Batho bao ba nago le mekgwa e mebotse, ba kgona go tseba phapano magareng ga selo se sebotse le se sebe. Batho bao ga ba no bontšha mekgwa e mebotse go ithekgile ka gore ba ikwa bjang ka nako yeo. Eupša ba phela ka melao yeo ba e rutilwego yeo e ba thušago go ba le mekgwa e mebotse le ge batho ba bangwe ba sa ba bone.

Bana ba kwa dilo tše dintši tše di fošagetšego mabapi le go bontšha mekgwa e mebotse. Ba ka di kwa go batho bao ba tsenago le bona sekolo, mminong, dimubing goba mananeong a TV. Dilo tšeo ba di kwago di ka dira gore ba se sa kwešiša gabotse gore mekgwa e mebotse ke efe gomme e mebe ke efe.

Bothata bjo re boletšego ka bjona ka mo godimo, gantši bo diragalela bafsa. Ge Puku ya Beyond the Big Talk e bolela ka bafsa e re: “Ba swanetše go kwešiša gore batho ba bangwe ba ka ba gapeletša gore ba phele ka tsela e itšego e le gore batho ba ba rate. Le gona ba swanetše go ithuta go dira dilo tšeo ba tsebago gore di nepagetše gaešita le ge bagwera ba bona ba ka se thabe.” Ka gona, go bohlokwa gore batswadi ba rute bana ba bona mekgwa e mebotse e sa le ba banyenyane.

Mo rute phapano magareng ga mekgwa e mebotse le e mebe.

KELETŠO YA BEIBELE: “Batho ba ba godilego moyeng, . . . ba [tlwaeditše] matla a bona a go hlatha ka go a diriša, e le gore ba kgethologanye se se nepagetšego le se se fošagetšego.”—Baheberu 5:14.

• Mmotše gore ke mekgwa efe e lego e mebotse le gore ke efe e lego e mebe. Dira seo ka go mmontšha dilo tšeo di diregago letšatši le letšatši ke moka o mo hlalosetše gore: “Ge o dira se o bontšha gore o a tshepega, eupša ge o dira se o bontšha gore ga o tshepege.” “Ge o dira se o bontšha gore o na le botho, eupša ge o dira se o bontšha gore ga o na botho.” Ge nako e dutše e eya, ngwana wa gago o tlo ithuta gore ke dilo dife tšeo a swanetšego go di dira le gore ke dife tšeo a sa swanelago go di dira.

• Hlalosetša ngwana gore gore’ng o re mokgwa o itšego ke o mobotse eupša o itšego ke o mobe. Ka mohlala, mmotšiše dipotšitšo tša go swana le gore: “Ke ka baka la’ng o swanetše go botega? Go bolela maaka go ka senya segwera bjang? Ke ka baka la’ng go utswa go fošagetše?” Hlalosetša ngwana gabotse gore a tle a kgone go tseba mekgwa e mebotse le e mebe.

• Hlalosetša ngwana mehola ya go ba le mekgwa e mebotse. Mohlomongwe o ka re: “Ge e ba o tshepega, batho ba bangwe ba tlo go tshepa” goba “Ge e ba o rata batho, le bona ba tlo go rata.”

 Dira gore lapa la gago le tsebege ka go ba le mekgwa e mebotse.

KELETŠO YA BEIBELE: “Dulang le itlhatsela seo lena ka noši le lego sona.”—2 Bakorinthe 13:5.

• Lapa la gago le swanetše go tsebega ka go ba le mekgwa e mebotse, e le gore o tle o kgone go bolela o se na dihlong gore:

  • “Ka lapeng le ga re bolele maaka.”

  • “Ga re bethe ba bangwe goba ra ba omanya.”

  • “Ga re rogane goba ga re bolele le batho gampe.”

Ngwana wa gago o tlo bona gore mekgwa yeo e mebotse ga e no ba mekgwa yeo a swanetšego go phela ka yona, eupša ke mekgwa yeo e dirago gore lapa la gago le tume gabotse.

• Fela o boledišana le ngwana wa gago ka mekgwa e mebotse. Ruta ngwana wa gago mekgwa e mebotse o diriša dilo tšeo di diregago letšatši le letšatši. O ka bapiša mekgwa e mebotse yeo o mo rutago yona le yeo e bontšhwago thelebišeneng goba le yeo a e bonago sekolong. Mmotšiše dipotšišo tša go swana le gore: “Wena nkabe o ile wa dira’ng?” “Lapa la rena nkabe le ile la dira’ng?”

Gatelela bohlokwa bja go ba le mekgwa e mebotse.

KELETŠO YA BEIBELE: “Ebang le letswalo le lebotse.” —1 Petro 3:16.

• Mo rete ge a itshwere gabotse. Ge ngwana wa gago a dirile selo se itšego se sebotse, mo rete o be o mmotše gore ke ka baka la eng o mo reta. Ka mohlala, o ka mmotša gore: “O a tshepega. Ke ikgantšha ka wena.” Ge e ba ngwana wa gago a go botša gore o dirile phošo e itšego, pele o ka mo kgala, mo rete gore o boletše nnete.

• Mo phošolle ge a se a itshwara gabotse. Thuša ngwana wa gago go amogela diphošo tša gagwe. Ngwana o swanetše go tseba gore o dirile phošo ge a etla kae le gore seo se fapana bjang le melao ya ka gae. Batswadi ba bangwe ba tšhaba go kgala bana ba bona ka gore ba tšhaba go ba nyamiša. Eupša ge batswadi ba kgala bana ba bona, ba ba thuša go tlwaetša letswalo la bona gore nakong e tlago ba se sa bušeletša phošo yeo ba e dirilego.