Bothata Bja Kgateletšego ya Monagano Lefaseng ka Moka

BAPALA

“Ke dula ke belaela le ge ke dutše ke nnoši ka kamoreng.”

“Ge nka no thaba kudu ke thoma go tšhoga. Ke a tseba gore ka mehla ge ke thabile ke feleletša ke nyamile.”

“Letšatši le lengwe le lengwe ke leka go nagana ka dilo tšeo di diregago letšatšing leo eupša ka dinako tše dingwe ke thoma go belaela ka dilo tše dingwe tše dintši.”

Na wena goba motho yo o mo tsebago o ile a ikwa ka tsela ye?

Kgodišega gore ga o nnoši. Batho ba bantši lehono ba kgongwa ke kgateletšego ya monagano, e ka ba e le bona ba gateletšegilego goba batho bao ba ba ratago.

Ga go pelaelo gore re phela dinakong tše di “hlobaetšago tšeo go lego thata go lebeletšana le tšona” tšeo di dirago gore re dule re belaela. (2 Timotheo 3:1) Nyakišišong e nngwe go hweditšwe gore lefaseng ka moka motho o tee go ba 8 o na le kgateletšego ya monagano. Ka baka la COVID-19, ka 2020 diperesente tša batho bao ba nago le bothata bja go belaela di ile tša oketšega ka diperesente tše 26 go feta ka 2019, mola tša bao ba gateletšegilego kudu monaganong di oketšegile ka diperesente tše 28.

Go bohlokwa go tseba gore ke batho ba bakae bao ba na go le bothata bja go belaela le bao ba gateletšegilego monaganong lehono. Eupša go bohlokwa kudu go tseba gore wena le batho bao o ba ratago le ikwa bjang.

Boemo bjo bobotse bja monagano ke eng?

Boemo bjo bobotse bja monagano ke ge o ikwa o thabile e bile o phetše gabotse. Ge o kgona go lebeletšana le mathata ao a tlwaelegilego, o šoma gabotse le go kgotsofalela bophelo.

Bolwetši bja monagano

GA SE ditlamorago tša mafokodi a rena.
KE bolwetši bjo bo dirago gore o gateletšege kudu monaganong, le go laola tsela yeo o naganago ka yona goba maikwelo a gago le tsela yeo o dirago dilo ka yona.
Ka dinako tše dingwe bo ka dira gore go be thata go ba le segwera le ba bangwe le go dira mediro e mengwe ya letšatši le letšatši.
Bo ka swara batho ba mehuta ka moka go sa šetšwe mengwaga, ditšo, merafo, madumedi, gore ba rutegile goba ga se ba rutega goba maemo a bona a tša ditšhelete.

O ka hwetša thušo ya bolwetši bja monagano

Ka dinako tše dingwe motho a ka thoma go dira dilo ka tsela yeo e sa tlwaelegago, a thoma go se sa robala gabotse, go ja gabotse, go ikwa a belaela kudu goba go nyama. Ge e ba wena goba motho yo o mo ratago a ka diragalelwa ke se, ke ga bohlale gore le hwetše thušo. Eupša o ka ya kae gore o hwetše thušo?

Monna yo bohlale go feta batho ka moka yo a ilego a phela, Jesu Kriste, o ile a re: “Batho ba ba phetšego gabotse ga ba nyake ngaka, eupša ba babjago ba a e nyaka.” (Mateo 9:12) Go hwetša thušo le dihlare tše di swanetšego go ka thuša bao ba babjago gore ba be kaone le go phela bophelo bjo thabišago. Ke ga bohlale gore ba se ke ba goga maoto ge ba bona maswao a bolwetši a sa kgaotše e bile a mpefala. a

Le ge Beibele e se puku ya tša kalafo e na le dikeletšo tšeo di ka re thušago gore re dule re phetše gabotse monaganong. Re go mema gore o lebelele dihlogo tše di latelago tšeo di bontšhago kamoo Beibele e ka re thušago go lebeletšana le mathata a tša monagano.

a Morokami wo ga o kgothaletše kalafo e itšego. Motho yo mongwe le yo mongwe o swanetše go itirela nyakišišo e tseneletšego pele a dira phetho.