Na o Tseba Lethabo Leo le Tlišwago ke go Nea?

O FEDITŠE nywaga e ka bago 50 a le mafolofolo tirelong ya Bokriste. Gaešita le ge ditla-morago tša nywaga ya botšofadi di mo dirile gore a fokole mmeleng, o be a ikemišeditše go etela Holo ya Mmušo yeo e bego e sa tšwa go agwa. O ile a tsena ka holong a itshwareletše ka letsogo la ngwanabo rena wa Mokriste yo a bego a thuša, gomme a sepela ka go nanya a lebile go seo a bego a se nyaka—lepokisi la moneelo. Gona moo, o ile a lahlela tšhelete e lekanetšego yeo a bego a dutše a e bolokela morero wo. Gaešita le ge a be a sa kgone go tsenya letsogo go agweng ga holo, o be a nyaka go thuša.

Mosadi yo wa Mokriste a ka go gopotša ka mosadi yo mongwe yo a botegago—“mohlôlôxadi wa modiitšana” yo Jesu a mmonego a lahlela ditšheletiana tše pedi ka polokelong ya tempele. Ga re botšwe ka maemo a gagwe, eupša go se be le monna ka nako yeo go be go ka bea mosadi maemong a thata a tša ditšhelete. Jesu o ile a mo kwela bohloko e le ruri, ka ge a be a kwešiša tlalelo ya gagwe ka botlalo. Ka go mmontšha e le mohlala go baapostola ba gagwe, o ile a lemoga gore mpho ya gagwe e nyenyane e be e swantšhetša “tšohle tše a bexo a na natšô’, è le tšohle tše a bexo a tlo phela ka tšôna.”—Mareka 12:41-44.

Ke ka baka la’ng mosadi yo a hlokago go etša mohlologadi yo wa modiidi a bego a ka ikgafa ka tsela e bjalo? Go molaleng gore e be e le ka baka la ge a be a ineetše ka mo go tseneletšego go Jehofa Modimo, yo borapedi bja gagwe bo bego bo theilwe tempeleng kua Jerusalema. Gaešita le ge a be a sa kgone go dira mo gontši gakaalo, o be a nyaka go tšwetša pele tirelo e kgethwa. Le gona o swanetše go ba a ile a ikwa a thabile e le ka kgonthe ka go neela selo le ge e le sefe seo a bego a ka se kgona.

Go Nea e le go Thekga Modiro wa Jehofa

Go neela ka dilo tše di bonagalago le ka tšhelete e be e dutše e le karolo e bohlokwa ya borapedi bja therešo, gomme ka mehla e be e dutše e le mothopo wa lethabo le legolo. (1 Koronika 29:9) Isiraeleng ya bogologolo, meneelo e be e sa dirišetšwe feela go botsefatša tempele eupša gape e be e dirišetšwa go boloka dibopego ka moka tša borapedi bja Jehofa moo di šoma ka mehla. Molao o be o bontšha gore bana ba Isiraele ba neele karolo ya lesome ya dilo tšeo ba di tšweleditšego bakeng sa go thekga ba-Lefi bao ba bego ba dira ditirelo tša tempeleng. Eupša ba-Lefi le bona ba be ba swanetše go neela karolo ya lesome go  Jehofa ya dilo tšeo ba di amogetšego.—Numeri 18:21-29.

Gaešita le ge Bakriste ba ile ba lokollwa dilong tšeo di bego di nyakwa ke kgwerano ya Molao, molao wa motheo wa gore bahlanka ba Modimo ba neele ka dilo tše di bonagalago e le go thekga borapedi bja therešo o ile wa dula o sa fetoge. (Ba-Galatia 5:1) Go oketša moo, Bakriste ba lekgolong la pele la nywaga ba ile ba go lebelela e le mo go thabišago go neela bakeng sa go thuša bana babo bona ka dilo tšeo ba bego ba di hloka. (Ditiro 2:45, 46) Moapostola Paulo o gopoditše Bakriste gore go fo etša ge Modimo a be a nea dilo tše dibotse ka seatla se se bulegilego, le bona ba swanetše go nea ba bangwe ka seatla se se bulegilego. O ngwadile gore: “Bahumi ba mehleng ya byale ba laêlê O re ba se ikxodišê, ba se holofêlê lehumô la xo tla le xo tloxa; ba holofêlê Modimo e a phelaxo, e a re faxo tšohle xore di re natêfêlê. Ba laêlê O re ba humê medirô e boló, ba ratê xo nea, ba abêlê ba bangwê. E bê xôna xo ithuêla, xo thêa mothêô wa mehla e tl’o xo tla xore ba fihlêlê byo e lexo bophelô bya ruri.” (1 Timotheo 6:17-19; 2 Ba-Korinthe 9:11) Go tšwa phihlelong ya motho ka noši, Paulo o be a ka kgonthišetša e le ka kgonthe mantšu a Jesu a rego: “Lešexo la monei le phala la monewa.”—Ditiro 20:35.

Go Nea ga Bakriste Lehono

Lehono, bahlanka ba Jehofa ba tšwela pele go diriša dilo tša bona tše bohlokwa go thušana le go thekga modiro wa Modimo. Gaešita le bao ba nago le mo gonyenyane ba neela seo ba ka se kgonago. “Molaki e a bôtêxaxo yo bohlale” o ikwa a ikarabela go Jehofa gore a diriše meneelo ye ka tsela e kaone-kaone. (Mateo 24:45) Ditšhelete di dirišetšwa go dira gore makala a tšwele pele a šoma, go fetolela le go tšweletša Dibeibele le dipuku tše di theilwego Beibeleng, go rulaganya dipokano tše dikgolo tša Bokriste, go tlwaetša le go romela balebeledi ba basepedi le baromiwa mafelong a mangwe, go hlakodiša le bakeng sa merero e mengwe e mentši ya bohlokwa. Anke re lebišeng tlhokomelo go o mongwe wa merero e bjalo—go ntšha meneelo bakeng sa go aga mafelo a borapedi.

Dihlatse tša Jehofa di bokana ka makga a mmalwa mo bekeng Diholong tša tšona tša Mmušo e le gore di holwe ke thuto ya moya le bogwera bjo bo agago. Lega go le bjalo, dinageng tše dintši maemo a tša boiphedišo ga a dumelele Dihlatse tša lefelong leo go  lefelela tšhelete ya go aga Diholo tša Mmušo ntle le gore di thome ka go hwetša thušo ya tša ditšhelete. Ka baka leo, ka 1999, Dihlatse tša Jehofa di ile tša thoma lenaneo la go diriša ditšhelete go tšwa dinageng tše di humilego kudu e le go thuša go aga Diholo tša Mmušo dinageng tše di diilago kudu. Go oketša moo, baithapi ba dikete ba ile ba gafa nako le bokgoni bja bona, gantši ba šoma dikarolong tše di lego lekatana tša dinaga tše. Nakong ya go aga, Dihlatse tša lefelong leo di ithuta bokgoni bja go aga le bja go hlokomela moago, gomme Sekhwama sa Holo ya Mmušo se dira gore di kgone go reka didirišwa tše di nyakegago le ditlabakelo. Dihlatse tšeo ga bjale di dirišago diholo tše tše difsa di tloga di thabetše gore badumedi-gotee le tšona ba ile ba neela ka nako ya bona le tšhelete. Le gona, Dihlatse tša lefelong leo di neela kgwedi le kgwedi e le gore di hlokomele Holo ya Mmušo e mpsha le go thuša go lefa ditshenyagalelo tša go aga, ka go rialo tša thuša go agweng ga Diholo tša Mmušo tše di oketšegilego.

Diholo tša Mmušo di agwa go dirišwa mekgwa le ditlabakelo tše di tlwaelegilego lefelong leo. Gaešita le ge diholo tše di se tša kgabišwa ka mo go feteletšego, di a ipiletša, ke tše tlwaelegilego e bile o a iketla go tšona. Ge lenaneo la go aga le be le thoma ka 1999, go ile gwa akaretšwa dinaga tše ka bago 40 tšeo di nago le ditlabakelo tše sego nene. Go tloga ka nako yeo, lenaneo la go aga le ile la katološwa gore le akaretše dinaga tše bjalo tše 116, go akaretša tekanyo e fetago seripa-gare sa diphuthego tša Dihlatse tša Jehofa lefaseng. Nywageng e mehlano e fetilego, Diholo tša Mmušo tše fetago 9 000 di ile tša agwa ka tlase ga thulaganyo ye, e lego palo-gare ya diholo tše difsa tše fetago 5 letšatši le letšatši! Lega go le bjalo, dinageng tše tše 116, go sa nyakega Diholo tša Mmušo tše difsa tše 14 500. Ka tšhegofatšo ya Jehofa le ka go rata gotee le go nea ka seatla se se bulegilego ga Dihlatse go dikologa lefase, go holofelwa gore go tla ba le ditšhelete tše lekanego bakeng sa go kgotsofatša dinyakwa tše.—Psalme 127:1.

Diholo tša Mmušo di Dira Gore go be le Koketšego

Boiteko bjo bjo bogolo bo bile le mafelelo afe go Dihlatse tša lefelong leo le modirong wa go bolela ka Mmušo? Mafelong a mantši, go na le koketšego e kgolo kudu ya batho bao ba bago gona dibokeng ka morago ga ge go  agilwe Holo e mpsha ya Mmušo. Mohlala o swanago o hwetšwa pegong ye e tšwago Burundi e rego: “Gatee-tee ge Holo ya Mmušo e sa tšwa go fetšwa, e a tlala. Ka mohlala, Holo e nngwe ya Mmušo e ile ya agelwa phuthego yeo e bego e e-ba le palo-gare ya batho ba 100 dibokeng tša yona. Holo ya bona ya Mmušo e mpsha e be e e-na le madulo a lekanago 150. Ka nako yeo e feditšwego ka yona, batho ba 250 ba be ba e ba gona dibokeng.”

Ke ka baka la’ng go e-ba le koketšego e kaalo? Ka baka la lebaka letee la gore dihlopha tša bagoeledi ba Mmušo bao ba bego ba se na lefelo le le swanetšego la diboka eupša ba bego ba swanetše go bokana ka tlase ga sehlare goba lebaleng ka dinako tše dingwe ba a belaelwa. Nageng e nngwe, bošoro bja morafo bo ile bja tswalanywa le dihlopha tše bjalo tše dinyenyane tša bodumedi, gomme molao o nyaka gore diboka ka moka tša bodumedi di swarelwe ka gare ga ntlo ya borapedi.

Go ba le diholo tša tšona gape go thuša Dihlatse tša Jehofa go bontšha batho setšhabeng gore ga se tšona barutiwa ba motho yo a itšego yo e lego moruti. Ofisi ya lekala ya Zimbabwe ya Dihlatse tša Jehofa e ngwadile gore: “Nakong e fetilego, bana babo rena lefelong le ba be ba kopana ka malapeng a bona, gomme batho ba lefelong leo ba ile ba tseba phuthego ka mong wa ntlo yeo ba bego ba kopanela go yona. Ba be ba ka bolela ka bana babo rena e le ba kereke ya semang-mang. Tše ka moka di a fetoga gona bjale ka ge batho ba bona gabotse leswao leo le hlaolago holo e nngwe le e  nngwe e le ‘Holo ya Mmušo ya Dihlatse tša Jehofa.’”

Banei ba ba Thabilego

Moapostola Paulo o ngwadile gore: “Mo-nea-à-thabile, Modimo ó a mo rata.” (2 Ba-Korinthe 9:7) Go ba gona, meneelo e mentši e a thuša. Eupša karolo e kgolo ya ditšhelete tšeo di neetšwego bakeng sa modiro wa Dihlatse tša Jehofa e tšwa mapokising a moneelo Holong ya Mmušo. Go sa šetšwe gore ke e mentši goba e menyenyane, meneelo ka moka e bohlokwa e bile ga e hlokomologwe. Gopola gore Jesu o ile a ema moo a bego a ka kgona go bona mohlologadi wa modiitšana a neela ditšheletiana tša gagwe tše pedi. Barongwa le Jehofa le bona ba ile ba mmona. Ga re tsebe gaešita le leina la mohlologadi yo, eupša Jehofa o ile a kgonthišetša gore tiro ya gagwe yeo e se nago boithati e ngwalelwe sa ruri ka Beibeleng.

Go oketša tabeng ya go agwa ga Diholo tša Mmušo, meneelo ya rena e thekga dikarolo tše dingwe ka moka tša modiro o bohlokwa wa Mmušo. Go dirišana ka tsela ye go re nea mabaka a go thaba le go “atiša malebó a ba ba leboxaxo Modimo.” (2 Ba-Korinthe 9:12) Bana babo rena ba Bakriste kua Benin ba bega gore: “Letšatši le lengwe le le lengwe go hlatloga dithapelo tše dintši tša tebogo di e-ya go Jehofa bakeng sa thušo ya tša ditšhelete ye e hweditšwego borwarreng bja ditšhaba-tšhaba.” Ka nako e swanago, ka moka ga rena bao re tšeago karolo go thekgeng modiro wa Mmušo ka tša ditšhelete, re hwetša lethabo leo le tlišwago ke go nea ga Bokriste!

[Lepokisi go letlakala 22, 23]

Ditsela Tšeo ka Tšona ba Bangwe ba Kgethago go Nea

MENEELO BAKENG SA MODIRO WA LEFASE KA BOPHARA

Ba bantši ba beela ka thoko tekanyo ya tšhelete yeo ba e tsenyago ka mapokising a ngwadilwego “Meneelo Bakeng sa Modiro wa Lefase ka Bophara—Mateo 24:14.”

Kgweding e nngwe le e nngwe, diphuthego di romela ditšhelete tše ofising ya Dihlatse tša Jehofa yeo e hlankelago naga ya gabo tšona. Meneelo ya boithatelo ya ditšhelete e ka romelwa ka go lebanya go Watch Tower Bible and Tract Society of Pennsylvania, c/o Accounting Office, Private Bag X2067, Krugersdorp, 1740, South Africa, goba ofising ya lekala yeo e hlankelago naga ya geno. Ditšheke di swanetše go lefelelwa go “Watch Tower.” Mabenyabje le dilo tše dingwe tše bohlokwa le tšona di ka neelwa. Lengwalo le lekopana leo le bolelago gore selo se se bjalo ke mpho e neelwago ka go lebanya le swanetše go sepela le meneelo ye.

GO NEA MO GO RULAGANYEDITŠWEGO

Go tlaleletša dimphong tša ditšhelete tše di newago ka go lebanya, go na le mekgwa e mengwe ya go nea bakeng sa go hola tirelo ya Mmušo ya lefase ka bophara. Ye e akaretša:

Phemelo: Watch Tower e ka ngwadišwa e le moja-bohwa wa thulaganyo ya tša phemelo ya bophelo goba thulaganyo ya go rola modiro/phenšene.

Di-stock le di-bond: Di-stock le di-bond di ka neelwa go Watch Tower e le mpho e neelwago ka go lebanya.

Dintlo le Mafelo ao e Lego Dithoto: Dintlo le mafelo ao e lego dithoto ao a ka rekišwago a ka neelwa e le mpho e neelwago ka go lebanya goba ge e ba e le lefelo la bodulo, ka go boloka thoto e le go monei, yo a ka tšwelago pele a dula go yona ge a sa dutše a phela. Ikopanye le ofisi ya lekala ya nageng ya geno pele o fetiša ntlo le ge e le efe goba lefelo leo e lego thoto.

Dikeno: Dithoto goba tšhelete di ka tlogelelwa Watch Tower e le bohwa ka go dirišwa ga keno e dirilwego ka molao.

Bakeng sa tsebišo e oketšegilego, o ka ikopanya le Accounting Office, e ka ba ka go ngwala goba ka mogala atereseng yeo e lokeleditšwego ka mo tlase goba ofising ya lekala ya Dihlatse tša Jehofa yeo e hlankelago naga ya geno.

Accounting Office

Watch Tower Bible and Tract Society of Pennsylvania

Private Bag X2067,

Krugersdorp, 1740, South Africa

Mogala: (011) 761 1000

[Caption on page 20]

Zambia

[Caption on page 20]

Mafelo a diboka a kgale le a mafsa a Dihlatse tša Jehofa

[Caption on page 21]

Repabliki ya Afrika Bogare