GE E BA le wena o kile wa welwa ke kotsi ya tlhago, o ka ba o kwešiša kamoo bao e kilego ya ba wela ba ilego ba ikwa ka gona: Ba ile ba ikwa ba tšhogile, ba sa kgolwe seo se diragetšego, ba gakanegile, ba hlobaela e bile ba eba le ditoro tša go tšhoša. Ba bantši ba bona ba gateletšega kudu moo ba se sa nyakago go tšwela pele ka bophelo.

Ge e ba le wena o wetšwe ke kotsi ya tlhago, o ka ikwa o gateletšegile kudu moo o se sa nyakago go tšwela pele ka bophelo. E bile o ka ba wa ipotšiša gore o sa phelela eng. Lega go le bjalo, Beibele e re bophelo bja gago bo bohlokwa, e bile e re nakong e tlago mathata ao a lego mo lefaseng a tlo fela.

Mmoledi 7:8 e re: “Pheletšo ya taba e phala mathomo a yona.” Ka morago ga kotsi ya tlhago, o ka ikwa o se sa na tshepo. Eupša ge o ka se lahlele toulo, dilo di tla boela sekeng.

Beibele e re nakong e tlago “go ka se sa kwala sello goba sello sa manyami.” (Jesaya 65:19) Seo se tlo direga ge Mmušo wa Modimo o tla be o buša mo lefaseng. Ka nako yeo, lefase ka moka e tlo ba Paradeise. (Psalme 37:11, 29) Go ka se sa ba le dikotsi tša tlhago. Le gona re ka se sa kwa bohloko bjo bo bakwago ke dikotsi tša tlhago, ka gore Modimo Ramatlaohle o re tshepiša gore: “Dilo tša pele di ka se sa gopolwa, e bile di ka se sa rotoga pelong.”—Jesaya 65:17.

E no nagana feela! Modimo, yena Mmopi wa rena, o go holofetša bophelo bjo bo se nago mathata ge go tla be go buša yena mo lefaseng. (Jeremia 29:11) Na go tseba taba ye go ka go thuša go tšwela pele ka bophelo le ge o na le mathata? Ee. Sally, yoo go boletšwego ka yena sehlogong sa mathomo o re: “Ge o ka dula o ikgopotša ka dilo tše dibotse tšeo Mmušo wa Modimo o tlago go re direla tšona, seo se tla go thuša go lebala ka mašuana gomme wa tšwela pele ka bophelo.”

Ithute ka mo go oketšegilego ka dilo tšeo Mmušo wa Modimo o tlago go re direla tšona kgauswinyane. Ge o ka dira bjalo, o tlo kgona go tšwela pele ka bophelo go sa šetšwe mathata ao a go wetšego, gomme wa tla wa hwetša bophelo bja go hloka mathata bjoo Modimo a re tshepišitšego bjona. Eupša ge o sa letetše seo, Beibele e ka go thuša go kgotlelela mathata ao o a baketšwego ke kotsi ya tlhago. A re kwe ka mehlala e sego kae.