Lwantšha Dikgopolo tše di Fošagetšego!

GE A be a lebeletšane le masetla-pelo, mopatriareka Jobo o ile a etelwa ke bagwera ba gagwe ba bararo e lego Elifase, Bilidada le Tsofara. Ba be ba tletše go tlo mo lliša le go mo homotša. (Jobo 2:11) Yo a bego a e-na le tutuetšo kudu gomme mohlomongwe e le yo mogolo go ba bararo ba e be e le Elifase. E be e le yena wa pele go bolela gomme o be a e-na le dilo tše dintši tšeo a bego a nyaka go di bolela. Ke kgopolo ya mohuta ofe yeo Elifase a ilego a e bonagatša dipolelong tša gagwe tše tharo?

Ge a gopola ka phihlelo yeo e phagametšego matla a tlhago yeo a kilego a ba le yona, Elifase o itše: “Xwa feta motho-môya, nna kè lebeletše; meriri ya mmele wa-ka ya titimoloxa; A êma, ke se hlathê sebopêxô s’axwe; ka re e fo ba sebônwa fêla, xò le “tuu,”—ka kwa xo thwe.” (Jobo 4:15, 16) Ke moya wa mohuta ofe wo o bego o tutueditše kgopolo ya Elifase? Segalo sa go sola sa mantšu ao a ilego a latela se bontšha gore moya woo ka kgonthe e be e se yo mongwe wa barongwa ba Modimo ba lokilego. (Jobo 4:17, 18) E be e le sebopiwa se kgopo sa moya. Ge e ba go se bjalo, ke ka baka la’ng Jehofa a be a ka sola Elifase le bagwera ba gagwe ba babedi ka gore ba boletše maaka? (Jobo 42:7) Ee, Elifase o be a le ka tlase ga tutuetšo ya motemona. Ditlhaloso tša gagwe di be di bonagatša kgopolo ya go se boife Modimo.

Ke dikgopolo dife tšeo di ka bonwago mantšung a Elifase? Ke ka baka la’ng e le gabohlokwa gore re itšhireletše malebana le dikgopolo tše di fošagetšego? Le gona, ke megato efe yeo re ka e gatago e le gore re di lwantšhe?

“Bahlanka ba Xaxwe ó Šitwa xo ba Bôta”

Dipolelong ka moka tše tharo, Elifase o ile a tšweletša kgopolo ya gore Modimo o swara batho ka thata le gore ga go na selo se bahlanka ba gagwe ba se dirago seo se mo thabišago. Elifase o boditše Jobo gore: “Hleng le Bahlanka ba xaxwe ó šitwa xo ba bôta! Le xo Barongwa ba xaxwe ó hwetša xò le bosodi.” (Jobo 4:18) Elifase ka morago o ile a bolela ka Modimo gore: “Hleng le Bakxêthwa b’axwe ó šitwa xo ba bôta! Le lexodimo ó hwetša lè s’a sêka.” (Jobo 15:15) Ke moka o ile a botšiša gore: “A O re xe O thakxa O hola Yo-matla-ka-moka?” (Jobo 22:3) Bilidada o be a dumelelana le kgopolo ye, ka gobane o boletše gore: “Hleng le kxwedi pel’a xaxwe xa y’a taxa. Le dinaledi xa tša sêka pel’a [Modimo].”—Jobo 25:5.

Re swanetše go itiša malebana le go tutuetšwa ke kgopolo e bjalo. E ka re dira gore re nagane gore Modimo o nyaka mo gontši kudu go rena. Pono ye e bea tswalano ya rena le Jehofa kotsing. Go oketša moo, ge e ba re ineela mohuteng wo wa go nea mabaka, re be re tla arabela bjang ge re newa tayo e nyakegago? Go e na le gore re amogele phošollo ka boikokobetšo, dipelo tša rena di ka “tsôta Morêna,” gomme re ka mo galefela. (Diema 19:3) Seo ruri e tla ba se kotsi gakaakang moyeng!

“A Motho ó Hola Modimo?”

Kgopolo e tswalanago kgaufsi kudu le ya gore Modimo o swara batho ka thata ke kgopolo ya  gore o lebelela batho ba se bohlokwa. Polelo ya boraro ya Elifase e na le potšišo e rego: “A motho ó hola Modimo? Moeletšexi ó a ithsetša.” (Jobo 22:2) Elifase o be a bolela gore motho ga a bohlokwa go Modimo. Ka mo go swanago, Bilidada o itše: “Motho a ka loka bya’ng pele xa Modimo? Ngwana wa mosadi a ka sekêxa bya’ng?” (Jobo 25:4) Go ya ka tsela yeo ya go nea mabaka, Jobo yo e fogo ba motho yo a hwago, o be a ka itebelela bjang e le yo a lego boemong bjo bo lokilego pele ga Modimo?

Batho ba bangwe lehono ba tlaišwa ke dikgopolo tše di fošagetšego mabapi le bona ka noši. Dilo tše bjalo ka kgodišo ya ka lapeng, dikgateletšo tšeo ba lebeletšanago le tšona bophelong, goba go lebeletšana le lehloyo la morafo goba la botšhaba di ka ba di ile tša baka se. Eupša Sathane le batemona ba gagwe le bona ba thabišwa ke go tšhošetša motho. Ge e ba ba ka tutuetša motho gore a nagane gore ga go na selo seo a ka se dirago seo se ka kgahlago Modimo yo Matla ohle, go tla ba bonolo kudu gore a ikwe a hloka mohola. Ge nako e dutše e e-ya, motho yo bjalo a ka aroga, gaešita le go furalela Modimo yo a phelago.—Ba-Hebere 2:1; 3:12.

Go tšofala le mathata a tša maphelo di re palediša go dira dilo tše dingwe. Re ka bonagala re tšea karolo e nyenyane kudu tirelong ya Mmušo ge e bapetšwa le karolo yeo re bego re e tšea ge re be re sa le ba bafsa, re sa phetše gabotse kudu e bile re sa na le matla a mantši. Ruri e tloga e le gabohlokwa go lemoga gore Sathane le batemona ba gagwe ba nyaka gore re nagane gore ga go na selo seo re ka se dirago seo se ka kgahlago Modimo! Re swanetše go lwantšha kgopolo e bjalo.

Kamoo o ka Lwantšhago Dikgopolo tše di Fošagetšego

Go sa šetšwe tlaišego yeo a bego a e baketšwe ke Sathane Diabolo, Jobo o itše: “Ke tlo hwa kè sešo ka re: Ke molato.” (Jobo 27:5) Ka ge a be a rata Modimo, Jobo o be a ikemišeditše go tšwela pele a botega go sa šetšwe seo se diregilego, gomme go be go se na selo seo se bego se tla fetola kgopolo yeo. Gona mo go na le ntlha ya bohlokwa tabeng ya go lwantšha dikgopolo tše di fošagetšego. Re swanetše go ba le kwešišo e botse ka lerato la Modimo gomme re hlagolele tebogo e tšwago pelong bakeng sa lona. Le gona, re swanetše go godiša lerato la rena go yena. Se se fihlelelwa ka go ithuta Lentšu la Modimo ka mehla le go naganišiša ka thapelo mabapi le seo re ithutago sona.

Ka mohlala, Johane 3:16 e re: “Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši.” Jehofa o rata lefase la batho kudu, gomme ditirišano tša gagwe le batho go theoša le nywaga di bontšha lerato leo. Go naganišiša ka mehlala ya nakong e fetilego go swanetše go aga tebogo ya rena go Jehofa le go godiša lerato la rena go yena, ka go rialo gwa re thuša go lwantšha dikgopolo tše di fošagetšego goba tše mpe.

Ela hloko tsela yeo Jehofa a ilego a dirišana le Aborahama ka yona nakong ya ge go senywa ga Sodoma le Gomora go be go batamela. Aborahama o ile a botšiša Jehofa ka makga a seswai mabapi le kahlolo ya Gagwe. Ga go na nako yeo ka yona Jehofa a ilego a ipontšha a tenegile goba a selekegile. Go e na le moo, tsela yeo a ilego a araba ka yona e ile ya kgonthišetša Aborahama le go mo homotša. (Genesi 18:22-33) Ge Modimo ka morago a be a phološa Lota le lapa la gagwe kua Sodoma, Lota o ile a kgopela gore a tšhabele motseng wo o lego kgaufsi go e na le go ya dithabeng. Jehofa o ile a araba ka gore: “Xo lokile; le tabeng yeo ke tlo Xo dumêla, ka lesa xo senya motse woo O o bolêlaxo.” (Genesi 19:18-22) Na dipego tše di bontšha Jehofa e le mmuši yo a swarago batho ka thata, yo a se nago lerato le yo a bušago ka molamo wa tšhipi? Aowa. Di mmontšha e le seo ge e le gabotse a lego sona—Mmuši yo lerato, yo botho, yo a nago le kwelobohloko le yo a naganelago.

Mohlala o ganetšanago le kgopolo ya gore Modimo ke motsoma-phošo le gore ga go na motho yo a ka dirago se se mo kgahlago ke wa Arone, wa Dafida le wa Manase ba kua Isiraele ya bogologolo. Arone o be a e-na le molato wa dibe tše tharo tše dikgolo. O ile a dira namane ya gauta, a tlatša kgaetšedi’agwe Miryama ge a swaya Moše diphošo, gomme a palelwa ke go kgethagatša Modimo le go mo nea tumišo kua Meriba. Lega go le bjalo, Jehofa o ile a bona dika tše dibotse go yena gomme a mo dumelela gore a tšwele pele a  hlankela e le moperisita yo mogolo go fihla lehung la gagwe.—Ekisodo 32:3, 4; Numeri 12:1, 2; 20:9-13.

Kgoši Dafida o dirile dibe tše dikgolo nakong ya pušo ya gagwe. Dibe tše di be di akaretša bootswa, go loga maano-mabe a go bolaya monna yo a se nago molato le go dira tiro e sego molaong ya go bala batho. Lega go le bjalo, Jehofa o ile a lemoga go itshola ga Dafida gomme ka potego e sa kwanantšhego o ile a kgomarela kgwerano ya Mmušo ka go mo dumelela gore a hlankele e le kgoši go fihla a e-hwa.—2 Samuele 12:9; 1 Koronika 21:1-7.

Kgoši ya ba-Juda e lego Manase e ile ya hlomela Baali dialetare, ya fetiša barwa ba yona mollong, ya kgothaletša mekgwa ya go dirišana le meoya gomme ya aga dialetare tša bodumedi bja maaka mathuding a tempele. Lega go le bjalo, ka morago e ile ya itshola go tšwa pelong gomme Jehofa a e lebalela, a e lokolla bothopša a ba a boela a e nea bogoši. (2 Koronika 33:1-13) Na tše ke ditiro tša Modimo yoo go se nago motho yo a ka dirago se se mo kgahlago? Le gatee!

Mothomeletši ka Noši o na le Molato

Ga se ra swanela go makatšwa ke gore Sathane ke mohlala o mogolo wa dika tšeo a beago Jehofa molato wa gore o na le tšona. Sathane o swara batho gampe e bile o nyaka mo gontši go bona. Se se ka bonwa gabotse kudu mokgweng wa go dira dihlabelo ka bana wo o bego o tswalana le borapedi bja maaka bja mehleng ya bogologolo. Ba-Isiraele ba bahlanogi ba be ba fiša barwa le barwedi ba bona—e lego selo seo Jehofa a sego a ka a nagana ka sona.—Jeremia 7:31.

Ke Sathane e sego Jehofa, yo a ratago go swaya diphošo. Kutollo 12:10 e bolela ka Sathane e le “mmexi wa bana ba bô-rena e a bexo a ba bexa pele xa Modimo mosexare le bošexo.” Ka lehlakoreng le lengwe, mopsalme o opetše mabapi le Jehofa gore: “Xe Wene Morêna Ò latiša molato, xôna xo ka êma mang? Xobane tebalêlô e xo Wêna, xore O tlê O boifyê.”—Psalme 130:3, 4.

Ge Dikgopolo tše di Fošagetšego di tla ba di se sa le Gona

Ruri dibopiwa tša moya e lego barongwa di swanetše go ba di ile tša ikwa di imologile ge Sathane Diabolo le batemona ba gagwe ba be ba rakwa legodimong! (Kutollo 12:7-9) Ka morago ga moo, meoya ye e kgopo e be e ka se sa kgona go phetha mediro le ge e le efe ya lapa la Jehofa la barongwa la legodimong.—Daniele 10:13.

Badudi ba lefaseng ba tla thaba nakong e tlago e lego kgaufsi. Go se go ye kae, morongwa yo a theogago legodimong a swere sekgonyu sa sekoti le ketwane e kgolo ka seatleng sa gagwe o tla tlema Sathane le batemona ba gagwe gomme a ba lahlela sekoting moo ba ka se sa hlwago ba kgona go dira selo. (Kutollo 20:1-3) Ruri re tla imologa ge seo se direga!

Mo nakong ye, re swanetše go itiša malebana le dikgopolo tše di fošagetšego. Nako le nako ge re hwetša gore re thoma go ba le dikgopolo tše di fošagetšego goba tše mpe menaganong ya rena, re swanetše go di lwantšha ka go lebiša tlhokomelo ya rena leratong la Jehofa. Ke moka, ‘khutšo ya Modimo ye e fetago tlhaologanyo yohle, e tla boloka dipelo tša rena le dikgopolo tša rena.’—Ba-Filipi 4:6, 7.

[Seswantšho go letlakala 26]

Jobo o ile a lwantšha dikgopolo tše di fošagetšego

[Seswantšho go letlakala 28]

Lota o ile a ithuta gore Jehofa ke Mmuši yo a naganelago