Phihlelo

Go Thaba le go Leboga go sa Šetšwe Tahlegelo e Kwešago Bohloko

KA GE GO ANEGA NANCY E. PORTER

E be e le ka June 5, 1947, mantšiboeng a borutho kua Bahamas, e lego dihlakahlaka tše di lego kgojana le lebopo la ka borwa-bohlabela bja United States. Molaodi wa tša bofaladi o ile a etela nna le monna wa-ka George ka mo go sa letelwago. O ile a re nea lengwalo leo le bego le bolela gore go dula ga rena dihlakahlakeng go be go sa hlwe go amogelwa le gore re be re swanetše “go tloga koloning gatee-tee!”

NNA le George re be re le baromiwa ba mathomo ba Dihlatse tša Jehofa ba go tla Nassau, motse o mogolo go e feta yohle kua Bahamas. Ka morago ga go aloga sehlopheng sa seswai sa Gilead, e lego sekolo sa boromiwa se se bego se le ka karolong ya ka leboa ya New York, re ile ra abelwa mo. Ke eng seo re bego re se dirile se se bakilego karabelo ye e šoro ka morago ga go dula dikgwedi tše tharo feela? Le gona go tla bjang gore ke be ke sa dutše ke le mo ka morago ga nywaga e fetago 50?

Go Tlwaetšwa Bakeng sa Bodiredi

Tate, e lego Harry Kilner, e bile tutuetšo e matla tseleng yeo ke phetšego bophelo bja-ka ka yona. O ile a mpeela mohlala o mobotse kudu, a dira boikgafo bjo bogolo bakeng sa go ba yo mongwe wa Dihlatse tša Jehofa. Gaešita le ge a be a sa phele gabotse mmeleng, o be a e-ya modirong wa boboledi mo e ka bago mafelo-bekeng a mangwe le a mangwe, ka mafolofolo a etiša dikgahlego tša Mmušo pele. (Mateo 6:​33) Re be re sa ema gabotse ditšheleteng, eupša lebenkele la gagwe la  dieta e be e le lefelo la modiro wa moya kua Lethbridge, Alberta, Canada ka bo-1930. Dilong tšeo ke sa di gopolago tša pejana ke gopola ge badiredi ba nako e tletšego ba Dihlatse tša Jehofa bao ba bitšwago babulamadibogo, ba etela ga gešo le go abelana diphihlelo le rena.

Ka 1943, ke ile ka thoma tirelo ya-ka ya bobulamadibogo kgaufsi le Fort Macleod le Claresholm, Alberta. Ka nako yeo modiro wa rena wa boboledi o be o thibetšwe kua Canada ka baka la tsebišo e fošagetšego yeo e ilego ya phatlalatšwa ke baganetši nakong ya Ntwa ya II ya Lefase. Tšhemo ya rena e be e le monabo wa dikhilomithara tše 50 go naba le naga, eupša ka ge re be re le ba bafsa e bile re le matšato, re be re se na bothata bja go sepela ka dipaesekele goba go sepela ka maoto e le gore re yo fihlelela metse e menyenyane le dipolasa tikologong yeo. Ka nako yeo, ke bile le sebaka sa go boledišana le dialoga tše dingwe tša Gilead, gomme diphihlelo tša bona di ile tša fehla ka go nna kganyogo ya go ba moromiwa.

Ka 1945, ke ile ka nyalana le George Porter yo a bego a e-tšwa Saskatchewan, Canada. Batswadi ba gagwe e bile Dihlatse tše mafolofolo ga e sa le go tloga ka 1916, gomme le yena o be a kgethile bodiredi bja nako e tletšego e le mošomo wa gagwe. Kabelo ya rena ya mathomo e be e le Lynn Valley e botse kua North Vancouver, Canada. Go se go ye kae ka morago ga moo re ile ra laleletšwa Gilead.

Mo nywageng, ke ile ka boledišana le dialoga tša diseminari tše fapa-fapanego tša boruti tša thuto ya bodumedi gomme ka bona kamoo tlwaetšo ya bona ya thuto ya bodumedi e sentšego tumelo ya bona go Modimo le Lentšung la gagwe, Beibele. Ka mo go fapanego, seo re ithutilego sona Gilead se ile sa loutša bokgoni bja rena bja go nagana gomme go feta tše ka moka sa matlafatša tumelo ya rena go Jehofa Modimo le Lentšung la gagwe. Bao re bego re le sehlopheng se tee le bona ba ile ba abelwa go ya China, Singapore, India, dinageng tša Afrika, Amerika Borwa le mafelong a mangwe. Ke sa dutše ke gopola kamoo re ilego ra thaba ka gona ge re be re tsebišwa gore kabelo ya rena e be e le dihlakahlakeng tša molatšatšing tša Bahamas.

Kamoo re Ilego ra Kgona go Dula ka Gona

Leeto la rena la go ya Bahamas e be e le le lekopana ge le bapišwa le maeto a tšerwego ke barutwana-gotee le rena. Go se go ye kae ke ge re šetše re thabela boemo bja leratadima bjo borutho, leratadima le le se nago maru, meetse a mmala wa botala-lerata bja go yela go botala-morogo, meago e nago le mabone a mebala e fapa-fapanego le dipaesekele tše dintši-ntši. Lega go le bjalo, seo se ilego sa nkgahla kudu mathomong ke sehlopha se senyenyane sa Dihlatse tše hlano seo se bego se re letetše ge sekepe sa rena se be se goroga. Kapejana re ile ra lemoga gore setlogo sa mo se be se fapane kudu le seo re bego re se tlwaetše. Ka mohlala, monna wa-ka o ile a kgopelwa gore a tlogele go mpitša moratiwa phatlalatša, ka ge leina leo gantši le dirišwa mothong yo go ratanwago le yena ka ntle ga lenyalo.

 Go se go ye kae, moruti yo go bego go bonagala a ikwa a beilwe kotsing ke go kopa-kopana ga rena le batho ka bolokologi, o ile a re latofatša ka maaka ka gore re Makomanisi. Ka baka la se, re ile ra hwetša taelo ya gore re tloge nageng. Eupša Dihlatse​—go be go e-na le tše ka tlase ga tše 20 dihlakahlakeng mehleng yeo​—kapejana di ile tša hwetša mesaeno e dikete e le go lopa gore re dumelelwe go dula. Ka gona, taelo ya go re raka e ile ya tlogelwa.

Go ya Tšhemong e Mpsha

Therešo ya Beibele e ile ya gola ka lebelo ka dipelong tšeo di bego di rata Modimo, ka gona baromiwa ba Gilead ba oketšegilego ba ile ba romelwa Bahamas. Ke moka ka 1950, go ile gwa hlongwa ofisi ya lekala. Ka morago ga nywaga e lesome, Milton Henschel, setho sa sehlopha sa bašomi sa ntlong-kgolo kua Brooklyn, New York, o ile a etela Bahamas gomme a botšiša baromiwa ge e ba go be go e-na le yo a ratago go ya go thoma modiro wa boboledi sehlakahlakeng se sengwe sa dihlakahlaka tša Bahamas. Nna le George re ile ra ithapa, gomme ra thoma seo se feleleditšego e le go dula nywaga e 11 Sehlakahlakeng sa Long.

Sehlakahlaka se, se sengwe sa tše dintši tšeo di dirago Bahamas, ke sa botelele bja dikhilomithara tše 140 le bophara bja dikhilomithara tše 6, gomme mehleng yeo se be se se na ditoropo tše tlwaelegilego. Motse-mošate wa gona e lego Toropo ya Clarence, o be o e-na le magae a ka bago 50. Bophelo e be e le bja segologolo kudu​—go be go se na mohlagase, go se na meetse a dipompi goba ditofo tša ka ngwakong goba tshepedišo ya diphaephe. Ka gona re ile ra swanelwa ke gore re tlwaelane le se go thwego ke bophelo bja sehlakahlakeng sa ka thoko. Mo taba ya tša maphelo a batho e be e le poledišano e ratwago kudu. Re ile ra ithuta gore ditumedišong tša rena re se ke ra akaretša potšišo e rego, “Le tsoga bjang?” ka ge gantši karabo e be e tlo ba taodišo e telele ya histori e feletšego ya tša kalafo ya motho yoo.

Modiro wa rena wa go nea bohlatse re be re o dira ka meraleng ka gobane batho gantši ba be ba hwetšwa ka moraleng wa bona wa ka ntle wo o ruletšwego ka bjang gomme o e-na le sebešo. Batho ba tikologong bontši e be e le balemi goba barei ba dihlapi bao ba diilago eupša e le ba botho kudu. Bontši bja bona e be e se feela bao ba ratago bodumedi eupša gape ba be ba rata le tumela-khwele kudu. Ditiragalo tše di sa tlwaelegago gantši di be di hlathollwa e le dilo tše di hlolelago se sengwe.

Baruti ba be ba sa tshwenywe ke go ya magaeng a batho ba sa laletšwa gomme ba gagole dipuku tša Beibele tšeo re bego re di tlogetše moo. Ka go rialo ba be ba tšhošetša ba boi, eupša ga se motho yo mongwe le yo mongwe yo a ilego a ba tšhaba. Ka mohlala, mosadi wa nywaga e 70 yo a nago le sebete o ile a gana go tšhošetšwa. O be a nyaka go kwešiša Beibele ka boyena, gomme mafelelong o ile a ba Hlatse gotee le ba bangwe ba bantši. Ge re be re tšwela pele go hwetša kgahlego e oketšegilego bathong, George o ile a swanelwa ke go sepela leeto la dikhilomithara tše 300 ka koloi ka Disontaga tše itšego, a thuša bao ba thabelago gore ba be gona dibokeng tša rena.

Dikgweding tša mathomong ge go be go se na Dihlatse tše dingwe, nna le George re ile ra boloka boemo bja rena bjo bobotse bja moya ka go swara diboka ka moka tša Bokriste tša ka mehla. Go oketša moo, bošegong bjo bongwe le bjo bongwe bja Mošupologo re ile ra latela lenaneo la ka mehla la go ithuta thuto ka makasineng wa Morokami le go dira mmalo wa rena wa Beibele.  Gape re be re bala ditokollo ka moka tša Morokami le Phafoga! gatee-tee ge re di amogela.

Tate o ile a hwa ge re be re le Sehlakahlakeng sa Long. Selemong se se latelago sa 1963, re ile ra dira dithulaganyo tša gore mma a tle a dule kgaufsi le rena. Gaešita le ge a be a godile nywageng, o ile a itlwaelanya le maemo gabotse gomme a dula Sehlakahlakeng sa Long go fihlela ge a e-hwa ka 1971. Lehono, Sehlakahlaka sa Long se na le phuthego yeo e nago le Holo e mpsha-mpsha ya Mmušo.

Tlhohlo e Kwešago Bohloko

Ka 1980, George o ile a lemoga gore boemo bja gagwe bja tša maphelo bo thoma go fokola. Ka baka leo go ile gwa thoma e nngwe ya diphihlelo tše bohloko kudu bophelong bja-ka​—go bogela monna wa-ka yo a rategago, modirišani le mogwera a fenywa ke bolwetši bja Alzheimer. Semelo sa gagwe se ile sa fetoga ka mo go feletšego. Karolo ya mafelelo le ye e kwešago bohloko e tšere nywaga e ka bago e mene pele ga lehu la gagwe ka 1987. O be a e-ya le nna bodireding le dibokeng ge feela a be a kgona, gaešita le ge ka matšatši a mantši boiteko bjo a bego a bo dira bo be bo dira gore ke lle. Lerato le legolo le le tšwago go banababo rena ba Bakriste e bile le le homotšago e le ka kgonthe, eupša ke sa dutše ke mo hlologela kudu.

E nngwe ya dikarolo tše bohlokwa tša lenyalo la-ka le George e be e le poledišano ya rena ya ka mehla le e thabišago. Ka ge bjale George a hlokofetše, ke leboga kudu go feta le ge e le neng pele gore Jehofa o laletša bahlanka ba gagwe gore ba se “kxaotše xo rapêla,” le gore ba ‘tiiše thapelong’ le go diriša “dithapêlô tšohle.” (1 Ba-Thesalonika 5:​17; Ba-Roma 12:​12; Ba-Efeso 6:​18) Ke mo go homotšago kudu go tseba gore Jehofa o tshwenyega ka boiketlo bja rena. Ke tloga ke ikwa bjalo ka mopsalme yo a opetšego ka gore: “A xo rêtwê Morêna Modimo, ó re rwala ka mehla.” (Psalme 68:​19) Bjalo ka ge Jesu a eleditše, go se belaele ka tša ka moso, go amogela mafokodi a-ka le go ba yo a lebogago bakeng sa ditšhegofatšo tšeo ke di hwetšago letšatšing le lengwe le le lengwe, ruri ke tsela e kaone ya go phela.​—Mateo 6:34.

Meputso e Thabišago ya Bodiredi

Go dula ke swaregile bodireding bja Bokriste go nthušitše gore ke se naganišiše kudu ka dilo tša nakong e fetilego. Ka gona, ke kgona go fenya mohuta wa maikwelo ao a ka lebišago kgateletšegong. Go ruta ba bangwe therešo ya Beibele e bile mothopo o kgethegilego wa lethabo. Go nea mokgwa wa ka mehla o rulagantšwego wa moya wo o mphilego thulaganyo le boitseparelo bophelong bja-ka.​—Ba-Filipi 3:16.

Ka nako e nngwe ke ile ka amogela mogala wo o tšwago go mosadi yo ke ilego ka abelana le yena molaetša wa Mmušo nywaga e ka bago e 47 pejana. E be e le morwedi wa yo mongwe wa bao e bilego barutwana ba Beibele ba mathomo ba re bilego le bona ge re fihla Bahamas ka 1947. Mmagwe,  tatagwe le dikgaetšedi tša gagwe ka moka le banababo e bile Dihlatse tša Jehofa go etša ge go bile bjalo ka bontši bja bana ba bona gotee le ditlogolo. Ge e le gabotse, ditho tše fetago 60 tše di tswalanago le mosadi yo ke Dihlatse. Eupša le ka mohla ga se a ka a amogela therešo ya Beibele. Lega go le bjalo, ga bjale o be a itokišeditše go ba mohlanka wa Jehofa Modimo mafelelong. E bile lethabo gakaakang go bona Dihlatse tše mmalwa tšeo di bego di le Bahamas ge nna le George re be re fihla moo di oketšega go ya go tše fetago 1 400!

Ka dinako tše dingwe batho ba mpotšiša ge e ba ke sa hlologelwe go ba le bana bao e lego ba-ka. Ee, go ba le bana e ka ba tšhegofatšo. Lega go le bjalo, lerato leo ke le bontšhwago ka mo go sa kgaotšego ke bana ba-ka ba moya, ditlogolo le ditlogo-tlogolwana ke selo seo mohlomongwe se sa hwetšwego ke batswadi ka moka ba kgonthe. Ka kgonthe, bao ba ‘dirago tše botse’ le bao ba ‘humilego ka mediro e mebotse’ ke batho bao ba thabilego kudu. (1 Timotheo 6:​18, PK) Ke ka baka leo ke dulago ke swaregile bodireding go fihla moo boemo bja-ka bja tša maphelo bo ntumelelago.

Ka letšatši le lengwe ge ke be ke le ka ofising ya ngaka ya meno, mosadi yo mongwe yo mofsa o ile a tla go nna gomme a re, “Ga o ntsebe, eupša nna ke a go tseba, fela ke upša ke nyaka go go tsebiša gore ke a go rata.” Ke moka o ile a thoma go laodiša kamoo a tsebilego therešo ya Beibele ka gona le gore o be a thabile gakaakang gore rena baromiwa re ile ra tla Bahamas.

Tiragalong e nngwe ge ke be ke boa maikhutšong, ke ile ka hwetša letšoba la rosa mojakong wa moo ke dulago gona ga bjale ofising ya lekala ya Dihlatse tša Jehofa kua Nassau. Le be le e-na le molaetša o rego, “Re thabela ge o boile gae.” Pelo ya-ka e phophoma ka ditebogo gomme se se ntira gore ke rate Jehofa kudu-kudu ge ke bona mohuta wa batho bao ba tšweleditšwego ke Lentšu la gagwe, mokgatlo gotee le moya wa gagwe! Ka kgonthe, letsogo la Jehofa le phološago gantši le bontšhwa ka bao ba re dikologilego.

Go Phophoma ka Tebogo

Bophelo bja-ka ga se bja ka bja ba bonolo ka mehla, le dibopego tša bjona ga di bonolo ga bjale. Eupša ke na le mo gontši mo nka go lebogago​—lethabo la bodiredi, lerato le go kgomega ga banababo rena le dikgaetšedi ba bantši ba Bakriste, tlhokomelo e lerato ya mokgatlo wa Jehofa, ditherešo tše botse tše tšwago ka Beibeleng, kholofelo ya go tlo ba gotee le baratiwa ge ba tsošwa le dikgopotšo tša nywaga e 42 tša lenyalo la-ka le mohlanka yo a botegago wa Jehofa. Pele ga ge re ka nyalana, ke be ke ile ka rapela gore eka ka mehla nka thuša monna wa-ka go dula a le bodireding bja nako e tletšego, e lego bjo a bego a bo rata kudu. Jehofa o ile a araba thapelo yeo ka botho. Ka gona ke nyaka go bontšha tebogo ya-ka ya go leboga Jehofa ka go dula ke mmotegela ka mehla.

Bahamas ke lefelo le tumilego la basepedi ba go boga naga, bao ba fetšago dikete tša diranta bakeng sa go tla go thabela dilo tše di kgahlišago tša molatšatšing. Ka ge ke dirile kgetho ya go hlankela Jehofa le ge e le kae moo mokgatlo wa gagwe o nthomelago gona, ke bile le lethabo la go sepela go tloga sehlakahlakeng se sengwe go ya go se sengwe, ke tsebatša ditaba tše dibotse tša Mmušo wa Modimo. Eupša sa bohlokwa kudu, ke ile ka tseba le go thabela lerato la batho ba Bahamas ba babotse bao ba nago le bogwera.

Ke leboga kudu bao ba ilego ba tlišetša batswadi ba-ka therešo, bao le bona ka morago ba ilego ba bjala monaganong le pelong ya-ka nakong ya ge ke sa le yo monyenyane kganyogo e matla ya go tsoma Mmušo wa Modimo pele. Bahlanka ba bafsa ba Jehofa lehono le bona ka mo go swanago ba ka amogela ditšhegofatšo tše dintši ge e ba ba tsena ka ‘mojako o mogolo’ wo o lebišago dibakeng tše dikgolo tša bodiredi bjo bo katološitšwego. (1 Ba-Korinthe 16:9) Le wena ka mo go swanago o tla phophoma ka tebogo ge e ba o dirišetša bophelo bja gago go hlompha “Modimo wa medimo,” Jehofa.​—Doiteronomio 10:​17; Daniele 2:47.

[Seswantšho go letlakala 24]

Ke le modirong wa setarateng kua Victoria, B.C., ka 1944

[Seswantšho go letlakala 24]

Nna le George re ile ra ya Sekolong sa Gilead ka 1946

[Seswantšho go letlakala 25]

Ke e-na le George ka pele ga legae la baromiwa kua Nassau, Bahamas, ka 1955

[Seswantšho go letlakala 26]

Legae la baromiwa kua Deadman’s Cay, moo re ilego ra hlankela go tloga ka 1961 go fihla ka 1972