana ka 2004.

Ke mathata afe ao o ilego wa ba le ona ge o se na go huduga, le gona o ile wa a rarolla bjang? Bothata bja mathomo bja Amy e be e le go hlologela gae. O re: “Dilo ka moka di be di fapane le tšeo ke bego ke di tlwaetše.” Amy o ile a thušwa ke eng? O re: “Ditho tša lapa lešo di be mphounela gomme di mpotša gore di leboga tirelo ya ka gomme seo se ile sa nthuša go dula ke gopola lebaka la ka la go hudugela moo. Ka morago nna le lapa lešo re ile ra thoma go boledišana inthaneteng. Ka ge re be re bonana bidiong, lapa lešo le ile la se sa bonagala  le le kgole.” Amy o re go gwerana le kgaetšedi wa moo go ile gwa mo thuša go tlwaela ditšo tša moo. O re: “Mogwera wa ka o ile a ba motho yo ke ithekgago ka yena. Nako le nako ke be ke botšiša yena ge ke sa kwešiše lebaka leo batho ba moo ba dirago dilo ka tsela e itšego. O ile a nthuša go tseba dilo tšeo ke swanetšego go di dira le tšeo ke swanetšego go di phema, e lego seo se ilego sa nthuša go thabela tirelo ya ka.”

George le Adria ba re ge ba be ba eya Ghana la mathomo, ba ile ba ikwa eka ba boetše mehleng ya kgale. Adria o re: “Go e na le go hlatswa ka motšhene, re be re šomiša dipakete. Go apea go be go bonala go tšea ngwaga go feta kamoo re bego re tlwaetše ka gona. Eupša ge nako e dutše e eya, re ile ra tlwaela.” Brook o re: “Ka ntle le mathata ao rena babulamadibogo re kopanago le ona, re ipshina ka bophelo. Ge re kopanya diphihlelo tše di kgahlišago tšeo re bilego le tšona tirelong, di ba bjalo ka matšoba a mabotsana.”

Ke ka baka la’ng o kgothaletša ba bangwe gore ba tsenele mohuta wo wa tirelo? Stephanie o re: “Go šoma tšhemong yeo batho ba tlogago ba rata go ithuta therešo moo ba bilego ba nyaka gore o bale le bona letšatši le lengwe le le lengwe go a thabiša. Go yo hlankela moo go nyakegago bagoeledi ba oketšegilego e bile e nngwe ya diphetho tše dibotse tšeo ke di dirilego!” Ka 2014, Stephanie le Aaron ba ile ba nyalana gomme lehono ba hlankela ofising ya lekala ya Ghana.

Christine, e lego mmulamadibogo yo a tšwago Jeremane, yo ga bjale a lego nywageng ya bo-30 o re: “E tloga e le phihlelo e botse kudu.” Christine o hlanketše kua Bolivia pele a hudugela Ghana. O oketša ka gore: “Ka ge ke le kgole le ba lapa la gešo, ke dula ke rapela Jehofa gore a nthuše. Ke wa kgonthe go nna go feta peleng. Ke bile ke thabela botee bjo bo makatšago bjo bo lego gona gare ga batho ba Jehofa. Tirelo ye e dirile gore ke thabele bophelo.” Christine o sa tšwa go nyalana le Gideon, gomme ba tšwela pele ba hlankela kua Ghana.

Filip le Ida ba re botša seo ba se dirilego go thuša dithuto tša bona tša Beibele gore di dire tšwelopele. Ba re: “Re kile ra ba le dithuto tša Beibele tše 15 goba go feta moo, eupša re ile ra di fokotša gore e be tše 10 e le gore re kgone go ruta barutwana ba rena gabotse.” Na barutwana bao ba ile ba holega? Filip o re: “Ke be ke bala le lesogana leo le bitšwago Michael. Re be re kgona go bala letšatši le lengwe le le lengwe e bile o be a lokišetša gabotse moo re ilego ra fetša go ithuta puku ya Seo Beibele e se Rutago ka kgwedi e tee. Ka morago ga moo, Michael o ile a ba mogoeledi yo a sa kolobetšwago. Letšatšing la gagwe la mathomo tšhemong, o ile a mpotšiša gore: ‘Na o ka nthuša ka dithuto tša ka tša Beibele?’ Ke ile ka mo lebelela ke maketše. Michael o ile a mpotša gore o be a bala Beibele le batho ba bararo gomme a nyaka gore ke mo thuše go swara thuto le batho bao.” Efo nagana​—ka tsela yeo bagoeledi ba nyakegago—​gaešita le barutwana ba Beibele ba na le dithuto tša Beibele!

Amy o hlalosa gore o ile a lemoga kapejana gore go nyakega bagoeledi ba oketšegilego nageng yeo. O re: “Ka moragonyana ga gore re fihle Ghana, re ile ra šoma tšhemo motsaneng o itšego gomme ra tsoma difoa. Ga se ra hwetša sefoa se tee feela, eupša re ile ra hwetša tše seswai motsaneng woo!” Ge nako e dutše e eya, Amy o ile a nyalana le Eric, gomme ba hlankela e le babulamadibogo ba kgethegilego. Ba hlankela phuthegong ya polelo ya diatla go thuša ba bangwe ba bagoeledi ba difoa ba fetago 300 gotee le batho ba bangwe ba difoa bao ba thabelago ba nageng yeo. George le Adria ba ile ba latswa seo go ba moromiwa go lego sona ka go hlankela kua Ghana. Nagana gore ba ile ba thaba bjang ge ba be ba laletšwa go tla klaseng ya bo-126 ya Sekolo sa Gilead! Lehono ba hlankela e le baromiwa kua Mozambique.

Go a kgothatša go bona batho ba bantši bao ba tšwago dinageng tše dingwe ba šoma ka thata gotee le bana babo rena le dikgaetšedi ba dinageng tšeo ba hudugetšego go tšona gore ba bune. (Joh. 4:35) Batho ba e ka bago ba 120 ba a kolobetšwa kua Ghana bekeng e nngwe le e nngwe. Go fo swana le batho ba ba 17 bao ba hudugetšego Ghana go yo thuša moo go nyakegago bagoeledi ba oketšegilego, baebangedi ba bantši lefaseng ka moka ba tutueditšwe ke go rata Jehofa gore ba ‘ithaope.’ Ba hlankela mafelong ao go nyakegago bagoeledi ba oketšegilego ba Mmušo. Ruri baithaopi ba ba thabiša pelo ya Jehofa!​—Ps. 110:3; Die. 27:11.