‘Elang Hloko go Feta ka mo go Tlwaelegilego’

‘Go nyakega gore re eleng hloko go feta ka mo go tlwaelegilego dilo tše re di kwelego, gore re se ke ra gogolega.’—BA-HEBERE 2:​1, bapiša le NW.

1. Bontšha kamoo tšhitišo e ka lebišago kotsing ka gona.

DIKOTSI tša dikoloi di feta ka maphelo a batho ba ka bago 37 000 ngwaga o mongwe le o mongwe kua United States e nnoši. Ditsebi di bolela gore a mangwe a mahu a a ka be a ile a phengwa ge nkabe baotledi ba ile ba lebiša tlhokomelo kudu tseleng. Bo-radikoloi ba bangwe ba šitišwa ke maswao le dipampiri tša papatšo goba ke go diriša di-cellular tša bona. Go na le ba bangwe gape bao ba nago le mokgwa wa go bea dijo godimo ga di-dashboardba ja ba dutše ba otlela. Maemong a ka moka, tšhitišo e ka lebiša kotsing.

2, 3. Ke keletšo efe yeo Paulo a e neilego Bakriste ba ba-Hebere, gomme ke ka baka la’ng keletšo ya gagwe e be e le e swanetšego?

² Nywaga e ka bago 2 000 pele ga ge koloi e ka hlangwa, moapostola Paulo o ile a bolela ka mokgwa wa tšhitišo yeo e bego e bonagala e le kotsi go Bakriste ba bangwe ba ba-Hebere. Paulo o ile a gatelela gore Jesu Kriste yo a tsošitšwego o be a neilwe boemo bjo bo phagametšego bja barongwa ka moka, ka gobane o ile a bewa ka letsogong le letona la Modimo. Ke moka moapostola o itše: “Ke ka baka leo go nyakegago gore re eleng hloko go feta ka mo go tlwaelegilego dilo tše re di kwelego, gore re se ke ra gogolega.”—Ba-Hebere 2:1, NW.

³ Ke ka baka la’ng Bakriste ba ba-Hebere ba be ba swanetše go ‘ela hloko go feta ka mo go tlwaelegilego dilo tšeo ba di kwelego’ mabapi le Jesu? Ka gobane go be go šetše go fetile nywaga e ka bago 30 Jesu a tlogile lefaseng. Ka ge Mong wa bona a be a se gona, Bakriste ba bangwe ba ba-Hebere ba be ba thomile go aroga tumelong ya kgonthe. Ba be ba šitišwa ke bo-Juda e lego mohuta wa bona wa pele wa borapedi.

Ba be ba Swanetše go Ela Hloko ka Šedi

4. Ke ka baka la’ng Bakriste ba bangwe ba ba-Hebere ba ile ba lekega go boela go bo-Juda?

⁴ Ke ka baka la’ng Mokriste a be a ka lekega go boela go bo-Juda? Go ba gona, tshepedišo ya borapedi ka tlase ga Molao e be e akaretša dilo tšeo di ka bonwago. Batho ba be ba kgona go bona baperisita le go dupelela monkgo wa dihlabelo tšeo di fišitšwego. Lega go le bjalo, dikarolong tše itšego Bokriste e be e le bjo bo fapanego kudu. Bakriste ba be ba na le Moperisita yo Mogolo e lego Jesu Kriste, eupša o be a sa ka a bonwa lefaseng ka nywaga-some e meraro. (Ba-Hebere 4:​14) Ba be ba na le tempele, eupša sekgethwa sa yona  e be e le legodimo ka bolona. (Ba-Hebere 9:​24) Ka go se swane le lebollo la nama ka tlase ga Molao, lebollo la Bokriste e be e le la “pelo le le dirwago ka moya.” (Ba-Roma 2:​29, PK) Ka gona, go Bakriste ba ba-Hebere, Bokriste bo ka ba bo ile bja thoma go bonagala e le bja boikgopolelo.

5. Paulo o ile a bontšha bjang gore tshepedišo ya borapedi yeo e hlomilwego ke Jesu e be e feta ya ka tlase ga Molao?

⁵ Bakriste ba ba-Hebere ba be ba swanetše go lemoga selo se itšego sa bohlokwa kudu ka tshepedišo ya borapedi yeo e hlomilwego ke Kriste. E be e theilwe tumelong kudu go feta go dilo tšeo di ka bonwago, lega go le bjalo e be e feta Molao woo o neilwego ka moporofeta Moše. Paulo o ngwadile gore: “Xe madi a diphôkô le dipôô le molôra wa sethôlê wa xo fokêla ba ba thšilafetšexo, xe dilô tšeo di be di ba dira bakxêthwa, tša ba hlatswa mebele ya bôná, Xôna madi a Kriste e a ikišitšexo xo Modimo ka Môya wa neng le neng à le sedimo se se se naxo senyalô, a xaxwe madi a a ka se fetiše kxolê xo hlatswa matswalô a rena ra tšwa ’thšila tša medirô ye e hwilexo, ra tla ra dirêla Modimo e a phelaxo?” (Ba-Hebere 9:​13, 14) Ee, tebalelo yeo e hwetšagalago ka go ba le tumelo sehlabelong sa Jesu Kriste e feta kgole kudu ka ditsela tše dintši yeo e bego e newa ka dihlabelo tšeo di bego di newa ka tlase ga Molao.—Ba-Hebere 7:​26-28.

6, 7. (a) Ke boemo bofe bjoo bo dirilego gore e be mo go akgofilego gore Bakriste ba ba-Hebere ba ‘hlokomele go feta ka mo go tlwaelegilego dilo tše ba di kwelego’? (b) Ge Paulo a be a ngwalela ba-Hebere lengwalo, Jerusalema e be e šaletšwe ke nako e kaaka’ng? (Bona mongwalo wa tlase.)

⁶ Go be go na le lebaka le lengwe leo ka lona Bakriste ba ba-Hebere ba bego ba swanetše go ela hloko ka šedi dilo tšeo ba di kwelego ka Jesu. O be a ile a bolela e sa le pele gore Jerusalema e be e tla fedišwa. Jesu o itše: “O tlo tlêlwa ke matšatši ao manaba a xaxo a tl’o xo êpa lengôpê a Xo dikoloxa, a Xo rakêlêla, a Xo tlaletše thokô tšohle. Ba tlo Xo dixêla fase le bana ba xaxo ba xo wene; ba ka se kê ba tloxêla lefsika lè sa hlatlaxane le lengwê; ka xobane O sa ka wa lemoxa lebaka le O etetšwexo ka lôna.”—Luka 19:​43, 44.

⁷ Se se be se tla direga neng? Jesu ga se a ka a utolla letšatši le iri. Go e na le moo, o neile taelo ye: “E re xe Le bôna motse wa Jerusalêma ò dikilwe ke makôkô a madirá, xôna Le tsebê xore xo batametše xo phušolwa xa wôna. Mehleng yeo ba ba lexo naxeng ya Juda ba thšabêlê dithabeng; ba ba lexo mo motseng ba ngwêxê; ba dinakaneng ba se kê ba ya motseng.” (Luka 21:​20, 21) Nakong ya nywaga e 30 ka morago ga ge Jesu a boletše mantšu ao, Bakriste ba bangwe kua Jerusalema ba ile ba lahlegelwa ke kgopolo ya go akgofa ga nako gomme ba šitišega. Go bile bjalo ka ge eka ba ile ba šitišega ge ba dutše ba otlela. Ge e ba ba be ba sa lokiša tsela ya bona ya go nagana, ka ntle le pelaelo ba be ba tla welwa ke kotsi. Go sa šetšwe gore ba ile ba nagana bjalo goba aowa, phedišo ya Jerusalema e be e le  kgaufsi! * Re holofela gore keletšo ya Paulo e neile temošo go Bakriste bao ba bego ba robetše moyeng kua Jerusalema.

Go ‘Ela Hloko go Feta ka mo go Tlwaelegilego’ Lehono

8. Ke ka baka la’ng re swanetše go ‘ela hloko go feta ka mo go tlwaelegilego’ ditherešo tša Lentšu la Modimo?

⁸ Go etša Bakriste ba lekgolong la pele la nywaga, re swanetše go ‘ela hloko go feta ka mo go tlwaelegilego’ ditherešo tša Lentšu la Modimo. Ka baka la’ng? Ka gobane le rena re lebeletšane le phedišo e tlago, e sego feela ya setšhaba se tee eupša ya tshepedišo ka moka ya dilo. (Kutollo 11:​18; 16:​14, 16) Ke therešo gore ga re tsebe letšatši le lebanego le iri yeo ka yona Jehofa a tlago go gata mogato wo. (Mateo 24:​36) Lega go le bjalo, re dihlatse tše di bonago ka mahlo go phethagatšwa ga diporofeto tša Beibele tšeo di bontšhago ka go lebanya gore re phela “mehleng ya bofêlô.” (2 Timotheo 3:​1-5) Ka gona, re swanetše go šetša selo le ge e le sefe seo se ka re šitišago. Re swanetše go ela hloko Lentšu la Modimo le go boloka kgopolo e tseneletšego ya go akgofa ga nako. Ke feela ka go dira se moo re tlago “xo phônyôkxa tšeo ka moka di tl’o xo dirêxa.”—Luka 21:36.

9, 10. (a) Re ka ipontšha bjang re le bao ba elago hloko ditaba tša moya? (b) Ke bjang lentšu la Modimo e lego ‘lebone dinaong tša rena’ le ‘seetša ditseleng tša rena’?

⁹ Re ka bontšha bjang gore re ‘ela hloko go feta ka mo go tlwaelegilego’ dilo tša moya dinakong tše tša bohlokwa? Tsela e nngwe ke ka go ba gona ka mehla dibokeng tša Bokriste, dikopanong tše dinyenyane le tše dikgolo. Gape re swanetše go ba barutwana ba mafolofolo ba Beibele e le gore re ka batamela kgaufsi le Mongwadi wa yona, Jehofa. (Jakobo 4:8) Ge e ba re monya tsebo ya go tseba Jehofa ka thuto ya motho ka noši le ka diboka, re tla ba bjalo ka mopsalme yo a itšego go Modimo: “ ’Ntšu la xaxo ké lebônê la dinaô tša-ka, ké seetša tseleng ya-ka.”—Psalme 119:​105.

¹⁰ Beibele e šoma e le ‘seetša ditseleng tša rena’ ge e re botša ka merero ya Modimo ka bokamoso. Gape ke ‘lebone dinaong tša rena.’ Ka mantšu a mangwe, e ka re thuša ka mogato wa rena o latelago ge re lebeletšana le mathata a gateletšago a bophelo. Ke ka baka leo go lego bohlokwa gore re ‘hlokomele go feta ka mo go tlwaelegilego’ ge re bokana bakeng sa tlhahlo le badumedi-gotee le rena le ge rena ka noši re bala Lentšu la Modimo. Tsebišo yeo re e monyago e tla re thuša go dira diphetho tše bohlale le tšeo di holago tšeo di thabišago Jehofa le go thabiša pelo ya gagwe. (Diema 27:​11; Jesaya 48:​17) Re ka oketša bjang tekanyo ya go tsepamiša kgopolo ka nako e telele dibokeng le dinakong tša thuto ya motho ka noši e le gore re ka holega kudu ditokišetšong tša Modimo tša Moya?

Go Kaonefatša go Tsepamiša Kgopolo ga Rena Dibokeng

11. Ke ka baka la’ng ka dinako tše dingwe go se bonolo go tsepamiša kgopolo dibokeng tša Bokriste?

¹¹ Ka dinako tše dingwe, ga go bonolo go tsepamiša kgopolo dibokeng tša Bokriste. Monagano o ka šitišwa gabonolo, mohlomongwe ke lesea leo le llago goba ke motho yoo a fihlilego ka morago ga nako yo a nyakago setulo. Ka morago ga modiro wa letšatši le letelele, re ka fo ba re lapile. Motho yo a bolelago sethaleng e ka fo ba e se seboledi se se kgahlišago gomme pele ga ge re ka lemoga re ka ikhwetša re leleramohlomongwe e bile re robetše! Ka baka la bohlokwa bja tsebišo yeo e newago, re swanetše go katanela go kaonefatša matla a rena a go tsepamiša kgopolo dibokeng tša phuthego. Eupša se re ka se dira bjang?

12. Ke eng seo se ka dirago gore go be bonolo go rena go tsepamiša kgopolo dibokeng?

¹² Gantši go bonolo kudu go tsepamiša kgopolo dibokeng ge e ba re lokišeleditše gabotse. Ka gona, ke ka baka la’ng o sa beele ka thoko nako ya go nagana e sa le pele ka taba yeo e tlago go ahla-ahlwa? Go tšea metsotso e sego kae feela ka letšatši go bala le go naganišiša ka karolo ya dikgaolo tše abetšwego bakeng sa mmalo wa Beibele wa beke. Ka go rulaganya, re ka hwetša  nako ya go lokišeletša Thuto ya Puku ya Phuthego le Thuto ya Morokami. Lenaneo le ge e le lefe leo re le kgethago, go na le selo se tee seo se kgonthišeditšwego: Go lokišeletša go tla re thuša go tsepamiša kgopolo tabeng yeo e ahla-ahlwago dibokeng tša phuthego.

13. Ke eng seo se ka re thušago go dula re tsepamišitše kgopolo tabeng yeo e ahla-ahlwago dibokeng?

¹³ Go tlaleletša go go lokišeletša gabotse, ba bangwe ba hwetša gore ba tsepamiša kgopolo kudu dibokeng ge ba dutše madulong a ka pele ka Holong ya Mmušo. Go boloka kgokagano ya mahlo le seboledi, go bala ka Beibeleng ya gago ge go balwa lengwalo le go ngwala dintlha ke ditsela tše dingwe tša go boloka menagano ya rena gore e se ke ya lelera. Lega go le bjalo, go ba le pelo e lokišeditšwego go bohlokwa kudu go feta sedirišwa le ge e le sefe sa go tsepamiša kgopolo. Re swanetše go kwešiša morero wa go bokana gotee. Lebaka le legolo leo ka lona re bokanago le badumedi-gotee ke go rapela Jehofa. (Psalme 26:​12; Luka 2:​36, 37) Diboka ke tsela e bohlokwa yeo ka yona re fepšago moyeng. (Mateo 24:​45-47) Go feta moo, di re nea dibaka tša gore “re išanê leratong le medirong e botse.”—Ba-Hebere 10:​24, 25.

14. Ke eng seo ge e le gabotse se dirago gore seboka se atlege?

¹⁴ Ba bangwe ba ka ba le tshekamelo ya go lekanyetša boemo bja diboka ka bokgoni bja go ruta bja bao ba tšeago karolo. Ge e ba diboledi di na le bokgoni kudu, go ka thwe diboka ke tše di kgahlišago. Eupša ge e ba go ruta ka mo go atlegago go hlaelela, re ka fo ba le pono e fošagetšego. Ke therešo gore bao ba tšeago karolo lenaneong ba swanetše go dira sohle seo ba ka se kgonago go diriša bokgoni bja go ruta, kudu-kudu go fihlelela dipelo. (1 Timotheo 4:​16) Lega go le bjalo, rena bao re theeditšego ga se ra swanela go ba bao ba swayago diphošo ka mo go sa nyakegego. Gaešita le ge bokgoni bja go ruta bja batšea-karolo bo le bohlokwa, ga se bjona feela bjo bo dirago gore diboka di atlege. Na ga o dumele gore re swanetše go tshwenyega kudu ka tsela yeo re theetšago ka yona go e na le go tshwenyega ka gore seboledi se nea polelo ya sona gabotse gakaaka’ng? Ge re e-ba gona dibokeng gomme re tsepamiša kgopolo  go seo se bolelwago, re rapela Modimo ka go dumelelana le thato ya gagwe. Se ke seo se dirago gore diboka di atlege. Ge e ba re fišegela go monya tsebo ya go tseba Modimo, re tla holega dibokeng go sa šetšwe bokgoni bja seboledi. (Diema 2:​1-5) Ka gona, a re lekeng ka gohle go ikemišetša go ‘ela hloko go feta ka mo go tlwaelegilego’ dibokeng tša rena.

Holega ka mo go Tletšego Thutong ya Motho ka Noši

15. Go ithuta le go naganišiša go ka re hola bjang?

¹⁵ Re ka holega kudu ka go ‘ela hloko go feta ka mo go tlwaelegilego’ dinakong tša thuto ya motho ka noši le go naganišiša. Go bala le go naganišiša ka Beibele le dikgatišo tša Bokriste go tla re nea dibaka tše dibotse tša go nweletša ditherešo tša Lentšu la Modimo ka dipelong tša rena. Mafelelong se se tla ba le mafelelo a magolo tseleng yeo re naganago le go gata mogato ka yona. Ka kgonthe, go tla re thuša go thabela go dira thato ya Jehofa. (Psalme 1:2; 40:8) Ka gona, re swanetše go hlagolela matla a rena a go tsepamiša kgopolo e le gore a ka re hola ge re ithuta. Go šitišwa go bonolo kudu gakaakang! Ditšhitišo tše di sa rego selomogala goba lešata di ka dira gore re lahlegelwe ke go tsepamiša kgopolo. Goba mohlomongwe re ka ba re sa kgone go tsepamiša kgopolo ka nako e telele. Re ka dula fase ka maikemišetšo a mabotse a go iphepa moyeng, eupša kapejana monagano o ka ba o šetše o lelera. Re ka ‘ela hloko go feta ka mo go tlwaelegilego’ bjang nakong ya thuto ya motho ka noši ya Lentšu la Modimo?

16. (a) Ke ka baka la’ng go le bohlokwa go rena gore re rulaganye nako bakeng sa thuto ya motho ka noši? (b) O dirile bjang nako bakeng sa go ithuta Lentšu la Modimo?

¹⁶ Ke mo go holago go dira lenaneo le go kgetha lefelo leo go lego bonolo kudu go ithuta go lona. Go ba bantši ba rena, ga re kgone go ba le nako le go hwetša nako ya go ba noši. Re ka ikwa eka leema-ema la ditiragalo tša letšatši le letšatši di re gogola bjalo ka lekala nokaneng yeo e elelago ka lebelo. Ka kgonthe, re swanetše go lwantšhana le nokana ka tsela ya seswantšhetšo gomme re hwetše sehlakahlaka se senyenyane seo se fodilego. Re ka se ke ra fo letela gore nako ya go ithuta e itlele. Go e na le moo, re swanetše go laola boemo ka go dira nako ya go ithuta. (Ba-Efeso 5:​15, 16) Ba bangwe ba beela ka thoko nako mesong ge go se na tšhitišo e kgolo. Ba bangwe ba hwetša gore mantšiboa ke nako e kaone ya go ithuta. Ntlha ke gore ga se ra swanela go se šetše senyakwa sa bohlokwa sa go monya tsebo e nepagetšego ka Modimo le Morwa wa gagwe. (Johane 17:3) Ka gona anke re rulaganyeng nako ya thuto ya motho ka noši gomme re kgomarele lenaneo leo.

17. Go naganišiša ke eng, gomme go ka re hola bjang?

¹⁷ Go naganišišamokgwa wa go naganišiša ka seo re ithutilego sona thutonggo bohlokwa. Go re thuša go phagamiša dikgopolo tša Modimo tše di ngwadilwego gomme re di gatelele ka dipelong tša rena. Go naganišiša go re thuša go bona kamoo re ka dirišago keletšo ya Beibele e le gore re be “badiri ba Lentšu, e sexo bakwi fêla.” (Jakobo 1:​22-25) Go feta moo, go naganišiša go re thuša go batamela kgaufsi kudu le Jehofa, ka gobane go dira gore re kgone go naganišiša ka dika tša gagwe le kamoo di gatelelwago ka gona tabeng yeo e ahla-ahlwago dinakong tša go ithuta.

18. Ke maemo afe ao a nyakegago bakeng sa go naganišiša mo go atlegago?

¹⁸ E le gore re holwe ka mo go tletšego ke thuto le go naganišiša, re swanetše go tloša ditšhitišo ka monaganong. E le gore re hwetše tsebišo e mpsha ge re naganišiša, re swanetše go phema ditšhitišo tša bophelo bja mehleng yeno. Go dira se go tšea nako le go ipea lekatana, lega go le bjalo ke mo go lapološago gakaakang go ja dijo tša moya le go nwa meetse a therešo ao a hwetšwago ka Lentšung la Modimo!

19. (a) Mabapi le thuto ya motho ka noši, ke eng seo se thušitšego ba bangwe go oketša go tsepamiša kgopolo ka nako e telele? (b) Re swanetše go ba le boemo bofe bja kgopolo ka thuto, gomme re ka hwetša mehola efe modirong wo o bohlokwa?

¹⁹ Go thwe’ng ge e ba re sa kgone go tsepamiša kgopolo ka nako e telele gomme menagano ya rena e thoma go lelera ka morago ga nako e kopana ya go ithuta? Ba bangwe ba hweditše gore ba ka oketša matla a bona a go tsepamiša kgopolo ge ba ithuta ka go thoma ka go tšea nako e kopana ge ba ithuta gomme ganyenyane-ganyenyane ba e oketša. Pakane ya rena e swanetše go ba go fetša nako e lekanego re ithuta go e na le go fo kitimela go fetša. Re swanetše go hlagolela kgahlego e tseneletšego tabeng yeo e ahla-ahlwago. Gomme re ka dira nyakišišo e oketšegilego ka go diriša taba e ntši yeo e newago ke sehlopha sa molaki yo a botegago le yo bohlale. Go na le mohola o mogolo ka go nyakišiša “madiba a diphiri tša Modimo.” (1 Ba-Korinthe 2:​10) Go dira bjalo go dira gore re kgone go oketša tsebo ya rena ya go tseba Modimo le go hlagolela matla a rena a go nagana. (Ba-Hebere 5:​14) Ge e ba re le barutwana ba mafolofolo ba Lentšu la Modimo le gona re tla ba ba “swanelegago ka mo go lekanego go ruta ba bangwe.”—2 Timotheo 2:2, NW.

20. Re ka hlagolela le go boloka bjang tswalano ya kgaufsi le Jehofa Modimo?

²⁰ Go ba gona dibokeng tša Bokriste le go dira thuto ya motho ka noši go tla re thuša kudu go hlagolela le go boloka tswalano ya kgaufsi le Jehofa. Go molaleng gore go be go le bjalo ka mopsalme yo a itšego go Modimo: “Melaô ya xaxo ke e rata xakaka’ng! Ke eleletša yôna mehla yohle.” (Psalme 119:​97) Ka gona, anke re lekeng ka gohle go ba gona dibokeng, dikopanong tše dinyenyane le tše dikgolo. E bile re ka reka nako bakeng sa thuto ya Beibele le go naganišiša. Re tla putswa ka mo go humilego ka go ‘ela hloko go feta ka mo go tlwaelegilego’ Lentšu la Modimo.

[Mengwalo ya ka tlase]

Na o a Gopola?

• Ke ka baka la’ng Bakriste ba bangwe ba ba-Hebere ba be ba aroga tumelong ya kgonthe?

• Re ka dula bjang re le bao ba elago hloko dibokeng tša Bokriste?

• Ke eng seo se tla re thušago go holwa ke thuto ya motho ka noši ya Beibele le go naganišiša?

[Dipotšišo tša Thuto]

[Seswantšho go letlakala 11]

Bakriste ba ba-Hebere ba ile ba swanela go phafogela phedišo ya Jerusalema e bego e le kgaufsi

[Seswantšho go letlakala 13]

Batswadi ba ka thuša bana ba bona go holega dibokeng tša Bokriste