Dipotšišo tše Tšwago go Babadi

Batemona ba tla be ba le kae nakong ya Pušo ya Kriste ya Nywaga e Sekete?

Beibele ga e arabe potšišo ye ka go lebanya. Lega go le bjalo, re ka fihlelela phetho e kwagalago mabapi le moo batemona ba tla bego ba le gona nakong ya Pušo ya Kriste ya Nywaga e Sekete.

Ge a nea ponelo-pele ya seo se tlago go direga mathomong le mafelelong a Nywaga ye e Sekete, moapostola Johane o re: “Ka bôna Morongwa à fofa lexodimong á swere sekxonyu sa Sekoti, a swere le kêtanê e kxolo ka seatla. A swara Nôxa-kxolo, Nôxa yela ya mehleng, e lexo yêna Diabolo le Sathane, a e tlêma xore e fetšê nywaxa e sekete è tlemilwe. A e lahlêla Sekoting, a e kxonyeletša moo, a tiiša ka seká sa leswaô, xore e se hlwê e aroša dithšaba, xo bê xo fetê nywaxa e sekete. Xe yôna e fetile ó tlo hunollwa, a fetša lebakanyana à hunoloxile.” (Kutollo 20:1-3) Ditemana tše di bolela feela ka go lahlelwa ga Sathane sekoting le go lokollwa ga gagwe mafelelong ka lebakanyana. Gaešita le ge go sa bolelwe ka batemona, go bonagala e le mo go kwagalago gore ge morongwa yo a swerego sekgonyu sa sekoti—Jesu Kriste yo a tagafaditšwego—a swara le go lahlela Diabolo sekoting, o tla dira se se swanago ka batemona.—Kutollo 9:11.

Ka morago ga go ba Kgoši legodimong ka 1914, Jesu Kriste o ile a gata mogato wo o bilego le mafelelo a tseneletšego go Sathane gotee le batemona. Kutollo 12:7-9 e re: “Kwa lexodimong xwa tsoxa ntwa ya xe Mikaele le Barongwa ba xaxwe bà e-lwa le Nôxa, ’me Nôxa è e-lwa è na le Barongwa ba yôna [batemona]. Nôxa ya se kê ya fenya; kwa lexodimong xwa se kê xwa hlwa xò e-ba le madulô a yôna. Nôxa e kxolo yeo ya rakwa; yôna ye ba rexo ké Diabolo le Sathane, motimetši wa lefase ka moka la batho. Ya lahlêlwa lefaseng; le Barongwa ba yôna ba lahlwa le yôna.” Ga e sa le go tloga ka yona nako yeo, Sathane le batemona ba gagwe ba dumeletšwe feela go ba lefaseng. Re ka nagana ka mo go kwagalago gore ge Jesu Kriste a thibela ditiro tša Sathane ka mo go oketšegilego e le gore a lokolle lefase tutuetšong ya gagwe e mpe, O tla dira se se swanago ka batemona.

Le gona nagana ka boporofeta bja mathomo-thomo bja Beibele. Bo balega ka gore: “Ke [Modimo] bea lehlôyô xare xa xaxo [Sathane] le mosadi [mokgatlo wa Jehofa wa legodimong], le xare xa peu ya xaxo [ya Sathane] le peu ya xaxwe [Jesu Kriste]. Yôna e tlo Xo phšatla hlôxô; ’me wêna O tlo e loma serêthê.” (Genesi 3:15) Go pšhatlwa ga noga hlogo go akaretša go lahlelwa ga Sathane sekoting nakong ya Pušo ya Kriste ya Nywaga e Sekete. Boporofeta ge bo tšwela pele bo bolela gore go tla ba le bonaba magareng ga Yo a pšhatlago hlogo le peu ya Sathane. Peu ye, goba mokgatlo, e akaretša karolo e sa bonagalego yeo e bopšago ke barongwa ba kgopo, goba batemona. Ka gona ke mo go kwagalago go phetha ka gore ge Jesu a lahlela Sathane sekoting, batemona le bona o a ba tlema gomme o ba lahlela go sona. Therešo ya gore meoya e kgopo e ipontšhitše e boifa kudu go lahlelwa sekoting e bontšha gore e tseba ka thibelo ye yeo e tlago.—Luka 8:31.

Lega go le bjalo, na go a kgonega gore Kutollo 20:1-3 e ka ba e sa bolele ka batemona ka gobane ba fedišitšwe ka Haramagedone gotee le  karolo e bonagalago ya peu ya Sathane? Beibele e hlalosa gore go bonagala kgonagalo ye e se ya therešo. Mabapi le seo se tlago go diragalela Sathane mafelelong, Beibele e re: “’Me Diabolo wa xo ba fora, a lahlêlwa bodibeng bya mollô le thsêbêla, mo xo ilexo Sebata le Moporofeta wa maaká. Ba tlo tlaišwa mosexare le bošexo xo iša mehleng ya neng le neng.” (Kutollo 20:10) Sebata le moporofeta wa maaka ke mekgatlo ya tša dipolitiki gomme ke karolo ya mokgatlo o bonagalago wa Sathane. (Kutollo 13:1, 2, 11-14; 16:13, 14) Ba fedišwa ka Haramagedone, ge Mmušo wa Modimo o pšhatla le go fediša mebušo ka moka ya lefase. (Daniele 2:44) Beibele e bolela ka “[mollo] o sa felexo o lokišeditšwexo Diabolo le Barongwa ba xaxwe.” (Mateo 25:41, mongwalo o sekamego ke wa rena.) Sathane le batemona ba gagwe ba tla lahlelwa “bodibeng bya mollô le thsêbêla” bjo go bjona go lahletšwego sebata le moporofeta wa maaka e le gore le bona ba fedišetšwe ruri. Ge e ba moya o sa bonagalego o matla kudu wa peu ya Sathane o ka be o fedišitšwe ka Haramagedone, go molaleng gore batemona ba ka be ba ile ba bolelwa e le bao ba šetšego ba lahletšwe bodibeng bjoo bja seswantšhetšo gotee le sebata le moporofeta wa maaka. Go se bolelwe ga bona go Kutollo 20:10 go bontšha gore batemona ga ba fedišwe ka Haramagedone.

Ka ge go sa bolelwe ka go lebanya gore batemona ba lahletšwe sekoting, e bile ga go bolelwe ka go lebanya gore ba lokolotšwe go sona. Lega go le bjalo, mafelelo a bona ke a swanago le a Diabolo. Ka morago ga go lokollwa le Diabolo le go dirišana le yena nakong ya teko ya mafelelo ya go leka batho bofelong bja nywaga e sekete, batemona le bona ba tla lahlelwa bodibeng bja mollo gomme ka go rialo ba tla fedišetšwa ruri.—Kutollo 20:7-9.

Ka gona, gaešita le ge Kutollo 20:1-3 e bolela feela ka Sathane e le yena a swarwago le go lahlelwa sekoting seo go sona a ka se sa kgonago go dira selo, re ka phetha ka mo go kwagalago gore barongwa ba gagwe le bona ba tla tlengwa gomme ba lahlelwa go sona. Sathane gaešita le sehlopha sa gagwe sa batemona ba ka se dumelelwe gore ba tsena-tsenane le go phethagatšwa ga morero wa Modimo wa go fetoša lefase gore e be paradeise le go tsošološa batho gore e be ba phethagetšego nakong ya Pušo ya Kriste ya Nywaga e Sekete.