Dipotšišo tše Tšwago go Babadi

Ka ge Bajuda ba ile ba laelwa gore ba se ke ba ja “se se hlabexilwexo” nakong ya Paseka, ke ka baka la’ng Jesu a ile a diriša beine—seela seo se betšego—ge a be a hloma Segopotšo sa lehu la gagwe?—Ekisodo 12:20; Luka 22:7, 8, 14-20.

Paseka, yeo e bego e swaya go Huduga ga barwa ba Isiraele Egipita, e ile ya hlongwa ka 1513 B.C.E. Ge Jehofa a be a nea ditaelo mabapi le yona o itše: “Le se kê la bá la ja se se hlabexilwexo; mo malapeng ka moka a lena Le jê dinkxwa tše di se naxo hlabêxô.” (Ekisodo 12:11, 20) Kiletšo ye yeo e tšwago go Modimo e be e šoma feela mohuteng wa senkgwa seo ba bego ba swanetše go se ja nakong ya Paseka. Ga se gwa bolelwa selo ka beine.

Lebaka le legolo la gore go iletšwe hlabego goba komelo ke gore go tloga ga Baisiraele Egipita go diregile ka lebelo. Ekisodo 12:34 e hlalosa gore: “Ké mo sethšaba se tšerexo maupi a sôna a a bexo a dubilwe à le merufsing, ba a phuthêla ka dikobô, ba a rwala ka maxetla.” Go se dirišwe ga komelo Dipasekeng tše di latetšego go be go tla gopotša meloko e latetšego ka tiragalo ye e bohlokwa.

Ka morago, gantši komelo e be e lebelelwa e swantšhetša sebe goba go senyega. Ka mohlala, ge a šupa go motho wa boitshwaro bjo bo gobogilego yo a bego a le ka phuthegong ya Bokriste, moapostola Paulo o ile a botšiša gore: “Na ga le tsebe gore komelo e nyenyane e bediša hlama ka moka?” Ke moka o ile a re: “Tlošang komelo ya kgale, e le gore le be hlama e mpsha go etša ge le se la omelwa. Gobane ruri Kriste paseka ya rena o dirilwe sehlabelo. Ka baka leo anke re bineng monyanya, e sego ka komelo ya kgale, le gona e sego ka komelo ya bobe le bokgopo, eupša ka dinkgwa tše di sa omelwago tša go botega le therešo.” (1 Bakorinthe 5:6-8) Ke feela senkgwa seo se se nago komelo seo se bego se ka swantšhetša mmele wa Jesu wo o se nago sebe.—Baheberu 7:26.

Go diriša beine Pasekeng ke selo seo se ilego sa tlaleletšwa ka morago ga nako ke Bajuda. Mohlomongwe, go ile gwa tlaleletšwa ka morago ga ge ba boile bothopša Babilona. Ga go na pego ya Beibele yeo e bontšhago gore tlaleletšo ye e ile ya iletšwa, ka gona Jesu ka mo go swanetšego o ile a diriša beine dijong tša Paseka. Ge e le gabotse, go bela ga tlhago moo go bego go direga dibeineng tša bogologolo go be go fapana le go bela moo go bego go direga go senkgwa. Mabapi le maupi a dubilwego, go be go nyakega gore a tsenywe hlabego goba komelo. Beine yeo e bego e dirilwe ka morara e be e sa nyake go tswakwa le dilo tše bjalo. Dilo tšeo di bego di dira gore morara o bele di be di le gona mo merareng. Matute a morara ao a sego a bela, a be a ka se hwetšwe nakong ya Paseka ka baka la gore a be a ka se dule a sa bele go tloga nakong ya lehlabula ge go bunwa go ba go fihla nakong ya Paseka ya selemo.

Ka gona, go diriša ga Jesu beine e le seswantšhetšo nakong ya Segopotšo go tloga go sa thulane le ditaelo tša Paseka mabapi le komelo. Beine e nngwe le e nngwe yeo e sego ya tswakwa ka dinatefiši, tagi goba dinoko e swanetše go dirišwa e le seswantšhetšo sa “madi a bohlokwa” a Kriste.—1 Petro 1:19.