“Go Tsebatša Leina la Jehofa”

LEFASENG ka bophara, Morokami le makasine wo o sepedišanago le wona e lego Phafoga!, di lebogwa kudu ka baka la go kgotsofatša ga tšona moyeng le go ruta ga tšona ka tsela e holago. Morago bjale mmadi wa kua Fora ge a gopola ka se, o ngwadile lengwalo le:

“Ke mosadi yo mofsa wa setlogo sa Afrika, yo a nago le thuto e lekanyeditšwego kudu. E sego kgale kudu, ke ile ka thoma go bala dimakasine tša lena. Ka ge ke kgahlilwe ke dihlogo tša tšona, ke thoma go lemoga mohola wa go bala. Ka baka la tšona, ke kgonne go kaonefatša tlotlontšu ya-ka le gona ke kgona go ngwala lengwalo leo le se nago diphošo tše dintši.

“Ke makatšwa ke gore le ahla-ahla dilo ka moka tšeo di bolelago ka batho, lefase le Mmopi. Dihlogo tše di kwešišega gabonolo le gona di dira motho gore e be mmadi yo mafolofolo. Ga go na motho yo a nago le bokgoni bja go ruta batho ba mehuta ka moka ka nako e tee.

“Ke makatšwa gape ke go tseba gore se ka moka le se dira e sego ka baka la tša kgwebo eupša le se dira ka baka la go tsebatša leina la Jehofa. Ke a tseba gore o a le thekga, gomme ke a leboga. Hle tšwelang pele le hwetša matla go tšwa go Mmopi e le gore le rute batho.”

Dihlatse tša Jehofa gabjale di tšwela pele ka modiro wa tšona wa go ruta Beibele dinageng tše 235. Morokami o gatišwa ka maleme a 148 gomme Phafoga! ka a 87. Dimakasine tše ga di gatišetšwe go iša theto go motho le ge e le mang. Keletšo e theilwego Beibeleng le tsebišo e lego nakong e hwetšwago go tšona e reretšwe go hlompha Mmopi yo a rego: “Nna Morêna Modimo . . . ke Xo ruta tše di Xo holaxo.” (Jesaya 48:17) Eka o ka holwa ke go bala Mangwalo a Makgethwa ka mehla gotee le dithušo tše tša go ithuta Beibele tše di hwetšagalago.