BAKENG SA BANYALANI
3: Hlomphanang
SEO SE RA GO RE’NG?
Banyalani bao ba hlomphanago ba dula ba ratana le ge ba sa dumelelane ka selo se itšego. Puku ya Ten Lessons to Transform Your Marriage e re: “Banyalani ba bjalo ba tsoma ditsela tša go thekgana le ge ba sa dumelelane ka selo se itšego. Ge ba na le bothata, ba boledišana ka bjona gore ba bo rarolle. Ba theetšana ka tlhompho ge ba boledišana gomme ba fihlelela phetho yeo e ba kgotsofatšago ka moka.”
MOLAO WA MOTHEO WA BEIBELE: “Lerato . . . ga le nyake tša go ikhola.”—1 Bakorinthe 13:4, 5.
Micah o re: “Go bontšha gore ke hlompha mosadi wa ka, ke theetša dikgopolo tša gagwe e bile ga ke nyake go dira selo seo se tla mo kwešago bohloko goba sa senya lenyalo la rena.”
KE KA BAKA LA ENG GO HLOMPHANA GO LE BOHLOKWA?
Ge banyalani bao ba sa hlomphanego ba boledišana, ba dula ba swayana diphošo, ba kwerana gaešita le go nyatšana, e lego maswao ao banyakišiši ba rego a bontšha gore banyalani ba kgauswi le go hlalana.
Brian o re: “Ge o sa bolele gabotse le mosadi wa gago, o mo kgadimola goba o dira metlae ka yena, seo se dira gore a inyatše, a se sa ikholofela e bile se senya lenyalo la lena.”
SEO O KA SE DIRAGO
ITLHAHLOBE
Tšea beke o hlahloba tsela yeo o bolelago le molekane wa gago ka yona le yeo o dirago dilo ka yona. Ka morago ga moo, ipotšiše gore:
-
‘Ke sotše molekane wa ka gakae, gona ke mo retile gakae?’
-
‘Ke bontšhitše molekane wa ka ka ditsela dife gore ke a mo hlompha?’
BOLEDIŠANA LE MOLEKANE WA GAGO KA DIPOTŠIŠO TŠE
-
Ke ditiro dife le mantšu afe ao le naganago gore a tla bontšha gore le a hlomphana?
-
Ke ditiro dife le mantšu afe ao a dirago gore le ikwe le sa hlomphane?
DITŠHIŠINYO
-
Ngwala ditsela tše tharo tšeo ka tšona o ka ratago gore molekane wa gago a go bontšhe tlhompho. Botša molekane wa gago gore a dire se se swanago. Bontšhanang seo le se ngwadilego gomme le leke go bontšhana tlhompho dilong tšeo.
-
Ngwala dilo tšeo o di ratago ka molekane wa gago, ke moka o mmotše gore o kgahlwa ke seo a se dirago.
Megan o re: “Ke bontšha monna wa ka gore ke a mo hlompha ka ditiro le gore ke nyaka gore a thabe. E bile gantši ga go hlokagale gore ke dire dilo tše dikgolo go bontšha gore ke a mo hlompha.”
Ka gona ipotšiše gore na molekane wa gago o bona o mo hlompha goba o sa mo hlomphe, go e na le go ipotša gore o a mo hlompha.
MOLAO WA MOTHEO WA BEIBELE: “Aparang lerato leo le bonagatšago lešoko, botho, boikokobetšo, boleta le go se fele pelo.”—Bakolose 3:12.
You May Also Like
PHAFOGA!
Kamoo o ka Bontšhago Tlhompho ka Gona
Tlhompho ga se ya swanela go bontšhwa ka sewelo lenyalong
PHAFOGA!
Kamoo o ka Bontšhago Tebogo
Ge monna le mosadi ba dira maiteko a go lemoga le go tšeela godimo dika tše dibotse tša yo mongwe le yo mongwe wa bona, gantši segwera sa bona se a kaonefala. O ka thušwa ke eng gore o bontšhe tebogo?
PHAFOGA!
Kamoo go ka Phengwago Polelo e Gobatšago
O ka dira’ng ge e ba wena le molekane wa gago le dumeletše mantšu a gobatšago a kgoma tswalano ya lena?
