Dipotšišo tše Tšwago go Babadi

Go Ba-Roma 12:19, (PK), na moapostola Paulo o be a bolela gore Bakriste ga se ba swanela go galefa ge a be a re: ‘Barategi ba-ka, le se ke la itefeletša ka noši, eupša le nee bogale sebaka’?

Ge re bolela ka go tia, aowa. Mo moapostola Paulo o be a bolela ka kgalefo ya Modimo. Ee, se ga se bolele gore ga go na taba ge e ba Bakriste ba ineela kgalefong. Beibele e re eletša ka mo go kwagalago mabapi le go ba ba bogale. Ela hloko mohlala wa keletšo ya Modimo.

“Lesa xo xalefa, O ilê lehlôyô; xe O ka selekêxa O tlo bá wa senya.” (Psalme 37:8) “Mang le mang e a befêlêlwaxo ngwan’abô ka lefêla, o tlo swanêlwa ke kahlolô.” (Mateo 5:22) “Medirô ya nama yôna e pepeneneng; ké thlalô, le bootswa, le dithšila, le bohlôtlôlô. Ké xo hlankêla medimo, le boloi, le thlôyanô, le dintwa, le pefêlô, le boxale.” (Ba-Galatia 5:19, 20) “Tše e kexo ké sekxoro, le bonaba, le mašata, le maroxa, a di bê kxolê le lena.” (Ba-Efeso 4:31) “Motho a a akxofišê xo kwa, a diêxê xo bolêla, a diêxê xo xalefa.” (Jakobo 1:19) Go feta moo, puku ya Diema e re eletša leboelela mabapi le go ineela kgalefong goba go ba bao ba sekametšego go galefa ka melato e menyenyane le diphošo tša batho.​—Diema 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.

Taba e dikologilego Ba-Roma 12:19 e mabapi le keletšo e bjalo. Paulo o ile a kgothaletša gore lerato la rena e se be la boikaketši, e le gore re šegofatše bao ba re tlaišago, gore re leke go nagana gabotse ka ba bangwe, gore re se ke ra lefetša bobe ka bobe le gore re katanele go ba le khutšo le batho ka moka. Ka gona o ile a kgothatša ka gore: “Baratwa ba-ka! Le se kê la itefeletša; šuthêlang boxale bya Modimo; xobane xo ngwadilwe xwa thwe: Tefetšô ké ya-ka, le kôtlô ké ya-ka, O r’yalo Morêna.”​—Ba-Roma 12:9, 14, 16-19.

Ee, ga se ra swanela go dira gore bogale bo re tutueletše go itefeletša. Tsebo ya rena ka maemo le maikwelo a rena ka toka ga se tša phethagala. Ge e ba re tlogelela kgalefo gore e re tutueletše ditirong tša tefetšo, gantši re tla dira diphošo. Seo e tla ba go phetha morero wa Lenaba la Modimo, Diabolo. Paulo mafelong a mangwe o ngwadile gore: “Xe Le xalefa Le se kê la senya; a letšatši le se dikêlê Lè sa xalefile. ’Me Le se kê la šuthêla Diabolo sebaka.”​—Ba-Efeso 4:26, 27.

Tsela e kaone le e bohlale ke go tlogelela Modimo gore a dire phetho ya gore ke neng le gona ke go mang moo tefetšo e swanetšego go tlišwa. A ka dira bjalo ka tsebo e feletšego ya ditherešo, gomme tefetšo le ge e le efe yeo a tla e dirago e tla bontšha toka ya gagwe e phethagetšego. Re ka bona gore ye ke ntlha ya Paulo go Ba-Roma 12:19 ge re lemoga tšhupetšo ya gagwe go Doiteronomio 32:35, 41 yeo e akaretšago mantšu a rego: “Tefetšô ké ya-ka, le kôtlô ké ya-ka.” (Bapiša le Ba-Hebere 10:30.) Ka gona, gaešita le ge mantšu “a Modimo” a sa hwetšwe mongwalong wa Segerika, bafetoledi ba mmalwa ba mehleng yeno ba ile ba tsenya “ya Modimo” go Ba-Roma 12:19. Yeo e balegago ka gore “a Modimo a lefetše” (The Contemporary English Version); “neela kgalefo ya Modimo sebaka” (American Standard Version); “a Modimo a nee kotlo ge e ba a ka kgona” (The New Testament in Modern English); “tlogelela tefetšo ya Modimo sebaka.”​—The New English Bible.

Gaešita le ge re swarwa gampe goba re tlaišwa ke manaba a therešo, re ka bontšha go bota ga rena tlhaloso ya Jehofa Modimo yeo Moše a e kwilego yeo e rego: “Morêna, Morêna, Modimo yo mabobo le kxauxêlô, wa xo se fêlê pelo, wa botho byo boxolo le therešô. Wa xo bolokêla ba dikete-kete botho, wa xo lebalêla batho bokxôpô le dikaroxô le dibê; fêla, a se kê a lesa xo ôtla mosenyi.” (Mongwalo o sekamego ke wa rena.)​—Ekisodo 34:6, 7.