Na o Hlologetše Lefase Leo le se Nago Poifo?

“Re phela ‘boemong bjo bo hlobaetšago ka mehla, bja go phakgama ka mo go oketšegilego le . . . bja go itlhoboga,’ bjo bo tutuetšwago ke . . . ’kotsi yeo go sa kgonthišegwago ka yona, yeo e ka hlaselago ka nako le ge e le efe le ka mokgwa le ge e le ofe ka ntle le go lemoša e sa le pele.’”

MANTŠU a, ao a tsopotšwego ngwageng wa go feta ka makasineng wa Newsweek, a bontšha maikwelo ao batho ba phelago ka tlase ga ona lefaseng la lehono la khuduego. Jesu Kriste o bontšhitše gore maikwelo a bjalo e tla ba a tseneletšego nakong e tlago. O boletše gore go tla tla nako moo ditšhaba di tlago go ba ka tlase ga tlalelo le gore batho ba tla gakanega le go nolega moko ka poifo le go dula ba re lefase le sa tlo welwa ke eng. Lega go le bjalo, rena ga se ra swanela go tšhoga goba go itlhoboga, ka gobane Jesu o okeditše ka gore: “Xe tšeo di thôma xo dirêxa, Le inamoloxê, Le tsošê dihlôxô tša lena, ka xobane xo tlo ba xò batamêla topollô ya lena.”—Luka 21:25-28.

Ge a hlalosa ka maemo a bophelo a batho ba gagwe lefaseng ka morago ga go phološwa moo, Jehofa Modimo o boletše gore: “Sethšaba sa-ka se tlo dula maxaeng a moláô, nywakong e bôtêxaxo, madulong a xo iketla.” (Jesaya 32:18) Ka moporofeta wa gagwe Mika, Jehofa o itše: “Motho ó tlo dula meriting ya morara w’axwe, le mo moriting wa moxó wa xaxwe, xò se e a ba thšošaxo.”—Mika 4:4.

Seo se fapane kudu gakaakang le bophelo bja lehono! Ga go kotsi e sa tsebjego yeo e tlago go tšhoša batho. Go e na le boemo bjo bo hlobaetšago bja go phakgama le bja go itlhoboga, go tla ba le khutšo ya sa ruri le lethabo.