Don le Margaret * ba thabetše go etelwa ke morwedi wa bona a na le lapa la gagwe. Pele ba sepela, Margaret yoo e lego setsebi sa go apea seo se rotšego modiro, o lokišetša go ba apeela makarone le tšhese, e lego dijo tšeo ditlogolo tša gagwe tše pedi di di ratago.

Ge ka moka ba dutše fase, Margaret o ile a tla le dijo gomme a di bea tafoleng. Ge a di khuromolla, o ile a nyamišwa ke ge ka sebjaneng e be e no ba tšhese e tologilego ya go fiša. Margaret o be a lebetše go tšhela selo sa bohlokwa e lego makarone! *

Ka moka ga rena re dira diphošo, go sa šetšwe gore re na le mengwaga e mekae goba tsebo e kaakang. Re ka bolela selo se itšego ka go se šetše goba ra dira selo se itšego ka nako yeo e sego ya maleba, goba mohlomongwe ra lebala go dira selo se itšego. Ke ka baka la’ng re dira diphošo? Re ka lebeletšana bjang le tšona? Na re ka phema go dira diphošo? Go ba le pono e botse ka diphošo go tla re thuša go araba dipotšišo tše.

Ge re dira selo se itšego gabotse, re thabela go retwa le go ikwa re swanelwa ke theto yeo. Ge re dira diphošo, le ge e se ka maikemišetšo goba di sa bonwe ke batho ba bangwe, re swanetše go amogela gore re dirile phošo. Go nyakega boikokobetšo gore re kgone go dira seo.

Ge re ka ikgopola kudu re ka leka go nyenyefatša diphošo tša rena, ra leka go bea ba bangwe molato goba ra se amogele diphošo tša rena. Boitshwaro bjo bjalo gantši bo ba le ditlamorago tše di sa kgahlišego. Bothata bo ka dula bo sa rarollwa, e bile batho ba bangwe ba ka bewa molato go sa swanela. Le ge re ka no se hwetše ditlamorago tša diphošo tša rena, re swanetše go dula re gopola gore mafelelong, “yo mongwe le yo mongwe wa rena o tla ikarabela go Modimo.”—Baroma 14:12.

Modimo o na le pono e lekalekanego ka diphošo. Ka pukung ya Dipsalme, Modimo o hlaloswa e le yo a ‘gaugelago le yo a šokelago’ le gore “a ka se dule a nyaka diphošo ka dinako tšohle, le gona a ka se dule a befetšwe go iša mehleng ya neng le neng.” O a tseba gore batho ga se ba phethagala e bile o kwešiša mafokodi a rena le gona o a “gopola gore re lerole.”—Psalme 103:8, 9, 14.

Go oketša moo, Modimo bjalo ka tate yo a gaugelago, o nyaka gore rena bana ba gagwe re be le pono e swanago le ya gagwe ka diphošo. (Psalme 130:3) Lentšu la gagwe le nea keletšo le tlhahlo e ntši yeo e re thušago go lebeletšana le diphošo tša rena gotee le tša ba bangwe.

Gantši ge motho a dirile phošo, a ka fetša nako e ntši le matla a latofatša ba bangwe goba a lokafatša seo a se boletšego goba a se dirilego. Go e na le go dira seo, ge o kgopišitše motho yo mongwe, ke ka baka la’ng o sa no mo kgopela tshwarelo gomme wa lokiša phošo ya gago ke moka wa boloka segwera sa lena se tiile? Na o kile wa dira phošo yeo e ilego ya tsenya wena goba motho yo mongwe mathateng? Go e na le go ikgalefela goba go latofatša batho ba bangwe, ke ka baka la’ng o sa no dira sohle se o ka se kgonago  go lokiša boemo? Go dulela go gapeletša gore ga se wena o dirilego phošo go ka senya ditaba le go feta le go gakatša bothata. Go e na le moo, ithute phošong ya gago, o e lokiše ke moka o tšwele pele ka bophelo.

Lega go le bjalo, gantši ge motho yo mongwe a dira phošo, go bonolo gore re tenege. Go bohlokwa kudu go latela keletšo ya Jesu Kriste ge a be a re: “Ka baka leo, dilo tšohle tše le nyakago batho ba le dira tšona, le lena le ba dire tšona.” (Mateo 7:12) Ga go pelaelo gore ge o dira phošo, le ge e ka ba e nyenyane o duma ge ba bangwe ba ka go šokela goba gaešita le go lebala ka phošo yeo ka mo go feletšego. Bjale, ke ka baka la’ng o sa leke ka gohle go bontšha batho ba bangwe botho bjo bjalo?—Baefeso 4:32.

Pukuntšu e nngwe e hlalosa gore “diphošo di bakwa ke go ba le kahlolo e fošagetšego, go se tsebe dilo ka botlalo goba go se šetše.” Ga go pelaelo gore nako le nako motho yo mongwe le yo mongwe o bontšha se sengwe sa dika tše. Lega go le bjalo, re ka fokotša go dira diphošo ka go ela hloko e mengwe ya melao ya motheo yeo e lego ka Mangwalong.

Molao o mongwe wa motheo o hwetšwa go Diema 18:13, yeo e rego: “Ge motho a fetola taba pele a ka ekwa, o bontšha bošilo gomme o a inyatšiša.” Go kwa taba ka botlalo le go šetša tsela yeo o arabelago ka yona go tla go thuša go phema go akgofela go bolela goba go tšea kgato o sa nagana. Go theetša ka kelohloko go bohlokwa ka ge go tla re thuša go phema go ahlola ka tsela e fošagetšego le go phema go dira diphošo.

Molao o mongwe wa motheo wa Beibele o re: “Ge e ba go kgonega, go fihla moo go ithekgilego ka lena, ebang le khutšo le batho bohle.” (Baroma 12:18) Dira sohle seo o ka se kgonago go kgothaletša moya wa khutšo le wa tirišano. Ge o šoma le ba bangwe, dirišana le bona ka botho le ka tlhompho gomme o leke go ba reta le go ba kgothatša. Ge o dirišana le batho ka tsela yeo, go tla ba bonolo gore ba go lebalele ge o boletše goba o dirile selo se itšego ka go se šetše, gomme diphošo tše dikgolo tša rarollwa ka botho.

Leka go bona ge e ba o ka ithuta se sengwe go tšwa diphošong tša gago. Go e na le go nyaka sehlare sa ntšhirela bakeng sa seo o se boletšego goba o se dirilego, tšea se e le sebaka se sebotse sa go go thuša go tšweletša dika tše dibotse. Na mohlomongwe go nyakega gore o be le kgotlelelo, botho goba boitshwaro kutšwanyana? Go thwe’ng ka go ba le seka sa boleta, sa khutšo le sa lerato? (Bagalatia 5:22, 23) Nakong e tlago, o tla ithuta ganyenyane-ganyenyane seo o sa swanelago go se dira. O se ke wa tshwenyega kudu ka taba ya gore wena o ikwa bjang goba gore seo se go kgoma bjang. Go dira metlae goba go segasega go ka fokotša kgateletšego.

Go ba le pono e botse ka diphošo go tla re thuša go lebeletšana le tšona gabotse. Re tla ba le khutšo ya ka gare le go phedišana le ba bangwe ka khutšo kutšwanyana. Ge re leka go ithuta go tšwa diphošong tša rena, re tla ba bohlale le gona batho ba bangwe ba tla re rata kudu. Le ka mohla re ka se ke ra nyama ka mo go feteletšego goba ra nagana gore re batho ba babe. Go lemoga gore batho ba bangwe le bona ba lebeletšana le diphošo tša bona go tla re batametša kgauswi le bona. Sa bohlokwa le go feta re ka holwa ke go ithuta go ekiša lerato la Modimo le maikemišetšo a gagwe a go lebalela ka bolokologi.—Bakolose 3:13.

Na phošo ya Margaret yeo go boletšwego ka yona pejana, e ile ya senya pokano ya lapa? Le gatee. Seo se ile sa dira gore batho ka moka ba sege, kudukudu Margaret, ke moka ba thabela dijo tšeo le ge di be di se na makarone. Mengwageng e latetšego, ditlogolo tše pedi tša Margaret di ile tša hlalosetša bana ba tšona ka dijo tšeo tša lapa tšeo di sa lebalegego le go gopola dinako tše dibotse tšeo ba di thabetšego le makgolo le rakgolo wa bona. Go ba gona, seo Margaret a se dirilego e be e no ba phošo!