Tsomang Jehofa, Mohlahlobi Wa Dipelo
Tsomang Jehofa, Mohlahlobi Wa Dipelo
“Nnyakeng Le phelê!”—AMOSI 5:4.
1, 2. Mangwalo a bolela’ng ge a re Jehofa “ó bôna pelo”?
JEHOFA MODIMO o ile a botša moporofeta Samuele gore: “Motho ó bôna se se lebanaxo le mahlô a xaxwe; Morêna Yêna ó bôna pelo.” (1 Samuele 16:7) Ke bjang Jehofa a ‘bonago pelo’?
2 Ka Mangwalong, pelo gantši e dirišwa bakeng sa go swantšhetša seo motho a lego sona ka gare—dikganyogo tša gagwe, dikgopolo tša gagwe le maikwelo a gagwe. Ka gona, ge Beibele e re Modimo o bona pelo, e bolela gore o bona ka kua ga ponagalo ya ka ntle gomme o lebiša tlhokomelo go seo motho a tlogago a le sona ka gare.
Modimo o Hlahloba Isiraele
3, 4. Go ya ka Amosi 6:4-6, ke maemo afe ao a bego a le mmušong wa meloko e lesome wa Isiraele?
3 Ge Mohlahlobi wa dipelo a be a lebelela mmušong wa meloko e lesome wa Isiraele wa mehleng ya Amosi, O ile a bona’ng? Amosi 6:4-6 e bolela ka banna bao ba bego ba ‘dula ditulong tša lenaka la tlou, ba go nama dilaong tša bona.’ Ba be ba ‘e-ja dikwana tša mehlape le dinamane tše nonnego.’ Banna ba bjalo ba be ba letša ‘makope a gore ba opele’ gomme ba be ba ‘e-nwa sedila ka dikgamelo.’
4 Mathomong se se ka bonagala e le se se kgahlišago. Ba iketlile magaeng a bona a manobonobo, bahumi ba thabela dijo le dino tše kaone-kaone gomme ba thabišwa ka diletšo tša mmino o bose. Le gona ba be ba e-na le “didulô tša ’naka la tlou.” Baepi ba marope ba hweditše manaka a tlou ao a betlilwego ka tsela e kgahlišago kudu kua Samaria, e lego motse-mošate wa mmušo wa Isiraele. (1 Dikxoši 10:22) Go bonagala a mantši a ona a be a kgomareditšwe phahlong gaešita le go tsenywa diphaneleng tša maboto.
5. Ke ka baka la’ng Modimo a be a sa kgahlwe ke ba-Isiraele ba mehleng ya Amosi?
5 Na Jehofa Modimo o be a sa kgahlwe ke gore ba-Isiraele ba be ba phela ka boiketlo, ba thabela dijo tše bose, ba e-nwa beine e bose e bile ba theetša mmino o kgahlišago? Ga go bjalo le gatee. Ge e le gabotse o nea batho dilo tše bjalo ka boati e le gore ba di thabele. (1 Timotheo 6:17) Seo se bego se sa kgahle Jehofa e be e le dikganyogo tše di fošagetšego tša batho, boemo bjo kgopo bja dipelo tša bona le boemo bja bona bja kgopolo bja go se hlomphe Modimo le go se rate ba-Isiraele-gotee le bona.
6. Boemo bja moya bja Isiraele mehleng ya Amosi e be e le bofe?
6 Ba ‘go nama dilaong tša bona, ba e-ja dikwana tša mehlape le dinamane tše nonnego, ba e-nwa sedila e bile ba letša makope gore ba opele’ ba be ba letetšwe ke selo seo ba sa se tsebego. Banna bao ba ile ba botšišwa gore: ‘Na le re letšatši la dikotsi le sa le kgole?’ Ba be ba swanetše go ba ba ile ba gateletšwa kudu ke boemo bja Isiraele, eupša ba ile ba se ke ba “re selo ka thôbêxô ya Josefa.” (Amosi 6:3-6) Go sa šetšwe katlego ya tša boiphedišo ya setšhaba, Modimo o ile a bona gore Josefa—goba Isiraele—o be a le boemong bjo kotsi bja moya. Lega go le bjalo, batho ba ile ba tšwela pele ka mediro ya bona ya letšatši le letšatši ba sa šetše selo. Batho ba bantši lehono ba na le boemo bjo bo swanago bja kgopolo. Ba ka ba ba tseba gore re phela dinakong tša mathata, eupša ge feela seo se sa ba kgome, ga ba na taba le tlalelo ya ba bangwe e bile ga ba na kgahlego dilong tša moya.
Isiraele—Setšhaba Seo se Senyegago
7. Go be go tla direga’ng ge e ba ba-Isiraele ba be ba sa ele hloko ditemošo tša Modimo?
7 Puku ya Amosi e hlalosa boemo bjo bo senyegilego bja setšhaba, go sa šetšwe ponagalo ya sona ya ka ntle ya go ba seo se atlegilego. Ka baka la go palelwa ke go ela hloko ditemošo tša Modimo le go lokiša pono ya bona, Jehofa o tla ba tlogela gore ba wele diatleng tša manaba a bona. Ba-Asiria ba be ba tla ba tloša ditulong tša bona tše dibotse tša lenaka la tlou, gomme ba ba goga gore ba ba iše bothopša. Ba ka se sa hlwa ba thabela bophelo bja boiketlo!
8. Go tlile bjang gore Isiraele e be boemong bjo bobe bja moya?
8 Go tlile bjang gore ba-Isiraele ba be boemong bjo bjalo? Boemo bjo bo thomile go rotoga ka 997 B.C.E., ge Kgoši Salomo a be a hlatlangwa ke morwa wa gagwe Rehabeama gomme meloko e lesome ya Isiraele e arogana le moloko wa Juda le wa Benjamini. Kgoši ya pele ya mmušo wa meloko e lesome wa Isiraele e be e le Jerobeama, e lego “morwa wa Nebata.” (1 Dikxoši 11:26) Jerobeama o ile a kgodiša batho ba mmušong wa gagwe gore go be go le thata go bona go tšea leeto la go ya Jerusalema go yo rapela Jehofa. Lega go le bjalo, o be a se a tshwenyega e le ka kgonthe ka boemo bja batho bjo bobotse bja tša maphelo. Go e na le moo, o be a leka go šireletša dikgahlego tša gagwe ka noši. (1 Dikxoši 12:26) Jerobeama o be a boifa gore ge e ba ba-Isiraele ba be ba tšwela pele go ya tempeleng kua Jerusalema menyanyeng ya ngwaga le ngwaga go yo rapela Jehofa, ba be ba tla feleletša ba kgomaretše mmušo wa Juda. Ka ge a be a nyaka go thibela se, Jerobeama o ile a hloma dinamane tše pedi tša gauta, e nngwe kua Dani gomme e nngwe ya ba kua Bethele. Ka go rialo, borapedi bja namane bo ile bja fetoga bodumedi bja Setšhaba mmušong wa Isiraele.—2 Koronika 11:13-15.
9, 10. (a) Ke menyanya efe ya bodumedi yeo e bego e rulagantšwe ke Kgoši Jerobeama? (b) Modimo o be a lebelela bjang menyanya yeo e bego e swarwa kua Isiraele mehleng ya Kgoši Jerobeama II?
9 Jerobeama o ile a leka go nea bodumedi bjo bofsa sebopego sa gore e be bjo bo hlomphegago. O ile a rulaganya menyanya yeo e nyakilego e swana le menyanya yeo e bego e swarelwa Jerusalema. Go 1 Dikxoši 12:32, re bala gore: “Jerobeama a bea letšatši la lesome le metšô e mehlano la kxwedi ya seswai, ya ba la monyanya o swanaxo le wa Ba-Juda a tliša didimo aletareng. Ké tše a di dirilexo Bethele.”
10 Jehofa le ka mohla ga se a ka a amogela menyanya e bjalo ya bodumedi bja maaka. O ile a hlalosa seo ka mo go kwagalago ka Amosi lebakeng la ka godimo ga ngwaga-kgolo ka morago nakong ya ge go buša Jerobeama II, yo a ilego a ba kgoši ya mmušo wa meloko e lesome wa Isiraele mo e ka bago ka 844 B.C.E. (Amosi 1:1) Go ya ka Amosi 5:21-24, Modimo o itše: “Menyanya ya lena ke e hloile, ke e hlaswitše; diôrêlô tša diphuthexong tša lena xa di nnatefele. Xe Le ntlišetša dihlabêlô le dibexô, xa di nkxahle; le dileboxá tša lena tše nonnexo ke xana xo di bôna. Lesang xo nthlodia ka mašata a dikoša tša lena; medumô ya diletšô tša lena xa ke e kwe. A xo tšwêlêlê tokô e êlê bo-ka meetse, le bokwala a bo etšê noka e sa phšexo.”
Go Swana ga Mehla Yeno le e Fetilego
11, 12. Ke go swana gofe mo go lego gona magareng ga borapedi bja Isiraeleng ya bogologolo le bjoo bo hwetšwago Bojakaneng?
11 Go molaleng gore Jehofa o ile a hlahloba dipelo tša bao ba bego ba tšea karolo menyanyeng ya kua Isiraele gomme ga se a ka a amogela menyanya le dihlabelo tša bona. Ka mo go swanago lehono, Modimo ga a amogele menyanya ya Bojakane ya boheitene e bjalo ka Keresemose le Easter. Go barapedi ba Jehofa, go loka go ka se tswalane le go hloka molao, gomme seetša se ka se tswalane le lefsifsi.—2 Ba-Korinthe 6:14-16.
12 Go swana mo gongwe go ka lemogwa magareng ga borapedi bja ba-Isiraele bao ba bego ba rapela namane le bjo bo hwetšwago Bojakaneng. Gaešita le ge ba bangwe bao ba ipolelago gore ke Bakriste ba amogela therešo ya Lentšu la Modimo, borapedi bja Bojakane ka bobjona ga bo tutuetšwe ke lerato la kgonthe la go rata Modimo. Ge nkabe bo be bo tutuetšwa ke lona, bo be bo tla phegelela go rapela Jehofa “ka môya le ka xo rereša,” ka ge woo e le mohuta wa borapedi bjo bo mo kgahlago. (Johane 4:24) Go feta moo, Bojakane ga bo dire gore “tokô e êlê bo-ka meetse, le bokwala bo etšê noka e sa phšexo.” Go e na le moo, bo tšwela pele bo nyenyefatša dilo tšeo Modimo a di nyakago tša mabapi le boitshwaro. Bo dumelela bootswa le dibe tše dingwe tše dikgolo e bile bo fihla bokgoleng bja go šegofatša manyalo a batho ba bong bjo bo swanago!
“Le Ratê tše Botse”
13. Ke ka baka la’ng re swanetše go phela ka go dumelelana le mantšu a Amosi 5:15?
13 Go bohle bao ba hlologelago go mo rapela ka tsela e amogelegago, Jehofa o re: “Hlôyang tše mpe, Le ratê tše botse.” (Amosi 5:15) Lerato le lehloyo ke maikwelo a matla ao a tšwago pelong ya seswantšhetšo. Ka ge pelo e le moradia, re swanetše go dira sohle seo se lego matleng a rena gore re e diše. (Diema 4:23; Jeremia 17:9) Ge e ba re dumelela dipelo tša rena gore di hlagolele dikganyogo tše di fošagetšego, re ka ikhwetša re rata se sebe gomme re hloile se sebotse. Le gona, ge e ba re kgotsofatša dikganyogo tše bjalo ka go dira sebe, go ba ba fišegago kudu go ka se re dire gore re amogelwe ke Modimo. Ka gona, anke re rapeleleng thušo ya Modimo e le gore re ‘hloye tše mpe, gomme re rate tše botse.’
14, 15. (a) Kua Isiraeleng, ke bomang ba ba bego ba le gare ga bao ba bego ba dira tše botse, eupša ba bangwe ba bona ba ile ba swarwa bjang? (b) Re ka kgothatša bjang bao ba lego tirelong ya nako e tletšego lehono?
14 Ga se ba-Isiraele ka moka bao ba bego ba dira dilo tše mpe mahlong a Jehofa. Ka mohlala, Hosea le Amosi ‘ba be ba rata tše botse’ gomme ba ile ba hlankela Modimo ka go botega e le baporofeta. Ba bangwe ba ile ba dira keno ya go ba Baitlami. Mehleng ka moka ya Boitlami bja bona, ba ile ba phema go diriša ditšweletšwa tša morara, kudu-kudu beine. (Numeri 6:1-4) Ba-Isiraele ba bangwe ba ile ba lebelela bjang tsela ya boikgafo ya batho ba bjalo bao ba dirago se sebotse? Karabo e tšhošago ya potšišo yeo e utolla go goboga mo gogolo ga setšhaba moyeng. Amosi 2:12 e re: “’Me lena, [Baitlami] ba-ka la ba noša byalwa, la iletša baporofeta xo ka porofeta.”
15 Ka go bona mohlala wa potego wa Baitlami le wa baporofeta, ba-Isiraele bao ba be ba swanetše go hlabja ke dihlong e bile ba be ba swanetše go tutueletšega go fetoša ditsela tša bona. Go e na le moo, ka go hloka lerato ba ile ba leka go nyamiša babotegi gore ba se nee Modimo letago. Le ka mohla, re se ke ra kgothaletša Bakriste-gotee le rena bao e lego babulamadibogo, baromiwa, balebeledi ba basepedi goba ditho tša lapa la Bethele gore ba kgaotše tirelo ya bona ya nako e tletšego e le gore ba fo boela go seo se bitšwago bophelo bjo bo tlwaelegilego. Go e na le moo, anke re ba kgothaletšeng gore ba tšwele pele ka modiro wa bona o mobotse!
16. Ke ka baka la’ng ba-Isiraele ba be ba le boemong bjo bokaone kudu mehleng ya Moše go feta bjoo ba bego ba le go bjona mehleng ya Amosi?
16 Gaešita le ge ba-Isiraele ba bantši ba be ba thabela bophelo bjo bo kgotsofatšago bja go ba le dilo tše di bonagalago bja mehleng ya Amosi, ba be ba sa ‘humela Modimong.’ (Luka 12:13-21) Bo-rakgolokhukhu ba bona ba be ba e-ja manna feela lešokeng ka nywaga e 40. Ba be ba sa je dipoo tše di nontšhitšwego goba go dula ka go iketla ditulong tša lenaka la tlou. Lega go le bjalo, Moše o ile a ba botša ka mo go swanetšego gore: “Morêna Modimo wa xaxo ó Xo šexofaditše medirong ka moka ya diatla tša xaxo. . . . Nywaxa e masome a manê e fedile à na naxô’, wa se kê wa hlôka selô.” (Doiteronomio 2:7) Ee, ba-Isiraele ge ba le lešokeng ka mehla ba be ba e-na le dilo tšeo ba bego ba di nyaka e le ka kgonthe. Se sekaone le go feta ke gore ba be ba hwetša lerato la Modimo, tšhireletšo ya gagwe le tšhegofatšo!
17. Ke ka baka la’ng Jehofa a ile a etelela pele ba-Isiraele ba bogologolo go tsena Nageng ya Kholofetšo?
17 Jehofa o ile a gopotša batho ba mehleng ya Amosi gore O tlišitše bo-rakgolokhukhu ba bona Nageng ya Kholofetšo le gore o ba thušitše go fediša manaba a bona ka moka go yona. (Amosi 2:9, 10) Eupša ke ka baka la’ng Modimo a ile a etelela pele ba-Isiraele bao ba bogologolo go ba ntšha Egipita gomme a ba iša nageng ya kholofetšo? Na e be e le gore ba tle ba phele bophelo bja manobonobo bja go se šetše gomme ba lahle Mmopi wa bona? Aowa! Go e na le moo, o dirile bjalo e le gore ba kgone go mo rapela e le batho ba lokologilego le ba hlwekilego moyeng. Eupša, badudi ba mmušong wa meloko e lesome wa Isiraele ga se ba ka ba hloya se sebe le go rata se sebotse. Go e na le moo, ba be ba nea diswantšho tše di betlilwego letago, e sego Jehofa Modimo. A mahlabiša-dihlong a makaakang!
Jehofa o a ba Sekiša
18. Ke ka baka la’ng Jehofa a re lokolotše moyeng?
18 Modimo o be a ka se hlokomologe boitshwaro bja ba-Isiraele bjo bo lešago dihlong. O ile a hlalosa boemo bja gagwe ka mo go kwagalago ge a be a re: “Ke Le sekiša melato ya lena ka moka.” (Amosi 3:2) Mantšu ao a dira gore re naganišiše ka go phološwa ga rena ka noši bokgobeng bja Egipita ya mehleng yeno, e lego tshepedišo ye ya gona bjale e kgopo ya dilo. Jehofa ga se a re lokolla moyeng e le gore re kgone go phegelela dipakane tša boithati. Go e na le moo, o dirile se e le gore re mo tumiše go tšwa pelong re le batho ba lokologilego bao ba tšeago karolo borapeding bjo bo hlwekilego. Le gona, ka moka ga rena re tla ikarabela mabapi le tsela yeo ka yona re dirišago tokologo ya rena yeo re e neilwego ke Modimo.—Ba-Roma 14:12.
19. Go ya ka Amosi 4:4, 5, ba-Isiraele ba bantši ba be ba šetše ba thomile go rata’ng?
19 Ka manyami, molaetša o matla wo o neilwego ke Amosi o ile wa hlokomologwa ke badudi ba bantši ba Isiraele. Moporofeta o ile a pepentšha bolwetši bja moya bja boemo bja bona bja pelo ka mantšu a begilwego go Amosi 4:4, 5, a rego: “Le ka no fêla Lè ikêla kwa Bethele, Lè hlanoxa Lè befiša dikaroxô kua Giligala; . . . xobane ké se Le se rataxo, lena Ba-Isiraele.” Ba-Isiraele ba be ba sa ka ba hlagolela dikganyogo tše di swanetšego. Ba be ba sa ka ba diša dipelo tša bona. Ka baka leo, bontši bja bona ba ile ba thoma go rata se sebe gomme ba hloya se sebotse. Barapedi bao ba hlogo-thata ba namane ga se ba ka ba fetoga. Jehofa o be a tla ba sekiša, gomme ba be ba tla swanelwa ke go hwela dibeng tša bona!
20. Motho a ka phegelela bjang tsela yeo e dumelelanago le Amosi 5:4?
20 Go swanetše go ba go be go se bonolo go motho le ge e le ofe yo a bego a phela Isiraeleng ka nako yeo gore a dule a botegela Jehofa. Ka tsela ya seswantšhetšo go ka bolelwa gore ga go bonolo go se ye le mogofe, go etša ge Bakriste lehono, ba bafsa le ba ba godilego, ba tseba seo gabotse. Eupša go rata Modimo le go kganyoga go mo kgahliša go ile gwa tutueletša ba-Isiraele ba bangwe gore ba be borapeding bja therešo. Jehofa o ile a fetišetša taletšo e borutho go bona yeo e begilwego go Amosi 5:4, e rego: “Nnyakeng Le phelê.” Lehono, ka mo go swanago Modimo o bontšha kgaugelo go bao ba itsholago gomme ba mo nyaka ka go monya tsebo e nepagetšego ya Lentšu la gagwe ke moka ba dira thato ya gagwe. Ga go bonolo go phegelela tsela ye, eupša go dira bjalo go lebiša bophelong bjo bo sa felego.—Johane 17:3.
Go Atlega go sa Šetšwe Tlala ya Moya
21. Ke tlala ya mohuta ofe yeo e welago bao ba sego borapeding bja therešo?
21 Ke’ng seo se letetšego bao ba sa kago ba thekga borapedi bja therešo? Tlala e šoro—tlala ya moya! Morena yo a Phagamego Jehofa o itše: “Xo tla matšatši a ke tl’o xo romêla tlala mo faseng, e sexo tlala ya boxôbê, e sexo lenyôra la meetse; e tlo ba xo lla xo kwa Lentšu la Morêna.” (Amosi 8:11) Bojakane bo boemong bjo bjalo bjo bo kwešago bohloko bja tlala ya moya. Eupša, batho ba dipelo tše dibotse ba lego Bojakaneng ba kgona go bona katlego ya moya ya batho ba Modimo gomme ba kgeregela mokgatlong wa Jehofa. Phapano magareng ga boemo bjo bo lego Bojakaneng le bjo bo atilego gare ga Bakriste ba therešo e bonagala gabotse mantšung a Jehofa a rego: “Tsebang, bahlanka ba-ka ba tlo ja, ’me lena la hwa ka tlala. Tsebang, bahlanka ba-ka ba tlo nwa, ’me lena la nyôrwa. Tsebang, bahlanka ba-ka ba tlo thaba, ’me lena la lewa ke dihlong.”—Jesaya 65:13.
22. Ke ka baka la’ng re e-na le lebaka la go thaba?
22 Re le bahlanka ba Jehofa, na rena ka noši re thabela dithulaganyo tša moya le ditšhegofatšo tšeo re nago le tšona? Ge re ithuta Beibele le dikgatišo tša Bokriste e bile re e ba gona dibokeng tša rena, dikopanong tše dinyenyane le tše dikgolo, re tloga re ikwa re nyaka go goeletša ka lethabo ka baka la boemo bjo bobotse bja pelo. Re hlalala ka baka la kwešišo e botse yeo re nago le yona ka Lentšu la Modimo, go akaretša le boporofeta bjo bo buduletšwego ke Modimo bja Amosi.
23. Bao ba neago Modimo letago ba thabela’ng?
23 Go batho ka moka bao ba ratago Modimo le go nyaka go mo nea letago, boporofeta bjo bja Amosi bo na le molaetša wa kholofelo. Go sa šetšwe gore boemo bja rena bja gona bjale bja tša boiphedišo ke bofe goba gore ke mathata afe ao re lebeletšanago le ona lefaseng le leo le dubegilego, rena bao re ratago Modimo re thabela ditšhegofatšo tše di tšwago go Modimo le dijo tša moya tše kaone-kaone. (Diema 10:22; Mateo 24:45-47) Ka gona, letago ka moka le išwa go Modimo, yo a re neago dilo tšohle ka boati gore di re hole. Ka gona, eka re ka ikemišetša go mo nea tumišo ya rena e tšwago pelong ka mo go sa felego. Yeo e tla ba tokelo ya rena e thabišago ge e ba re tsoma Jehofa, Mohlahlobi wa dipelo.
[Dipotšišo tša Thuto]
[Caption on page 21]
Ba-Isiraele ba bantši ba be ba phela bophelo bja manobonobo eupša ba be ba sa thabele katlego ya moya
[Caption on page 23]
Kgothaletšang bahlanka ba nako e tletšego gore ba tšwele pele ka modiro wa bona o mobotse
[Caption on page 25]
Ga go na tlala ya moya bathong ba Jehofa ba thabilego
O tla Araba Bjang?
• Ke maemo afe ao a bego a le gona Isiraeleng mehleng ya Amosi?
• Boemo bja mmušo wa meloko e lesome wa Isiraele bo swana bjang le boemo bja mehleng yeno?
• Ke tlala efe yeo go boletšwego ka yona e sa le pele yeo e lego gona ga bjale, eupša ke bomang bao ba sa kgongwego ke yona?