Boipobolo bjo bo Lebišago Phodišong

“XOBANE mola kè homotše, mašapô a-ka a bodile ka xo hlwa kè tsetsêla, ka xo imêlwa ke ’atla sa xaxo mosexare le bošexo; ’me matla a-ka a phšile bo-ka kômêlêlô ya selemo.” (Psalme 32:​3, 4) Mantšu ao a kgomago kudu a ka ba a bontšhitše bohloko bjo bo tseneletšego bja maikwelo bjo bo ilego bja kwewa ke Kgoši Dafida wa Isiraele ya bogologolo, e lego bohloko bjo a itlišeditšego bjona ka go uta sebe se segolo go e na le gore a se bolele.

Dafida e be e le monna wa bokgoni bjo bogolo. E be e le mohlabani yo bogale, mokgoma yo a nago le bokgoni, sereti le seopedi. Lega go le bjalo, o be a sa ithekga ka bokgoni bja gagwe eupša o be a ithekgile ka Modimo wa gagwe. (1 Samuele 17:​45, 46) O hlalositšwe e le monna yoo pelo ya gagwe e bego e “êma le Morêna ka botlalô.” (1 Dikxoši 11:4) Eupša sebe se tee seo a se dirilego se be se solega kudu, gomme a ka be a be a šupa go sona go Psalme 32. Re ka ithuta mo gontši ka go hlahlobišiša maemo ao a lebišitšego sebeng sa gagwe. Re tla lemoga mafokodi ao re ka a phemago gotee le go bona go nyakega ga go ipobola dibe tša rena e le gore re tsošološe tswalano ya rena le Modimo.

Kgoši e Botegago ka go se Kwanantšhe e Ile ya Wela Sebeng

Setšhaba sa ba-Isiraele se be se tšwile lesolo la tša bohlabani malebana le ba-Amoni, eupša Dafida o be a dutše Jerusalema. Mantšiboeng a mangwe ge a be a itshepelela ka godimo ga tlhaka ya ntlo ya gagwe ya bogoši, o ile a bona mosadi yo mobotse a hlapa ka legaeng la kgaufsi. O ile a palelwa ke go bontšha go itshwara eupša a thoma go mo kganyoga ka phišego. Ge a tsebile gore ke Batseba, mosadi wa Uria, Uria yo e lego mohlabani madireng a gagwe, Dafida o ile a bitša mosadi yoo gomme a dira bootswa le yena. Ge nako e fetile Batseba o ile a tsebiša Dafida gore o imile.​—2 Samuele 11:​1-5.

Dafida o be a tantšwe. Ge sebe sa bona se be se ka pepentšhwa, kotlo ya bona ka bobedi e be e tla ba lehu. (Lefitiko 20:​10) Ka gona o ile a loga leano. O ile a bitša monna wa Batseba e lego Uria gore a boe ntweng. Ka morago ga go mmotšiša ka mo go tletšego mabapi le ntwa, Dafida o ile a laela Uria gore a boele gae. Dafida o be a holofela gore se se be se tla dira gore go bonagale eka Uria e be e le tatago ngwana wa Batseba.​—2 Samuele 11:​6-9.

Uria ga se a ka a ya go mosadi wa gagwe, e lego seo se ilego sa nyamiša Dafida. Uria o boletše gore go be go sa kgonege gore a boele gae mola madira a be a kgotleletše mathata a ntwa. Ge madira a ba-Isiraele a be a le lesolong la tša bohlabani, banna ba be ba phema go ba le dikopano tša botona le botshadi gaešita le basadi ba bona. Ba be ba swanetše go dula ba hlwekile go ya ka tša dikiletšo. (1 Samuele 21:5) Ke moka Dafida o ile a laleletša Uria dijong gomme a dira gore a tagwe, eupša lega go le bjalo ga se a ka a ya gae go mosadi wa gagwe. Boitshwaro bja potego bja Uria bo ile bja pepentšha sebe se segolo sa Dafida.​—2 Samuele 11:​10-13.

Dafida o ile a tatetšwa kudu ke moreo wa sebe sa gagwe ka noši. A le tlalelong o ile a bona tharollo e tee feela. O ile a romela Uria gore a boele ntweng le lengwalo le le yago go molaodi wa madira Joaba. Morero wa lengwalo le lekopana e be e le o kwagalago gabotse: “Uria mo etišeng pele ka mo thlabanô e lego e thata; Le mo lahletšê a bolawê a hwê.” Ka lengwalo, go ile gwa bonagala kgoši e matla e khupeditše ditiro tša yona, ka go romela Uria gore a yo bolawa.​—2 Samuele 11:​14-17.

Kapejana ka morago ga ge lebaka la Batseba la go llela monna wa gagwe le fetile, Dafida o ile a mo nyala. Nako e ile ya feta gomme ngwana wa  bona o ile a belegwa. Ditiragalong tše ka moka, Dafida o ile a fo ikhomolela mabapi le dibe tša gagwe. Mohlomongwe o be a leka go lokafatša ditiro tša gagwe ka noši. Na Uria ga se a hwa ka tsela e hlomphegago ntweng bjalo ka ba bangwe? Go oketša moo, na ga se gore o ile a se kwe kgoši ya gagwe ka go gana go ya go mosadi wa gagwe? ‘Pelo ya mmata-maano-mabe’ e tla diriša mehuta ka moka ya go bea mabaka bakeng sa go leka go lokafatša sebe.​—Jeremia 17:9; 2 Samuele 11:25.

Megato e Fošagetšego e Lebišago Sebeng

Ke bjang Dafida, morati wa go loka, a bego a ka ikgoboša boitshwarong ka go dira bootswa le ka go bolaya? Go molaleng gore dipeu tša sebe sa gagwe di be di bjetšwe ka lebaka le letelele. Re ka ipotšiša lebaka leo ka lona Dafida a bego a se go banna ba gagwe le go ba thekga lesolong la bona la tša bohlabani malebana le manaba a Jehofa. Ka mo go fapanego, Dafida o be a iketlile ntlong ya gagwe ya bogoši, moo a bego a sa nagane selo ka tša ntwa, e lego seo ge nkabe a ile a se dira se ka bego se ile sa tloša ka mo go feletšego kganyogo ya gagwe e fošagetšego ya go duma mosadi wa mohlabani yo a botegago. Lehono, go swarega ga Bakriste ba therešo ka mafolofolo go phegeleleng dilo tša moya le diphuthego tša gabo bona le go ba le karolo ka mehla modirong wa boebangedi go a ba šireletša.​—1 Timotheo 6:12.

Kgoši ya mo-Isiraele e be e laetšwe go dira kopi ya Molao le go o bala letšatši le letšatši. Beibele e nea lebaka bakeng sa se: “Xore a ithutê xo boifa Morêna Modimo wa xaxwe, a hlôkômêlê tše di bolêlwaxo ke molaô woo le ditaêlô tšeo, a dirê ka tšôna, xore a se kê a ikxodiša mo xo bana babô, a se kê a aroxa ditaêlô a ya xo le letona xoba xo la ntsôxôšô.” (Doiteronomio 17:​18-20) Go bonagala e le mo go kgonegago gore Dafida o be a sa latele taelo yeo nakong ya ge a be a dira dibe tše tše dikgolo. Go ithuta ka mehla le go naganišiša ka Lentšu la Modimo ka kgonthe go tla thuša go re šireletša go direng dibe mehleng ye e hlobaetšago.​—Diema 2:​10-12.

Go feta moo, molao wa mafelelo wa Melao e Lesome o bontšhitše ka go lebanya gore: “O se kê wa duma mosadi wa wa xeno.” (Ekisodo 20:​17) Ka nako ye Dafida o be a e-na le basadi ba bantši gotee le basadi ba direthe. (2 Samuele 3:​2-5) Eupša seo ga se sa ka sa mo šireletša go kganyogeng mosadi yo mongwe yo mobotse. Pego ye e re gopotša ka bohlokwa bja mantšu a Jesu a rego: “Mang le mang e a lebêlêlaxo mosadi à mo kxanyoxa, ó šetše a otswitše pelong ya xaxwe.” (Mateo 5:​28) Go e na le go nagana ka dikganyogo tšeo di fošagetšego, anke re akgofeleng go di tloša menaganong le dipelong tša rena.

Boitsholo le Kgaugelo

Pego ya Beibele e sa pepetletšego mabapi le sebe sa Dafida ga se ya fo ngwalelwa go thuša go kgotsofatša dikganyogo tša motho tše sa hlwekago tša kopano ya botona le botshadi. Pego e re nea sebaka sa go hlatsela pontšho e matla le yeo e tutuetšago ya se sengwe sa dika tše dikgolo tša Jehofa​—e lego kgaugelo ya gagwe.​—Ekisodo 34:​6, 7.

Ka morago ga ge Batseba a belege morwa, Jehofa o ile a roma moporofeta Nathane go yo boledišana le Dafida. Ye e be e le tiro ya kgaugelo. Ge nkabe Dafida go se gwa ka gwa boledišanwa le yena gomme a ile a dula a homotše, go ka direga gore o be a tla feleletša a lemaletše tsela ya sebe. (Ba-Hebere 3:​13) Ka mo go thabišago, Dafida o ile a arabela kgaugelong ya Modimo. Mantšu a Nathane a beilwego ka bothakga eupša e le a kwagalago a ile a dira gore letswalo la Dafida le aparelwe ke manyami, gomme ka boikokobetšo o ile a dumela gore o dirile sebe malebana le Modimo. Ge e le gabotse, Psalme 51 yeo e bolelago ka sebe sa Dafida mabapi le Batseba e ngwadilwe ka morago ga ge a itshotše e bile a ipobotše sebe sa gagwe se segolo. Anke le ka mohla re se ke ra dumelela dipelo tša rena go retela ge e ba re dirile sebe se segolo.​—2 Samuele 12:​1-13.

Dafida o ile a lebalelwa, eupša ga se a ka a šireletšwa tayong goba go ditla-morago tša sebe sa gagwe. (Diema 6:​27) Dafida o be a ka dula bjang a sa otlwe? Ge e ba Modimo a be a ka fo se šetše diphošo ka moka, ditekanyetšo tša gagwe di be di tla gobošwa. O be a ka se ke a atlega go swana le Moperisita yo Mogolo Eli, yo a ilego a kgalemela barwa ba gagwe ba babe ka bonolo gomme a ba tlogela ba tšwela pele ka ditiro tša bona tše mpe. (1 Samuele 2:​22-25) Lega go le bjalo, Jehofa ga a time motho yo a nyamilego le yo a itsholago botho bja Gagwe bjo lerato. Kgaugelo ya gagwe, e etšago meetse a tonyago a lapološago e tla  thuša mofoši go kgotlelela ditla-morago tša sebe. Borutho bja tebalelo ya Modimo le segwera se se agago le barapedi-gotee di tsošološa motho. Ee, motheong wa sehlabelo sa Kriste, motho yo a itsholago a ka tla a latswa “lehumô la kxauxêlô ya [Modimo].”​—Ba-Efeso 1:7.

“Pelo e Sekilego” le ‘Moya o Mpshafaditšwego’

Ka morago ga ge Dafida a ipobotše ga se a ka a ineela maikwelong a fošagetšego a go ikwa e le yo a hlokago mohola. Dipolelo tša gagwe tše di lego go dipsalme tšeo a di ngwadilego mabapi le boipobolo di bontšha kimologo yeo a ilego a e-kwa le boikemišetšo bja gagwe bja go ikemišetša go hlankela Modimo ka potego. Ka mohlala, lebelela go Psalme 32. Go temana 1 re bala gore: “Wa lehlôxônôlô ké mo-lebalêlwa-dikaroxô, yo dibe tša xaxwe di khupeditšwexo.” Go sa šetšwe gore sebe ke se segolo gakaakang, go a kgonega gore go be le mafelelo a thabišago ge e ba motho e le yo a botegago go itsholeng ga gagwe. Tsela e nngwe ya go bontšha potego ye ke ka go amogela go ikarabela ka mo go feletšego ka ditiro tša gago go etša ge Dafida a dirile. (2 Samuele 12:​13) Ga se a ka a leka go itokafatša pele ga Jehofa goba go leka go bea ba bangwe molato. Temana 5 e re: “Ka bá ka Xo bobolêla sebe sa-ka, ka se kê ka hlwa kè uta molato; ka re a nke ke ipobôlêlê ka bokxôpô bya-ka xo Morêna. ’Me Wêna wa napa wa nthola molato wa sebe.” Boipobolo bja kgonthe bo tliša kimollo, moo e lego gore ga go sa nyakega gore motho a hlwe a tshwenywa ke letswalo la gagwe mabapi le dibe tša nakong e fetilego.

Ka morago ga go kgopela tebalelo ya Jehofa, Dafida o ile a kgopela gore: “Modimo, o mpopele pelo e sekilego, gomme o mpshafatše moya o tiilego ka teng ga-ka.” (Psalme 51:​10, PK) Go kgopela “pelo e sekilego” le ‘moya o mpshafaditšwego’ go bontšha gore Dafida o be a lemogile tshekamelo ya gagwe ya sebe le gore o be a nyaka thušo ya Modimo bakeng sa go hlwekiša pelo ya gagwe le go thoma bophelo ka lefsa. Go e na le go ineela tabeng ya go ikwela bohloko, o be a ikemišeditše go tšwela pele ka tirelo ya gagwe go Modimo. O rapetše ka gore: “Mong’a-ka! Bula molomo wa-ka, ke ahlamê ke kwatšê ’thêtô tš’axo.”​—Psalme 51:15.

Karabelo ya Jehofa e bile efe boitsholong bja kgonthe bja Dafida le maitekong a boikemišetšo a go mo hlankela? O ile a nea Dafida kgonthišetšo ye e ruthetšago pelo: “Ke tlo Xo lemôša ka Xo ruta tsela ye O tl’o xo e swara, ka Xo eletša mahlô a-ka à Xo ukametše.” (Psalme 32:8) Ye ke kgonthišetšo ya tlhokomelo ya motho ka noši yeo Jehofa a e bontšhago maikwelong le dinyakweng  tša yoo a itsholago. Jehofa o ile a gata megato ya go nea Dafida temogo e oketšegilego, bokgoni bja go bona ka kua ga ponagalo ya ka godimo ya ditaba. Ge a be a ka lebeletšana le teko nakong e tlago, o be a tla kgona go lemoga mafelelo a ditiro tša gagwe le kamoo di tlago go kgoma ba bangwe ka gona, gomme o be a tla kgona go gata mogato ka bohlale.

Tiragalo ye ya bophelong bja Dafida e šoma e le kgothatšo go bohle bao ba ilego ba wela sebeng se segolo. Ka go ipobola dibe tša rena le go bontšha boitsholo bja kgonthe, re ka hwetša gape selo sa bohlokwa kudu seo re ka bago le sona, tswalano ya rena le Jehofa Modimo. Bohloko bja nakwana le dihlong tšeo re tla swanelwago ke go di kgotlelela di kaone kudu go feta tlalelo yeo e bakwago ke go dula re homotše, goba mafelelo a šoro a go itumelela go retelela tseleng ya borabele. (Psalme 32:9) Go e na le moo, re ka hwetša tebalelo e borutho ya Modimo yo lerato le wa kgaugelo, “Radikxauxêlô, Modimo wa khomotšô yohle.”​—2 Ba-Korinthe 1:3.

[Seswantšho go letlakala 31]

Dafida o be a holofetše gore o tla phologa mafelelo a sebe sa gagwe ka go romela Uria gore a yo bolawa