“Mpho e nngwe le e nngwe e botse le neo e nngwe le e nngwe e phethagetšego e tšwa godimo, e theoga e etšwa go Tate wa dietša tša legodimo.” (Jakobo 1:17) Lengwalo le le bolela ka go fana kudu ga Tatago rena wa legodimong e lego Jehofa Modimo. Lega go le bjalo, go dimpho tše dintši tšeo Modimo a di neilego batho, go na le yeo e di fetago ka moka. Mpho yeo ke efe? Mantšu a Jesu ao a tsebegago kudu ao a lego go Johane 3:16, a re: “Gobane Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.”

Mpho e tšwago go Modimo ya Morwa wa gagwe yo a tswetšwego a nnoši, ke mpho e kgolokgolo yeo mang le mang wa rena a ka e hwetšago ka gobane ka yona re ka kgona go lokologa bokgobeng bja sebe, botšofadi le lehu. (Psalme 51:5; Johane 8:34) Le ge re be re ka leka ka gohle, ga go na seo re ka se dirago ka borena gore re lokologe bokgobeng bjoo. Lega go le bjalo, ka ge Modimo a re rata kudu, o re neile seo se nyakegago e le gore re lokologe. Jehofa Modimo o dirile gore batho bao ba kwago ba be le tebelelo ya bophelo bjo bo sa felego ka go nea Morwa wa gagwe yo a tswetšwego a nnoši, e lego Jesu Kriste, e le topollo. Eupša ge e le gabotse topollo ke eng? Ke ka baka la’ng e le bohlokwa? Le gona e ka re hola bjang?

Topollo ke tefo yeo e lefšago go rekolla selo seo se lahlegilego goba go lokolla motho bokgobeng. Beibele e hlalosa gore batswadi ba rena ba pele e lego Adama le Efa ba be ba bopilwe ba se na sebe, e bile ba na le tebelelo ya go thabela bophelo bjo bo sa felego paradeiseng mo lefaseng gotee le bana bao ba bego ba tla ba le bona. (Genesi 1:26-28) Ka manyami, ba ile ba lahlegelwa ke dilo tšeo ka moka ka ge ba ile ba kgetha go se kwe Modimo, ka go re’alo ya ba badiradibe. Mafelelo e bile afe? Beibele e re: “Ka motho o tee sebe se tsene lefaseng gomme lehu la tsena ka sebe, ka go re’alo lehu le aparetše batho bohle gobane bohle ba dirile sebe.” (Baroma 5:12) Go e na le gore Adama a fetišetše bophelo bjo bo phethagetšego go bana ba gagwe, o ile a ba fetišetša sebe le ditlamorago tša sona, e lego lehu.

Tabeng ya topollo, seo se lefšago se swanetše go lekana le seo se lahlegilego. Ge Adama a be a kgetha go se kwe Modimo ka boomo, o ile a dira sebe gomme a lahlegelwa ke go phela bophelo bjo bo phethagetšego. Go ya ka Beibele, seo se ile sa dira gore bana ba Adama e be makgoba a sebe le lehu. Ka gona, go ile gwa nyakega gore go gafiwe bophelo bja motho yo mongwe yo a phethagetšego, e lego bophelo bja Jesu, bjo bo ilego bja gafša e le sehlabelo gore re lokologe bokgobeng bjoo. (Baroma 5:19; Baefeso 1:7) Ka go rata, Modimo o ile a lefa topollo yeo e le gore batho ba ka ba le tebelelo ya go tlo thabela seo se lahlegetšego Adama le Efa, e lego bophelo bjo bo sa felego paradeiseng mo lefaseng.—Kutollo 21:3-5.

Ka baka la seo topollo e se fihleletšego, ga gona pelaelo gore mpho ye ya Modimo, yeo e dirago gore bophelo bjo bo sa felego bo kgonege, ke mpho e kgolokgolo go di feta ka moka. E le gore re thabele “mpho e phethagetšego” go etša ge go bontšhitšwe sehlogong se se fetilego, anke re boneng gore ke bjang mpho ye e kgolokgolo e re thušago go nea dimpho tšeo di holago.

E kgotsofatša kganyogo ya rena. Rena batho re na le kganyogo ya tlhago ya go phela ka mo go sa felego. (Mmoledi 3:11) Ka ge re ka se kgone go kgotsofatša  kganyogo yeo ka borena, topollo e dira gore seo se kgonege. Beibele e re: “Gobane moputso woo sebe se o lefago ke lehu, eupša mpho yeo Modimo a e neago ke bophelo bjo bo sa felego ka Kriste Jesu Morena wa rena.”—Baroma 6:23.

E kgotsofatša senyakwa sa rena. Batho ba be ba ka se kgone go fana ka topollo. Beibele e hlalosa gore: “Tefo ya go lopolla moya wa bona e godimo kudu moo e dutšego e le bjalo go iša mehleng ya neng le neng.” (Psalme 49:8) Ka gona, re be re tloga re hloka thušo ya Modimo e le gore re lokologe bokgobeng bja sebe le lehu. Eupša “ka go lokollwa ka topollo yeo e lefilwego ke Kriste Jesu,” Modimo o ile a nea seo se bego se tloga se nyakega.—Baroma 3:23, 24.

E neilwe ka nako e swanetšego. Beibele e re: “Ge re be re sa le badiradibe Kriste o ile a re hwela.” (Baroma 5:8) Topollo e re kgonthišetša gore Modimo o re rata kudu go sa šetšwe boemo bja rena bja go ba badiradibe, ka ge a re neile yona “ge re be re sa le badiradibe.” Gape topollo e dira gore go be le dilo tše dintši tšeo re fagahlelago go tlo di bona, le ge re swanelwa ke go kgotlelela ditlamorago tša sebe.

E bontšha maikemišetšo a mabotse le a go hloka boithati. Ge Beibele e hlalosa seo se ilego sa tutueletša Modimo gore a fane ka Morwa wa gagwe e le topollo e re: “Re utolletšwe lerato la Modimo ka se, gobane Modimo o rometše Morwa wa gagwe yo a tswetšwego a nnoši lefaseng gore re hwetše bophelo ka yena. Lerato le ka tsela ye, ga se gore rena re ratile Modimo, eupša yena o re ratile.”—1 Johane 4:9, 10.

O ka bontšha bjang gore o tšeela godimo mpho e kgolokgolo ya go di feta ka moka? Gopola gore mantšu a Jesu go Johane 3:16 a bontšha gore go tlo phološwa feela bao ba “dumelago go yena.” Go ya ka Beibele, tumelo ke “tebelelo e kgonthišeditšwego ya seo se holofetšwego.” (Baheberu 11:1) E le gore re be le kgonthišego yeo, go bohlokwa gore re be le tsebo e nepagetšego. Ka lebaka leo, re go kgothaletša gore o iphe nako ya go ithuta ka Jehofa Modimo, e lego Monei wa “mpho ye e phethagetšego,” le go ithuta seo o swanetšego go se dira gore o thabele bophelo bjo bo sa felego bjo topollo ya sehlabelo sa Jesu e dirilego gore bo kgonege.

O ka ithuta ka tše ka moka ka go hlahloba tsebišo ya Mangwalo yeo e hwetšwago wepesaeteng ya www.ps8318.com/nso. Dihlatse tša Jehofa di ka thabela go go thuša. Re kgodišegile gore ge o tšwela pele o ithuta ka mpho ye e kgolokgolo le go hwetša mehola ya yona, o tla tutueletšega go bolela ka go hlaboša gore: “A go lebogwe Modimo ka Jesu Kriste Morena wa rena!”—Baroma 7:25.