“Morêna, Re Rutê Xo Rapêla”

“E mongwê wa barutiwa ba xaxwe a mo kxopêla a re: Morêna, re rutê xo rapêla.”—LUKA 11:1.

1. Ke ka baka la’ng yo mongwe wa barutiwa ba Jesu a ile a kgopela Jesu gore a ba rute go rapela?

TIRAGALONG e nngwe ka 32 C.E., morutiwa wa Jesu o ile A mo šetša ge a be a rapela. Ga se a ka a kgona go kwa seo Jesu a bego a se botša Tatagwe, ka gobane go bonagala e be e le thapelo ya setu. Lega go le bjalo, ge Jesu a feditše, morutiwa o ile a re go yena: “Morêna, re rutê xo rapêla.” (Luka 11:1) Ke’ng seo se ilego sa hlohleletša kgopelo ye? Thapelo e be e le karolo ya ka mehla ya bophelo le borapedi bja ba-Juda. Mangwalo a Sehebere a na le dithapelo tše dintši ka pukung ya Dipsalme le mafelong a mangwe. Ka gona morutiwa yo o be a sa kgopele go rutwa selo se itšego seo a bego a sa tsebe selo ka sona goba seo a sa kago a se dira. Ga go na pelaelo gore o be a tlwaelane le dithapelo tše di rulagantšwego tša baetapele ba bodumedi bja bo-Juda. Eupša ga bjale o be a ile a šetša Jesu ge a rapela, gomme ka ntle le pelaelo o ile a bona gore go be go na le phapano e kgolo magareng ga dithapelo tša go itira baloki tša bo-rabi le tsela yeo Jesu a rapetšego ka yona.—Mateo 6:5-8.

2. (a) Ke’ng seo se bontšhago gore Jesu o be a sa bolele gore re swanetše go boeletša thapelo ya mohlala lentšu ka lentšu? (b) Ke ka baka la’ng re e-na le kgahlego ya go tseba kamoo re ka rapelago ka gona?

² Dikgwedi tše ka bago tše 18 pejana, Jesu Thutong ya gagwe ya Thabeng o be a ile a nea barutiwa ba gagwe mohlala woo ba ka theago dithapelo tša bona go ona. (Mateo 6:9-13) Go bonagala morutiwa yo a be a se gona ka nako yeo, ka gona ka botho Jesu o ile a boeletša dintlha tše bohlokwa tša thapelo yeo ya mohlala. Seo se lemogegago ke ntlha ya gore ga se a ka a e boeletša lentšu ka lentšu, e lego seo se bontšhago gore o be a sa nee thapelo ya borapedi bjo bo rulagantšwego yeo e bego e swanetše go tsebja ka hlogo. (Luka 11:1-4) Ka go swana le morutiwa yoo a sa bolelwego ka leina, le rena ka mo go swanago re nyaka go rutwa kamoo re ka rapelago ka gona e le gore dithapelo tša rena di tle di re batametše kgaufsi kudu le Jehofa. Ka gona anke re ahla-ahleng ka botlalo pego ya thapelo ya mohlala, bjalo ka ge e begilwe ke moapostola Mateo. E na le dikgopelo tše šupago, tšeo tše tharo tša tšona di lego mabapi le merero ya Modimo gomme tše nne di lego mabapi le dinyakwa tša rena tša nama le tša moya. Mo sehlogong se re tla ahla-ahla dikgopelo tše tharo tša mathomo.

Tate yo Lerato

3, 4. Ke’ng seo se bolelwago ke go bitša ga rena Jehofa ka gore ke “Tata-wešo”?

³ Go tloga mathomong, Jesu o ile a bontšha gore dithapelo tša rena di swanetše go bontšha tswalano ya kgaufsi le Jehofa eupša e le yeo e nago le tlhompho. Ge a be a bolela bakeng sa gore go holege kudu barutiwa ba gagwe bao ba bego ba bokane kgaufsi le yena moo thoko ga thaba, Jesu o ile a ba botša gore ba bitše Jehofa ka gore ke “Tata-wešo wa maxodimong.” (Mateo 6:9) Go ya ka seithuti se sengwe, go sa šetšwe gore Jesu o boletše ka sebopego seo se tlwaelegilego sa Sehebere goba ka se-Arama, lentšu leo  a le dirišitšego bakeng sa ‘Tate’ le swana le leo ngwana yo monyenyane a bego a tla le diriša ge a bitša tatagwe ka tsela e lerato. Go bitša Jehofa ka gore “Tata-wešo” go bontšha tswalano e borutho le ya go mo holofela.

⁴ Le gona ka go bolela gore “Tata-wešo,” re dumela gore re karolo ya lapa le legolo la banna le basadi bao ba lemogago Jehofa e le Monei wa Bophelo. (Jesaya 64:8; Ditiro 17:24, 28) Bakriste bao ba tloditšwego ka moya ba thwetšwe e le “bana ba Modimo” gomme go yena ba ka kgona go “hlaboša mantšu [ba] re: Baba! Tata!” (Ba-Roma 8:14, 15) Ba dimilione ba fetogile bagwera ba bona bao ba botegago ka go se kwanantšhe. Ba ba neetše maphelo a bona go Jehofa gomme ba bontšhitše boineelo bja bona ka kolobetšo ya meetseng. ‘Dinku tše tše dingwe’ ka moka le tšona di ka batamela Jehofa ka leina la Jesu gomme tša mmitša “Tata-wešo.” (Johane 10:16; 14:6) Re ka ya go Tatago rena wa legodimong ka mehla ka thapelo bakeng sa go mo tumiša, go mo leboga bakeng sa mediro ya gagwe ka moka ya go loka yeo a re direlago yona gotee le go lahlela merwalo ya rena go yena, re kgodišegile gore o na le taba le rena.—Ba-Filipi 4:6, 7; 1 Petro 5:6, 7.

Lerato Bakeng sa Leina la Jehofa

5. Kgopelo ya mathomo ke efe thapelong ya mohlala, gomme ke ka baka la’ng ye e le yeo e swanetšego?

⁵ Di tloga fase kgopelo ya mathomo e bea dilo tšeo di tlago pele maemong a pele. E re: “Leina la xaxo a le kxêthwê.” (Mateo 6:9) Ee, go kgethagatšwa ga leina la Jehofa e swanetše go ba selo seo re tshwenyegilego kudu ka sona ka gobane re a mo rata gomme re hloile go bona kgobogo ka moka yeo e bego e dutše e pharwa leineng la gagwe. Go rabela ga Sathane le go hlohleletša ga gagwe batho ba babedi ba pele gore ba se ke ba kwa Jehofa Modimo go ile gwa thomeletša leina la Gagwe ka go belaela tsela yeo Modimo a bego a diriša bogoši bja gagwe bja legohle. (Genesi 3:1-6) Go oketša moo, go theoša le nywaga-kgolo, leina la Jehofa le ile la gobošwa ka ditiro le dithuto tše di lešago dihlong tša bao ba ipolelago gore ba a mo emela.

6. Ke’ng seo re tla se phemago ge re rapelela gore leina la Jehofa le kgethagatšwe?

⁶ Go rapelela ga rena go kgethagatšwa ga leina la Jehofa go bontšha moo re emego gona tabeng ya bogoši bja legohle—re thekga ka mo go feletšego tshwanelo ya Jehofa ya go buša legohle. Jehofa o nyaka gore legohle le dulwe ke dibopiwa tše bohlale tšeo ka go rata le ka lethabo di ikokobeletšago bogoši bja gagwe bja go loka ka gobane di mo rata le go rata sohle seo se emelago leina la gagwe. (1 Koronika 29:10-13; Psalme 8:1; 148:13) Lerato la rena bakeng sa leina la Jehofa le tla re thuša go phema go dira selo le ge e le sefe seo se ka tlišago kgobošo leineng leo le lekgethwa. (Hesekiele 36:20, 21; Ba-Roma 2:21-24) Ka ge khutšo ya legohle le ya badudi ba lona e ithekgile ka go kgethagatšwa ga leina la Jehofa le go ikokobeletša bogoši bja gagwe ka go rata, go rapela ga rena gore “leina la xaxo a le kxêthwê,” ke pontšho ya go kgodišega ga rena gore morero wa Jehofa o tla phethagatšwa bakeng sa go mo tumiša.—Hesekiele 38:23.

 Mmušo Woo re o Rapelelago

7, 8. (a) Mmušo woo Jesu a rutilego gore re o rapelele ke’ng? (b) Re ithuta’ng mabapi le Mmušo wo ka pukung ya Daniele le ya Kutollo?

⁷ Kgopelo ya bobedi thapelong ya mohlala ke e rego: “Mmušô wa xaxo a o tlê.” (Mateo 6:10) Kgopelo ye e tswalana kgaufsi le ya mathomo. Sedirišwa sa Jehofa sa go kgethagatša leina la gagwe le lekgethwa ke Mmušo wa Mesia, mmušo wa gagwe wa legodimong, woo Morwa wa gagwe Jesu Kriste e lego Kgoši ya wona yeo e kgethilwego ka mo go swanetšego. (Psalme 2:1-9) Boporofeta bja Daniele bo swantšha Mmušo wa Mesia le “lefsika” leo le ntšhitšwego ‘thabeng.’ (Daniele 2:34, 35, 44, 45) Thaba e swantšhetša bogoši bja Jehofa bja legohleng, ka gona lefsika la Mmušo ke pontšho e mpsha ya bogoši bja Jehofa bja legohleng. Boporofeteng bjo, ka morago lefsika le ile “la ba thaba e kxolo, la tlala lefase ka moka,” e lego seo se swantšhetšago gore Mmušo wa Mesia o tla emela bogoši bja Modimo ka go buša lefase.

⁸ Bao ba lego gotee le Kriste pušong ye ya Mmušo ke ba bangwe ba 144 000, bao “ba rekolotšwexo bathong” gore ba buše le yena e le dikgoši le baperisita. (Kutollo 5:9, 10; 14:1-4; 20:6) Daniele o bolela ka ba e le “bakxêthwa ba Yo-xodimo-dimo,” bao bona gotee le Hlogo ya bona e lego Kriste, ba amogelago “mmušô le boxoši le matla a xo buša mebušô ka moka ka tlase xa lexodimo. Mmušô wa xaxwe ké mmušô wo o sa felexo; ’me mebušô ka moka e tlo loba Yêna ya Mo hlankela.” (Daniele 7:13, 14, 18, 27) Wo ke wona mmušo wa legodimong woo Kriste a rutilego balatedi ba gagwe go o rapelela.

Ke ka Baka La’ng re sa Dutše re Rapelela Mmušo Gore o tle?

9. Ke ka baka la’ng e le mo go swanetšego go rena go rapelela gore Mmušo wa Modimo o tle?

⁹ Thapelong ya gagwe ya mohlala, Kriste o re rutile gore re rapelele go tla ga Mmušo wa Modimo. Go phethagala ga boporofeta bja Beibele go bontšha gore Mmušo wa Mesia o ile wa hlongwa legodimong ka 1914. * Ka go rialo, na e sa dutše e le mo go swanetšego gore re rapelele gore Mmušo woo “o tlê”? Go tloga go swanetše. Ka gobane Mmušo wa Mesia woo o swantšhetšwago ke lefsika boporofeteng bja Daniele, o thulana ka go lebanya le mebušo ya batho ya dipolitiki, yeo e swantšhetšwago ke seswantšho se segolo. Lefsika le sa dutše le tlo lwantšhana le seswantšho seo, la se šilaganya go fihlela se fetoga lerole. Boporofeta bja Daniele bo re: ‘Mmušo wo o ka se ke wa selela go setšhaba se sengwe. O tlo pšhatla mebušo e mengwe ka moka wa e fediša; ge e le wona, o tlo ema go ya go ile.’—Daniele 2:44.

10. Ke ka baka la’ng re hlologetše go tla ga Mmušo wa Modimo?

¹⁰ Re hlologetše go bona Mmušo wa Modimo o tlela tshepedišo e kgopo ya dilo ya Sathane ka gobane se se tla bolela go kgethagatšwa ga leina le lekgethwa la Jehofa le go tlošwa ga baganetši ka moka ba bogoši bja Modimo. Re rapela ka go tšwa pelong gore: “Mmušô wa xaxo a o tlê,” gomme re bolela gotee le moapostola Johane gore: “Amene! Tlaa Morêna Jesu!” (Kutollo 22:20) Ee, anke Jesu a tle bakeng sa go tlo kgethagatša leina la Jehofa le go lwela bogoši bja Gagwe,  e le gore go phethagale mantšu a mopsalme ao a rego: “Gore ba tsebe gobane ke wene o nnoši, o bitšwago Jehofa, Yo godimo-dimo godimo ga lefase ka moka.”—Psalme 83:18 (83:19, PK).

“Thatô ya Xaxo a e Dirwê”

11, 12. (a) Re kgopela’ng ge re rapelela gore thato ya Modimo “e dirwê mono lefaseng byalo ka xe e dirwa lexodimong”? (b) Ke’ng se sengwe gape seo se bolelwago ke go rapelela ga rena gore thato ya Jehofa e dirwe?

¹¹ Se se latelago Jesu o ile a ruta barutiwa ba gagwe go rapela ka gore: “Thatô ya xaxo a e dirwê mono lefaseng byalo ka xe e dirwa lexodimong.” (Mateo 6:10) Legohle le bile gona ka baka la thato ya Jehofa. Dibopiwa tše matla tša legodimong di goeletša ka gore: “E a swanetšwexo ke letaxô le thêtô le matla ke Wene Morêna Modimo wa rena, xobane ke Wene O hlodilexo dilô tšé; xe di tšwêlêla di hlolexile, ké ka xobane O ratile fao.” (Kutollo 4:11) Jehofa o na le morero bakeng sa “dilô tšohle tša lexodimong le tša lefaseng.” (Ba-Efeso 1:8-10) Ka go rapelela gore thato ya Modimo e dirwe, ge e le gabotse re kgopela Jehofa gore a phethagatše morero wa gagwe. Go feta moo, ka go rialo re bontšha gore re hlologetše go bona thato ya Modimo e dirwa legohleng ka moka.

¹² Le gona ka thapelo ye re bontšha go rata ga rena go dumelelanya maphelo a rena le thato ya Jehofa. Jesu o itše: “Sejô sa-ka ké xe ke dira thatô ya E a nthomilexo, xe ke phêtha medirô ya xaxwe.” (Johane 4:34) Ka go swana le Jesu, ka ge re le Bakriste ba ineetšego re thabišwa ke go dira thato ya Modimo. Lerato la rena bakeng sa Jehofa le bakeng sa Morwa wa gagwe le re tutueletša go phela maphelo a rena ‘ka go se sa phelela dikganyogo tša batho, eupša ra phelela thato ya Modimo.” (1 Petro 4:1, 2; 2 Ba-Korinthe 5:14, 15) Re katanela go phema go dira dilo tšeo re tsebago gore di thulana le thato ya Jehofa. (1 Ba-Thesalonika 4:3-5) Ka go reka nako ya go bala Beibele le go ithuta, re “hlatha se Modimo a se rataxo,” e lego seo se akaretšago go tšea ga rena karolo ka mafolofolo go boleleng “ditaba tše tše dibotse tša mmušo.”—Ba-Efeso 5:15-17; Mateo 24:14, NW.

Thato ya Jehofa Legodimong

13. Thato ya Modimo e be e dutše e dirwa bjang kgale pele ga ge borabele bja Sathane bo ka direga?

¹³ Thato ya Jehofa e be e dutše e phethagatšwa legodimong kgale pele ga ge yo mongwe wa barwa ba gagwe ba moya a ka rabela gomme a fetoga Sathane. Puku ya Diema e hlalosa Morwa wa Modimo wa leitšibulo e le mothofatšo wa bohlale. E bontšha gore ka nako e telele kudu, Morwa wa Modimo yo a tswetšwego a nnoši o be a “bapala pele xa xaxwe ka mehla,” a thabela go dira thato ya Tatagwe. Mafelelong, o ile a ba “mohlankana” wa Jehofa go bopeng dilo ka moka “tšohle tša kwa maxodimong le mo ’faseng . . . tše di bônwaxo le tše di sa bonwexo.” (Diema 8:22-31; Ba-Kolose 1:15-17) Jehofa o ile a diriša Jesu e le Lentšu la gagwe goba Mmoleledi wa gagwe.—Johane 1:1-3.

14. Re ka ithuta’ng go tšwa go Psalme 103 mabapi le kamoo barongwa ba phethago thato ya Jehofa ka gona legodimong?

¹⁴ Mopsalme o bontšha gore bogoši bja Jehofa bo phagametše tšohle le gore mašaba a barongwa a theetša mantšu a gagwe a tlhahlo le ditaelo tša gagwe. Re bala gore: “Morêna, sedulô sa xaxwe ó se theile kwa maxodimong; ’me mmušô wa xaxwe o buša tše xo fêla. Rêtang Morêna, lena Barongwa ba xaxwe, lena baxale ba matla ba xo dira ka Lentšu la xaxwe, ba xo theetša se a se bolêlaxo. Rêtang Morêna, lena madirá a xaxwe ohle, lena bahlanka ba xaxwe ba xo dira tše di mo kxahlaxo. Rêtang Morêna, lena dibopya tša xaxwe ka moka, tše di lexo mo xo fêla mmušong [goba bogošing bja] wa xaxwe.”—Psalme 103:19-22.

15. Go amogela ga Jesu matla a Mmušo go ile gwa kgoma bjang go dirwa ga thato ya Modimo legodimong?

¹⁵ Ka morago ga borabele bja gagwe, Sathane o be a sa dutše a kgona go tsena dikgorong tša legodimong, bjalo ka ge go bontšhitšwe ka pukung ya Jobo. (Jobo 1:6-12; 2:1-7) Lega go le bjalo, puku ya Kutollo e ile ya porofeta gore go tla tla nako yeo ka yona Sathane le batemona ba gagwe ba tlago go rakwa legodimong. Go bonagala nako yeo e tlile kapejana ka morago ga ge Jesu Kriste a amogetše matla a Mmušo ka 1914.  Ga e sa le go tloga ka nako yeo, ga go sa na madulo bakeng sa marabele ao kua legodimong. A lahletšwe tikologong ya lefaseng. (Kutollo 12:7-12) Le ka mohla ga go sa kwewa lentšu la ngangišano legodimong, go kwewa feela mantšu ao a kopanego go tumišeng “Kwana” e lego Kriste Jesu le go tumišeng Jehofa ka boikokobetšo. (Kutollo 12:7-12) Ka kgonthe, thato ya Jehofa e a phethagatšwa legodimong.

Thato ya Jehofa Bakeng sa Lefase

16. Thapelo ya mohlala e ganetšana bjang le thuto ya Bojakane ya mabapi le kholofelo ya batho?

¹⁶ Dikereke tša Bojakane ga di akaretše lefase mererong ya Modimo, di bolela gore batho ka moka bao ba lokilego ba ya legodimong. Eupša Jesu o re rutile go rapela ka gore: “Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.” (Mateo 6:10) Le ge go ka thwe’ng, na go ka bolelwa gore ka kakaretšo thato ya Jehofa e a phethagatšwa lehono lefaseng leo le hlasetšwego ke bosenyi, go hloka toka, bolwetši le lehu? Le gatee-tee! Ka go rialo re swanetše go rapela ka go tšwa pelong gore thato ya Modimo e dirwe mo lefaseng, ka go dumelelana le kholofetšo yeo e begilwego ke moapostola Petro e rego: “Se re se letetšexo ka xo kwa dikholofedišô tša xaxwe ké maxodimo a mafsa [Mmušo wa Mesia ka pušo ya Kriste] le lefase le lefsa [lekoko la batho ba go loka], moo xo axilexo tokô.”—2 Petro 3:13.

17. Morero wa Jehofa ke ofe ka lefase?

¹⁷ Jehofa o be a e-na le morero ka go bopa lefase. O ile a budulela moporofeta Jesaya go ngwala gore: “Xobane Morêna Mo-hlôla-maxodimo, Yêna Modimo-dimo Mmopi wa lefase, a le dira a le thêkxa, a se le bope ya ba la lefêla, a le dirêla xo dulwa ke batho, ké Yêna a rexo: Morêna ké Nna, xa xo sa n’e yo mongwê.” (Jesaya 45:18) Modimo o ile a bea batho ba babedi ba pele tšhemong ya paradeise gomme a ba laela gore: “Tswalang Le atê, tlalang lefase, Le le fenyê.” (Genesi 1:27, 28; 2:15) Ka mo go lego molaleng, morero wa Mmopi ke gore lefase le dulwe ke moloko o phethagetšego wa batho bao ba lokilego bao ka lethabo ba ikokobeletšago bogoši bja Jehofa gomme ba phele ka mo go sa felego Paradeiseng yeo e holofeditšwego ke Kriste.—Psalme 37:11, 29; Luka 23:43.

18, 19. (a) Ke’ng seo se swanetšego go dirwa pele ga ge thato ya Modimo e direga ka mo go feletšego mo lefaseng? (b) Ke dibopego dife tše dingwe tša thapelo ya Jesu ya mohlala tšeo di tlago go ahla-ahlwa sehlogong se se latelago?

¹⁸ Thato ya Jehofa mabapi le lefase le ka mohla e ka se phethagatšwe ka botlalo ge lefase le sa dutše le dulwa ke banna le basadi bao ba nyatšago bogoši bja gagwe. A diriša matla a magolo a moya ka tlase ga boetapele bja Kriste, Modimo o tla “senya basenya-lefase.” Tshepedišo ya Sathane ka moka e kgopo ya dilo le bodumedi bja yona bja maaka, dipolitiki tše di gobogilego, kgwebo ya megabaru le yeo e sa botegego gotee le madira ao a bolayago di tla fedišwa ka mo go sa felego. (Kutollo 11:18; 18:21; 19:1, 2, 11-18) Bogoši bja Jehofa bo tla godišwa gomme leina la gagwe le kgethagatšwe. Tše ka moka re di rapelela ge re re: “Tata-wešo wa maxodimong! Leina la xaxo a le kxêthwê; Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.”—Mateo 6:9, 10.

¹⁹ Lega go le bjalo, thapelong ya gagwe ya mohlala, Jesu gape o bontšhitše gore re ka rapela mabapi le ditaba tša rena tša motho ka noši. Dibopego tše tša thuto ya gagwe mabapi le thapelo di tla ahla-ahlwa sehlogong se se latelago.

[Mongwalo wa ka tlase]

E le go Boeletša

• Ke ka baka la’ng e le mo go swanetšego gore re bitše Jehofa ka gore ke “Tata-wešo”?

• Ke ka baka la’ng e le gabohlokwa kudu gore re rapelele go kgethagatšwa ga leina la Jehofa?

• Ke ka baka la’ng re rapelela Mmušo wa Modimo gore o tle?

• Ke’ng seo se bolelwago ke ge re rapelela gore thato ya Modimo e direge mo lefaseng bjalo ka legodimong?

[Dipotšišo tša Thuto]

[Seswantšho go letlakala 9]

Dithapelo tša Jesu di be di fapana kudu le dithapelo tša go itira baloki tša Bafarisei

[Seswantšho go letlakala 10]

Bakriste ba rapelela gore Mmušo wa Modimo o tle, leina la gagwe le kgethagatšwe gomme thato ya gagwe e dirwe