Dipotšišo tše Tšwago go Babadi

Na Jehofa o dirile kgwerano ya gagwe le Aborahama kua Uri goba Harane?

Pego ya mathomong ya kgwerano ya Jehofa le Aborahama e hwetšagala go Genesi 12:​1-3 yeo e rego: “Morêna ó boletše le Aborama a re: Tloxêla lefase lé la xeno, le metswalo ya xaxo, le ngwako wa tat’axô; O yê naxeng ye ke tl’o xo Xo laetša yôna. Xobane ke tlo Xo dira sethšaba se sexolo . . . ’me meloko ka moka ya lefase e tlo šexofatšwa ka wêna.” * Jehofa a ka ba a dirile kgwerano ye le Aborahama la mafelelo ge a be a le Uri gomme a e tiiša ge Aborahama a be a le Harane.

Lekgolong la pele la nywaga, Stefano o ile a bolela ka taelo ya Jehofa ya gore Aborahama o swanetše go khudugela Kanana. Ge a be a bolela le lekgotla la Sanhedrine o itše: “Modimo wa letaxô ó ipônaditše xo Aborahama tata-wešo mola à sa le kua Mesopotamia, à sešo a axa Harane. A mo laêla a re: Tloxêla lefase la xeno, le metswalô ya xaxo, O yê naxeng ye ke tl’o xo Xo laetša yôna.” (Ditiro 7:​2, 3, mongwalo o sekamego ke wa rena.) Mathomong Aborahama o be a e-tšwa Uri, gomme bjalo ka ge Stefano a bontšhitše, mo ke moo a ilego a kwa taelo ya go ya Kanana la mathomo. (Genesi 15:7; Nehemia 9:7) Stefano ga se a ka a bolela kgwerano ya Modimo le Aborahama, eupša go Genesi 12:​1-3, kgwerano e tswalanywa le taelo ya go ya Kanana. Ka gona, ke mo go kwagalago go dumela gore Jehofa o dirile kgwerano le Aborahama kua Uri.

Lega go le bjalo, go bala ka kelohloko pego ya Genesi go bontšha gore Jehofa o ile a bolela gape kgwerano ya gagwe go Aborahama kua Harane, bjalo ka ge ka morago a ile a bušeletša le go katološa dibopego tša yona ka makga a mmalwa kua Kanana. (Genesi 15:5; 17:​1-5; 18:​18; 22:​16-18) Go ya ka Genesi 11:​31, 32, tatago Aborahama e lego Thara o ile a tloga Uri go ya Kanana a e-na le Aborahama, Sara le Loto. Ba ile ba tla Harane gomme ba dula moo go fihla Thara a e-hwa. Aborahama o be a dutše Harane lebaka le letelele go ka ba le mahumo a mantši. (Genesi 12:5) Gomme ka nako e nngwe, Nahoro e lego ngwanabo Aborahama le yena o ile a khudugela moo.

Ka morago ga go bega lehu la Thara, Beibele e bega mantšu a Jehofa go Aborahama gomme e tšwela pele gore: “Aborama a dira se Morêna a mmoditšexo sôna, a tloxa.” (Genesi 12:4) Lega go le bjalo, Genesi 11:​31–12:4 e re nea kgopolo e tiilego ya gore Jehofa o boletše mantšu a begilwego go Genesi 12:​1-3 ka morago ga lehu la Thara. Ge e ba go le bjalo, Aborahama o ile a tloga Harane gomme a khudugela nageng yeo Jehofa a e boletšego a arabela taelo yeo a sa tšwago go e-kwa gotee le yeo a e kwelego la mathomo nywaga pejana kua Uri.

Go ya ka Genesi 12:1, Jehofa o laetše Aborahama gore: “Tloxêla lefase lé la xeno, le metswalo ya xaxo, le ngwako wa tat’axô.” Ka nako e nngwe “lefase” la gabo Aborahama e kile ya ba Uri, gomme “ngwako” wa tatagwe o be o le moo. Lega go le bjalo, tatago Aborahama o ile a khudušetša ba lapa la gagwe Harane, gomme Aborahama o ile a bitša lefelo leo naga ya gabo. Ge ka morago ga nywaga e mentši a le kua Kanana, o ile a romela mohlanka wa gagwe ‘nageng ya gabo le metswalong ya gagwe’ bakeng sa go hweletša Isaka mosadi, mohlanka o ile a ya “motseng wa Nahoro” (e ka ba Harane goba lefelong le lengwe kgaufsi le moo). (Genesi 24:​4, 10) Moo mohlanka o ile a hwetša Rebeka gare ga metswalo ya Aborahama, lapa le legolo la Nahoro.​—Genesi 22:​20-24; 24:​15, 24, 29; 27:​42, 43.

Polelong ya gagwe go Sanhedrine, Stefano o ile a bolela ka Aborahama gore: “Xe tat’axwe a hwile, Modimo a mo tloša fao, a mo tliša naxeng yeno Le axilexo xo yôna byale.” (Ditiro 7:4) Se se bontšha gore Jehofa o ile a bolela le Aborahama kua Harane. Ke mo go kwagalago go dumela gore lebakeng leo Jehofa o ile a boeletša kgwerano ya gagwe le Aborahama bjalo ka ge go begilwe go Genesi 12:​1-3, ka ge kgwerano e ile ya thoma go šoma ge Aborahama a be a khudugela Kanana. Ka gona, go hlahloba ditherešo ka moka go lebiša phethong ya gore Jehofa mathomong o dirile kgwerano ya gagwe le Aborahama kua Uri gomme a e tiišetša kua Harane.

[Mengwalo ya ka tlase]