O be a Thabela Molao wa Jehofa

ALBERT D. SCHROEDER, setho sa Sehlopha se Bušago sa Dihlatse tša Jehofa, o phethile bophelo bja gagwe bja lefaseng ka Laboraro, March 8, 2006. O be a e-na le nywaga e 94 gomme a feditše nywaga e fetago 73 a le tirelong ya nako e tletšego.

Ngwanabo Rena Schroeder o belegetšwe Saginaw, Michigan, U.S.A., ka 1911. * Ge e be e sa le ngwana, makgolo’agwe, motswadi wa mmagwe, o ile a mo ruta mo gontši ka Beibele le go bjala ka go yena lerato la go bala Lentšu la Jehofa. O ile a ithuta Selatine, Sejeremane le boentšeneare bja mohlagase Yunibesithing ya Michigan. Lega go le bjalo, ge lerato la gagwe la Mangwalo le dutše le gola, o ile a tlogela dithuto tša gagwe gomme a tsenela modiro wa nako e tletšego wa go bolela ka Mmušo. O ile a ba setho sa lapa la Bethele la Brooklyn, New York ka 1932.

Ka 1937, ge a be a e-na le nywaga e 26, Ngwanabo Rena Schroeder o ile a kgethwa gore a okamele modiro wa Dihlatse tša Jehofa kua Brithania. Go fišegela ga gagwe modiro wa boboledi go ile gwa kgothaletša ba bantši gona kua gore ba tsenele tirelo ya nako e tletšego. Lesogana le lengwe leo le ilego la gwerana le yena kua Bethele ya London e be e le John E. Barr. Ka morago ba ile ba hlankela gotee ka nywaga e mentši Sehlopheng se Bušago.

Modiro woo Ngwanabo Rena Schroeder a bego a o dira legatong la Dihlatse tša Jehofa o ile wa lemogwa nywageng ya ntwa. Ka August 1942 mmušo o ile wa mo huduša Brithania. Ka morago ga leeto le le gateletšago la go phatša Lewatle la Atlantic nakong ya ntwa, o ile a goroga Brooklyn ka September.

Ka nako yeo, bahlanka ba Jehofa ba be ba šetše ba letetše gore go tla ba le modiro o mogolo woo o tla swanelwago ke go dirwa ka morago ga Ntwa ya II ya Lefase. Ngwanabo Rena Schroeder o ile a makatšwa le go thabišwa ke go amogela kabelo ya gagwe e mpsha—go thuša go hlama lenaneo-thuto la Sekolo sa Beibele sa Watchtower sa Gilead. O ile a hlankela moo ka nywaga e mmalwa e le mohlahli, a thuša go tlwaetša baromiwa. Barutwana bao a ba rutilego kua Gilead le bao ka morago a ba rutilego Sekolong sa Bodiredi sa Mmušo ba sa dutše ba gopola dinako tše di thabišago tša ge a be a ba ruta ka klaseng. O be a thabela go kgothaletša barutwana ba gagwe go rata melao ya Modimo le go gatelela bohlokwa bja go tseba Jehofa.

Ka 1956, Ngwanabo Rena Schroeder o ile a nyala Charlotte Bowin gomme ka 1958 morwa wa bona, e lego Judah Ben o ile a belegwa. Ngwanabo Rena Schroeder e be e le monna le tate yo mobotse wa Mokriste. Ka 1974, o ile a thoma go hlankela Sehlopheng se Bušago, moo kwešišo ya gagwe e bego e thabelwa kudu. O be a le botho e bile a ikokobeditše, gomme ka godimo ga tšohle, a nyaka go godiša leina le legolo la Modimo. Re kgodišegile gore Ngwanabo Rena Schroeder o amogetše moputso wa gagwe wa legodimong bjalo ka Mokriste yo a tloditšwego yoo ruri a bego a ‘thabela molao wa Jehofa.’—Psalme 1:2.

[Mongwalo wa ka tlase]